2024 പാരിസ്​ ഒളിമ്പിക്​സിൽ ബ്രേക്ക്​ ഡാൻസ​ും മത്സര ഇനം

ലണ്ടന്‍: 2024ലെ പാരിസ് ഒളിമ്പിക്‌സില്‍ ബ്രേക്ക് ഡാന്‍സ് അടക്കമുള്ള നാല് ഇനങ്ങള്‍ ഉള്‍പ്പെടുത്താന്‍ അന്താരാഷ്​ട്ര ഒളിമ്പിക് കമ്മിറ്റി (ഐ.ഒ.സി) അംഗീകാരം നല്‍കി. പാരിസ് ഒളിമ്പിക്‌സില്‍ സര്‍ഫിങ്‌, സ്‌കേറ്റ്‌ ബോര്‍ഡിങ്, സ്‌പോര്‍ട്‌സ് ക്ലൈംബിങ് എന്നിവയ്‌ക്കൊപ്പം ബ്രേക്ക്ഡാന്‍സിങ്ങും ഉള്‍പ്പെടുത്തുന്നതിന്​ ഐ.ഒ.സി തിങ്കളാഴ്ച അംഗീകാരം നല്‍കിയതായി പ്രസിഡൻറ്​ തോമസ് ബാച്ച് പറഞ്ഞു.

ഒളിമ്പിക്​സ്​ നടക്കുന്ന പ്രദേശത്തെ ജനപ്രിയ ഇനങ്ങളെ ഉൾപ്പെടുത്താൻ ആതിഥേയ നഗരത്തെ അനുവദിക്കുന്ന ഐ.ഒ.സിയുടെ പുതിയ ചട്ടപ്രകാരമാണിത്​. പാരീസ് ഒളിമ്പിക്‌സിനെ കോവിഡാനന്തര ലോകത്തിന് കൂടുതല്‍ അനുയോജ്യമാക്കുകയാണ്​ ലക്ഷ്യമെന്ന്​ തോമസ്​ ബാച്ച്​ വ്യക്​തമാക്കി. ഗെയിംസിന് ആതിഥേയത്വം വഹിക്കുന്നതിൻെറ ചെലവും നടത്തിപ്പിലെ സങ്കീര്‍ണ്ണതയും കൂടുതല്‍ കുറയ്ക്കാൻ ഇത്​ സഹായിക്കും. യുവാക്കളെ കൂടുതലായി ആകർഷിക്കാനും കഴിയുമെന്ന്​ അദ്ദേഹം ചൂണ്ടിക്കാട്ടി.

സ്‌പോണ്‍സര്‍മാര്‍ക്കും ബ്രോഡ്കാസ്​റ്റിങ് പങ്കാളികള്‍ക്കും യുവ ആരാധകര്‍ക്കും താല്‍പര്യമുള്ള തരത്തില്‍ ഒളിമ്പിക്​സിനെ നവീകരിക്കാനുള്ള ശ്രമങ്ങളുടെ ഭാഗം കൂടിയാണ്​ ഐ.ഒ.സിയുടെ പുതിയ നീക്കം. പാരീസ് ഗെയിംസിനുള്ള മൊത്തം അത്​ലറ്റുകളുടെ എണ്ണം 10,500 ആയി പരിമിതപ്പെടുത്തിയിട്ടുമുണ്ട്​. അടുത്തിടെ നടന്ന ഒളിമ്പിക്​സുകളിൽ പ​ങ്കെടുത്ത മൊത്തം അത്​ലറ്റുകളുടെ എണ്ണത്തേക്കാൾ 500 കുറവാണിത്​. വെയ്​റ്റ്​ലിഫ്​റ്റിങ്​, ബോക്​സിങ്​ മത്സരങ്ങളിലാണ്​ മത്സരാർഥികളുടെ എണ്ണം കുറച്ചിരിക്കുന്നത്​. എന്നാല്‍, പാരീസ് ഗെയിംസില്‍ പുരുഷ-വനിതാ അത്​ലറ്റുകളുടെ എണ്ണം തുല്യമായിരിക്കും. കോവിഡ് മൂലം 2021ലേക്ക്​ മാറ്റിവെച്ച ടോക്യോ ഗെയിംസില്‍ വനിതാ പ്രാതിനിധ്യം 48.8 ശതമാനമായിരുന്നു.

1970ൽ അമേരിക്കയിൽ രൂപമെടുത്ത ബ്രേക്ക്​ഡാൻസിങ്​ ഇപ്പോൾ ലോകമെമ്പാടും ലക്ഷക്കണക്കിന്​ യുവാക്കളുടെ ഹരമായി മാറിയിട്ടുണ്ട്​. 2019ൽ മുംബൈയിൽ നടന്ന റെഡ്​ബുൾ ബ്രേക്ക്​ഡാൻസ്​ വൺ വേൾഡ്​ ഫൈനൽ നേരിട്ടും വിവിധ സ്​ട്രീമിങ്​ പ്ലാറ്റ്​ഫോമുകളിലൂടെയും കണ്ടത്​ അഞ്ച്​ കോടി ആളുകളാണ്​.