കോടതിയുടെ കനിവിൽ പോളണ്ടിലെ ജംപിങ്​ പിറ്റിലിറങ്ങിയ സമീഹക്ക്​ ഏഴാം സ്ഥാനം

നാഗർകോവിൽ: പോളണ്ടിലെ ലോക ബധിര അത്​ലറ്റിക്​സ്​ ചാമ്പ്യൻഷിപ്പിൽ ലോങ്​ജമ്പ്​ ഇനത്തിൽ മത്സരിച്ച സമീഹ പർവീണിന് ഏഴാം സ്ഥാനം. യോഗ്യത റൗണ്ടിൽ വിജയിച്ചിട്ടും സ്പോർട്​സ്​ അതോറിറ്റി ഓഫ് ഇന്ത്യ തഴഞ്ഞതോടെ മദ്രാസ് ഹൈകോടതിയുടെ ഉത്തരവിന്‍റെ ബലത്തിലാണ്​ സമീഹ മത്സരിക്കാൻ പോളണ്ടിലേ​ക്ക്​ പറന്നത്​.

​പോളണ്ടിലെ ലുബ്ലിനിൽ ആഗസ്റ്റ്​ 23 മുതൽ 28 വരെയായിരുന്നു ചാമ്പ്യൻഷിപ്​. വെള്ളിയാഴ്ച നടന്ന ലോങ്​ജമ്പ്​ മത്സരത്തിൽ പങ്കെടുത്ത 16 പേരിൽ ഏഴാമതെത്തിയതോടെ വരാനിരിക്കുന്ന പാരാലിമ്പിക്സിന്​ നേരിട്ട് യോഗ്യത നേടി സമീഹ കരുത്ത്​ തെളിയിച്ചു. 4.98 മീറ്റർ ദൂരമാണ് സമീഹ പോളണ്ടിൽ താണ്ടിയത്​.

സമീഹയുടെ സ്വന്തം സ്ഥലമായ കന്യാകുമാരി ജില്ലയിലെ കായാലുമൂട്ടിൽ മത്സരം നേരിട്ട് കാണാൻ പ്രത്യേകം ഒരുക്കിയിരുന്ന സ്ഥലത്ത് വൻ ജനാവലി എത്തിയിരുന്നു. ഏഴാം സ്ഥാനം കരസ്ഥമാക്കിയ സമീഹയ്ക്ക് അനുമോദനങ്ങൾ നേർന്ന് അവർ ആഹ്ളാദം പങ്കുവെച്ചു. കടയാലുമൂട് സ്വദേശി മുജീബ്-സലാമത്ത് ദമ്പതികളുടെ മകളാണ് സമീഹ പർവീൺ.