ബാഴ്​സയിൽനിന്ന്​ ഗ്രീസ്​മാനെ വീണ്ടും 'വായ്​പയെടുത്ത്​' അത്​ലറ്റികോ

മഡ്രിഡ്​: ബാഴ്​സയുടെ മിന്നുംതാരമായിരുന്ന അ​േന്‍റായിൻ ഗ്രീസ്​മാനെ വീണ്ടും വായ്​പയെടുത്ത്​ ലാ ലിഗ ചാമ്പ്യന്മാരായ അത്​ലറ്റികോ മഡ്രിഡ്​. നേരത്തെ അത്​ലറ്റിക്കോക്കൊപ്പം തകർത്തുകളിച്ച ശേഷം ഇടവേളയിൽ ബാഴ്​സ ജഴ്​സിയിൽ ഇറങ്ങിയെങ്കിലും 102 മത്സരങ്ങളിൽ 35 ഗോൾ മാ​ത്രമാണ്​ നേടാനായിരുന്നത്​.

കനത്ത സാമ്പത്തിക പ്രതിസന്ധിയിലായിരുന്ന ബാഴ്​സലോണയിൽനിന്ന്​ ഈ സീസണിൽ പടിയിറങ്ങുന്ന 11ാമത്തെ താരമാകുകയാണ്​ ഗ്രീസ്​മാൻ. പകരക്കാരനായി സെവിയ്യ സ്​ട്രൈക്കർ ലൂക്​ ഡി ജോങ്ങിനെ സ്വന്തമാക്കിയിട്ടുണ്ട്​.

ട്രാൻസ്​ഫർ ജാലകം അടച്ച അവസാന ദിവസം രണ്ടു പേർ കൂടി ടീം വിട്ടിട്ടുണ്ട്​. എമേഴ്​സൺ റോയൽ ടോട്ടൻഹാമി​േലക്കും കൗമാര താരം ഇലക്​സ്​ മോറിബ ലീപ്​സിഷിലേക്കുമാണ്​ പോയത്​. സൂപർ താരം ലയണൽ മെസ്സി മടങ്ങിയ ബാഴ്​സ ഉളള കരുത്തിൽ കപ്പുയർത്താനുള്ള തീവ്ര യത്​നത്തിലാണ്​.

കഴിഞ്ഞ സീസണിൽ ബാഴ്​സയിൽനിന്ന്​ സ്വന്തമാക്കിയ ലൂയിസ്​ സുവാരസ്​ മുന്നിൽനിന്നു നയിച്ച്​ അത്​ലറ്റികോ ലാ ലിഗ ചാമ്പ്യൻപട്ടം മാറോടുചേർത്തിരുന്നു. ​പഴയ സഹതാരം ഗ്രീസ്​മാൻ കൂടി എത്തുന്നതോടെ ടീമിന്​ ഇരട്ടി കരുത്താകും.

അതേ സമയം, ബാഴ്​സലോണയിൽ മുതിർന്ന താരങ്ങളായ സെർജിയോ ബുസ്​കെറ്റ്​സ്​, ജോർഡി ആൽബ എന്നിവരും ശമ്പളം വെട്ടിക്കുറക്കാൻ സമ്മതിച്ചിട്ടുണ്ട്​.