'കൺകഷൻ സബ്​' റോളിൽ തിളങ്ങി ചഹൽ; ഓസീസ്​ കോച്ചിൻെറ 'ആധി' സത്യമായി

കാൻബറ: കൺകഷൻ സബ്​സ്​റ്റിറ്റ്യൂട്ടിനെ ഫലപ്രദമായി ഉപയോഗപ്പെടുത്തിയത്​ വഴിയാണ്​ ആസ്​ട്രേലിയക്കെതിരായ ട്വൻറി20 പരമ്പരയിലെ ആദ്യ മത്സരത്തിൽ ഇന്ത്യ ജയിച്ചു കയറിയത്​. ഇന്ത്യൻ ഇന്നിങ്​സിൻെറ അവസാന ഓവറിൽ മിച്ചൽ സ്​റ്റാർക്കിൻെറ പന്ത്​ ഹെൽമറ്റിൽ കൊണ്ട്​ പരിക്കേറ്റ രവീന്ദ്ര ജദേജക്ക്​ പകരം പന്തെറിയാനിറങ്ങിയ യൂസ്​വേന്ദ്ര ചഹലാണ്​ ഇന്ത്യൻ വിജയത്തിൽ നിർണായക പങ്കുവഹിച്ചത്​.

എന്നാൽ ജദേജയുടെ പകരക്കാരനായി ചഹലിനെ ഇറക്കാൻ അനുമതി നൽകിയ തീരുമാനം വിവാദത്തിന്​ തിരികൊളുത്തിയിട്ടുണ്ട്​. ആസ്​ട്രേലിയൻ കോച്ച്​ ജസ്​റ്റിൻ ലാംഗർ മാച്ച്​ റഫറി ഡേവിഡ്​ ബൂണിനോട്​ തൻെറ അതൃപ്​തി പരസ്യമാക്കിയെങ്കിലും ഫലമുണ്ടായിരുന്നില്ല. ഇന്നിങ്​സ്​ ബ്രേക്കി​നിടെയാണ്​ ലാംഗർ ബൂണിനോട്​ പ്രതിഷേധിച്ചത്​.

കളിക്കിടെ തലക്ക്​ പരിക്കേറ്റാല്‍ കളിക്കാരനെ മാറ്റാമെന്നതാണ് ഐ.സി.സിയുടെ കണ്‍കഷന്‍ നിയമ വ്യവസ്​ഥ. ബൗൺസർ കൊണ്ട വേളയിൽ കൺകഷൻ ടെസ്​റ്റിന്​ ജദേജ വിധേയനായിരുന്നില്ല. ബാറ്റിങ്​ തുടർന്ന ജദേജ അവസാന മൂന്ന്​ പന്തുകളിൽ നിന്ന്​ ഒമ്പത്​ റൺസ്​ ചേർത്തിരുന്നു. അവസാന ഓവറിലാണ്​ തലക്ക്​ ഏറ്​ കൊള്ളുന്നതെങ്കിൽ ഇന്നിങ്​സ്​ ബ്രേക്കിൻെറ സമയത്ത്​ കൺകഷൻ ടെസ്​റ്റ്​ നടത്താമെന്നും നിയമമുണ്ട്​.

മെഡിക്കൽ സംഘം പരിശോധന നടത്തിയതിൻെറ അടിസ്​ഥാനത്തിൽ ജദേജക്ക്​ പകരം ചഹൽ ഓസീസിനെതിരെ ബൗളിങ്ങിനിറങ്ങുമെന്ന്​ ബി.സി.സി.ഐ അറിയിക്കുകയായിരുന്നു.

ബൗൺസറേറ്റിട്ടും ബാറ്റിങ് തുടര്‍ന്ന ജദേജയ്ക്ക് പകരം ചഹലിനെ കളിക്കാനിറക്കിയതിനാലാണ്​ ലാംഗര്‍ പ്രതിഷേധിച്ചത്. മാച്ച് റഫറി ഡേവിഡ് ബൂണുമായി ലാംഗര്‍ തര്‍ക്കിച്ചെങ്കിലും ഫലമുണ്ടായില്ല. പകരക്കാരനായി ഇറക്കുന്നത് തത്തുല്യ കളിക്കാരനായിരിക്കണമെന്നാണ് നിയമം.

ജദേജ ബൗളിങ്​ ചെയ്യുന്നതിനാൽ ചഹലിന്​ നറുക്കു വീഴുകയായിരുന്നു. ഓസീസ്​ നായകൻ ആരോൺ ഫിഞ്ചിനെയും സ്​റ്റീവൻ സ്​മിത്തിനെയും വീഴ്​ത്തി ചഹൽ കളി ഇന്ത്യക്ക്​ അനുകൂലമാക്കി മാറ്റുകയായിരുന്നു.

മധ്യഓവറുകളിൽ തപ്പിത്തടഞ്ഞ ഇന്ത്യക്ക്​ ജദേജയുടെ ഇന്നിങ്‌സാണ് മാന്യമായ സ്‌കോര്‍ സമ്മാനിച്ചത്​. 23 പന്തിൽ നിന്ന്​ പുറത്താകാതെ 44 റണ്‍സടിച്ച ജദേജയാണ്​ സ്​കോർ 150 കടത്തിയത്​. ഏകദിന പരമ്പരയിലെ അവസാന മത്സരത്തിൽ ഓസീസിനെ തോൽപിച്ച്​ ഇന്ത്യ പര്യടനത്തിലെ ആദ്യ ജയം നേടിയപ്പോൾ ഹർദിക്​ പാണ്ഡ്യക്കൊപ്പം (90 നോട്ടൗട്ട) ജദേജയായിരുന്നു (66 നോട്ടൗട്ട്​) ബാറ്റിങ്ങിൽ കരുത്തായത്​.