ഇന്ത്യൻ ക്രിക്കറ്റിൽ രോഹിത്​ യുഗം വരുന്നു; ട്വന്‍റി20 ലോകകപ്പിന്​ ശേഷം വിരാട്​ കോഹ്​ലി നായക സ്​ഥാനം ഒഴിയുമെന്ന്​

ന്യൂഡൽഹി: ട്വന്‍റി20 ലോകകപ്പിന്​ ശേഷം വിരാട്​ കോഹ്​ലി ഇന്ത്യയുടെ ഏകദിന, ട്വന്‍റി20 ടീമുകളുടെ നായക സ്​ഥാനം ഒഴിയുമെന്ന്​ റിപ്പോർട്ട്​. ഓപണറും ഉപനായകനുമായ രോഹിത്​ ശർമയാകും പുതിയ നായകൻ.

ബാറ്റിങ്ങിൽ കൂടുതലായി ശ്രദ്ധ കേന്ദ്രീകരിക്കുന്നതിനായി കോഹലി നായക സ്​ഥാനം ഒഴിയുമെന്ന്​ ബി.സി.സിയുമായി അടുത്ത ബന്ധമുള്ള വ്യക്തികളെ ഉദ്ധരിച്ച്​ ടൈംസ്​ ഓഫ്​ ഇന്ത്യ റിപ്പോർട്ട്​ ചെയ്​തു.

നിലവിൽ 32കാരനായ കോഹ്​ലിയാണ്​ മൂന്ന്​ ഫോർമാറ്റിലും ടീം ഇന്ത്യയെ നയിക്കുന്നത്​. ഏറെ നാളായി കോഹ്​ലി ഇതുസംബന്ധിച്ച്​ ബി.സി.സി.ഐയുമായും രോഹിത്തുമായും ചർച്ച ചെയ്യുന്നതായി റിപ്പോർട്ടിൽ പറയുന്നു. 2014ൽ ആസ്​ട്രേലിയയിൽ വെച്ച്​ ധോണി ടെസ്റ്റ്​ നായക സ്​ഥാനം ഒഴിഞ്ഞതോടെയാണ്​ കോഹ്​ലി നായക സ്​ഥാനത്ത്​ അവരോധിക്കപ്പെട്ടത്​. 2017ലാണ്​ മൂന്ന്​ ഫോർമാറ്റിലെയും നായകനായത്​.

65 ടെസ്റ്റ്​ മത്സരങ്ങളിൽ ഇന്ത്യയെ നയിച്ച കോഹ്​ലി 38 മത്സരങ്ങളിൽ ഇന്ത്യയെ വിജയത്തിലെത്തിച്ചു. കോഹ്​ലിക്ക്​ കീഴിൽ കളിച്ച 95 ഏകദിനങ്ങളിൽ 65ലും ഇന്ത്യ വെന്നിക്കൊടി പാറിച്ചു. 45 ട്വന്‍റി20കളിൽ 29ലും ഇന്ത്യക്കായിരുന്നു ജയം.

രണ്ട്​ ലോകകപ്പുകൾ മുന്നിലുള്ളതിനാൽ ബാറ്റിങ്ങിൽ കൂടുതൽ മികവിലേക്കുയരണമെന്നാണ്​ കോഹ്​ലിയുടെ ചിന്ത. 2022ൽ ട്വന്‍റി20 ലോകകപ്പും2023ല ഏകദിന ലോകകപ്പുമാണ്​ ലക്ഷ്യം​. ടീമിലെ ഏറ്റവും മുതിർന്ന താരങ്ങളിൽ ഒരാളായ രോഹിത്ത്​ ശർമയും മികച്ച ഫോമിലാണ്​.

ഐ.പി.എല്ലിൽ മുംബൈ ഇന്ത്യൻസിനെ തുടർച്ചയായി കിരീട ജേതാക്കളാക്കുന്ന രോഹിത്തിന്‍റെ ക്യാപ്​റ്റൻസി മികവിനെ കുറിച്ച്​ ആർക്കും വിശദീകരിച്ച്​ കൊടുക്കേണ്ട കാര്യമില്ല. കോഹ്​ലിയുടെ അഭാവത്തിൽ 10 ഏകദിനങ്ങളിൽ രോഹിത്തിന്‍റെ കീഴിൽ ഇറങ്ങിയ ഇന്ത്യ​ എ​ട്ടെണ്ണത്തിലും വിജയിച്ചു. 19 ട്വന്‍റി20കളിൽ 15ലും വിജയിച്ച ഇന്ത്യ നാലെണ്ണത്തിൽ മാത്രമാണ്​ തോറ്റത്​. ഐ.പി.എല്ലിൽ 123 മത്സരങ്ങൾ നയിച്ച രോഹിത്ത്​ 74 മത്സരങ്ങളിൽ വിജയിച്ചു.

2018ൽ ശ്രീലങ്കയിൽ നടന്ന നിദാഹസ്​ ട്രോഫിയും യു.എ.ഇയിൽ നടന്ന ഏഷ്യ കപ്പും രോഹിത്തിന്‍റെ കീഴിലാണ്​ ഇന്ത്യ സ്വന്തമാക്കിയത്​. 2013, 2015, 2017, 2019, 2020 വർഷങ്ങളിൽ മുംബൈ ഇന്ത്യൻസിനെ ഐ.പി.എൽ കിരീടത്തിലേക്ക്​ നയിച്ച രോഹിത്ത്​ ടൂർണമെന്‍റ്​ ചരിത്രത്തിലെ ഏറ്റവും മികച്ച നായകനായാണ്​ വിലയിരുത്തപ്പെടുന്നത്​. ട്വൻറി20 ലോകകപ്പിൽ മെന്‍ററുടെ റോളിൽ മുൻ നായകൻ എം.എസ്​. ധോണി ടീമിനൊപ്പമുണ്ടാകുമെന്നത് വലിയ ആത്മവിശ്വാസമാണ്​. ​