അലിയുടെ കിടിലൻ പന്ത്​; വിശ്വസിക്കാനാകാതെ കോഹ്​ലി, ഇന്ത്യൻ നായകന്‍റെ പേരിൽ ഒരു മോശം റെക്കോഡും​ VIDEO

ചെന്നൈ: ഇംഗ്ലണ്ടുമായുള്ള രണ്ടാംടെസ്റ്റിൽ ഇന്ത്യൻ ഭാഗത്ത്​ നിന്നുമുള്ള ശുഭവാർത്ത രോഹിത്​ ശർമയുടെ സെഞ്ച്വറിയാണെങ്കിൽ മോശം വാർത്ത നായകൻ വിരാട്​ കോഹ്​ലിയുടെ ഡക്കാണ്​. ഇന്ത്യ ടോസ്​ ലഭിച്ച്​ ബാറ്റിങ്ങിനിറങ്ങിയാൽ വിരാട്​ കോഹ്​ലി സംഹാരരൂപം വീണ്ടെടുക്കുമെന്നായിരുന്നു കണക്കുകൂട്ടലുകളൊക്കെയും.

എന്നാൽ നിലയുറപ്പിക്കും മു​േമ്പ ഇംഗ്ലീഷ്​ സ്​പിന്നർ മുഈൻ അലി കോഹ്​ലിയുടെ കുറ്റിതെറിപ്പിക്കുകയായിരുന്നു. ഏറെനാളിന്​ ശേഷം കളത്തിലിറങ്ങി ഫോം വീണ്ടെടുക്കാനാകാതെ വിഷമിച്ച അലി അദ്​ഭുതകരമായ പന്തിലൂടെയാണ്​ കോഹ്​ലിയെ പുറത്താക്കിയത്​. ഡ്രൈവിന്​ ശ്രമിച്ച കോഹ്​ലിയെ കബളിപ്പിച്ച്​ ടേൺ ചെയ്​ത പന്ത്​ കുറ്റിതെറിപ്പിക്കുകയായിരുന്നു. സംഭവം വിശ്വസിക്കാനാകാതെ കോഹ്​ലി ക്രീസിൽ അൽപ്പസമയം ചിലവിട്ടു. വിക്കറ്റ്​ കീപ്പറുടെ ഗ്ലൗസ്​ ​സ്​റ്റംപിലുരസിയോയെന്നും കോഹ്​ലിക്ക്​ സംശയമുണ്ടായിരുന്നു. കോഹ്​ലി വേഗം പുറത്തായതോടെ സമ്മർദ്ദത്തിലായ ഇന്ത്യയെ രോഹിത്​ ശർമയും രഹാനെയും ചേർന്ന്​ കരകയറ്റിയിരുന്നു.

റെക്കോഡുകളുടെ തോഴനായ ഇന്ത്യൻ നായകൻ ഓർക്കാൻ ഇഷ്​ടപ്പെടാത്ത ഒരു റെക്കോഡും​ മത്സരത്തിൽ സ്വന്തമാക്കി. കൂടുതല്‍ തവണ പൂജ്യത്തിന് പുറത്തായ ഇന്ത്യന്‍ നായകന്മാരില്‍ കോഹ്​ലി രണ്ടാമതെത്തിയാണ്​ നെഗറ്റിവ്​ റെക്കോഡ്​. മുന്‍ നായകന്‍ മഹേന്ദ്ര സിങ് ധോണിയെ മറികടന്നാണ് കോഹ്​ലി രണ്ടാമതെത്തിയത്. നായകപദവി ഏറ്റെടുത്ത ശേഷം കോഹ്​ലി റണ്‍സെടുക്കാതെ മടങ്ങുന്ന 12ാം മത്സരമാണിത്. ധോണി 11 തവണ പൂജ്യനായി മടങ്ങി. 13 തവണ പൂജ്യത്തിന് പുറത്തായ മുന്‍ നായകന്‍ സൗരവ് ഗാംഗുലിയാണ് പട്ടികയില്‍ ഒന്നാമൻ.