പൊളിച്ചു മക്കളേ....ബോക്​സിങ്​ ഡേ ടെസ്റ്റിൽ ഓസീസിനെ തകർത്ത ടീം ഇന്ത്യക്ക്​ അഭിനന്ദനവുമായി കോഹ്​ലി

മെൽബൺ: ബോക്​സിങ്​ ഡേ ക്രിക്കറ്റ്​ ടെസ്റ്റിൽ ആസ്​ട്രേലിയയെ എട്ട്​ വിക്കറ്റിന്​ തകർത്ത്​ ബോർഡർ -ഗവാസ്​കർ ട്രോഫിയിൽ 1-1ന്​ ഒപ്പമെത്തിയ ഇന്ത്യൻ ടീമിന്​ അഭിനന്ദന പ്രവാഹം. നായകൻ വിരാട്​​ കോഹ്​ലിയടക്കം ടീമിന്‍റെ പ്രകടനത്തെ വാഴ്​ത്തി രംഗത്തെത്തി. ഭാര്യയുടെ പ്രസവവുമായി ബന്ധപ്പെട്ട്​ അവധിയിൽ പ്രവേശിച്ച കോഹ്​ലിയുടെ അഭാവത്തിൽ അജിൻക്യ രഹാനെയുടെ കീഴിലായിരുന്നു ഇന്ത്യയുടെ മിന്നും വിജയം.

'ഇത് എന്തൊരു വിജയമാണ്, മുഴുവൻ ടീമിന്‍റെയും അത്ഭുതകരമായ ശ്രമം. ടീമിനെ മിന്നും വിജയത്തിലേക്ക് നയിച്ച ബോയ്​സിനു​ം പ്രത്യേകിച്ച് നായകൻ രഹാനെയുടെയും പ്രകടനത്തിൽ അതീവ സന്തോഷം' -കോഹ്​ലി ട്വിറ്ററിൽ കുറിച്ചു.

മെൽബൺ ക്രിക്കറ്റ്​ ഗ്രൗണ്ടിൽ എട്ടുവിക്കറ്റിനായിരുന്നു ഇന്ത്യൻ ജയം. നാലാം ദിനം രണ്ടാം ഇന്നിങ്​സ്​ പുനരാരംഭിച്ച ഓസീസ്​ 200 റൺസിന്​ പുറത്തായി. 69 റൺസ്​ മാത്രമായിരുന്നു ആതിഥേയരു​ടെ ലീഡ്​. മായങ്ക്​ അഗർവാളിന്‍റെയും (5) ചേതേശ്വർ പുജാരയുടെയും (3) വിക്കറ്റുകൾ നേരത്തെ നഷ്​ടമായെങ്കിലും സ്​റ്റൈലിഷ്​ ബാറ്റിങ്​ പ്രകടനം കാഴ്ചവെച്ച അരങ്ങേറ്റക്കാരൻ ശുഭ്​മാൻ ഗില്ലും (35*) രഹാനെയും (27*) ടീമിനെ അനായാസം വിജയതീരമണച്ചു.

ആദ്യ ഇന്നിങ്​സിൽ സെഞ്ച്വറിയുമായി (112) ടീമിന്‍റെ ന​ട്ടെല്ലാവുകയും ഗ്രൗണ്ടിൽ മികച്ച ക്യാപ്​റ്റൻസിയും കാഴ്ചവെച്ച രഹാനെക്ക്​ തീർച്ചയായും വിജയത്തിന്‍റെ ക്രെഡിറ്റ്​ അവകാശപ്പെടാനാകും. ആദ്യ ടെസ്റ്റിൽ അഡ്​ലെയ്​ഡിൽ എട്ട്​ വിക്കറ്റിന്​ തോറ്റ ഇന്ത്യ ചരിത്രത്തിലെ ഏറ്റവും ചെറിയ സ്​കോറിന്​ പുറത്തായി (36/9) നാണം കെട്ട ഇടത്ത്​ നിന്നാണ്​ 2020ന്​ മിന്നും വിജയത്തോടെ അവസാനം കുറിച്ചത്​.

ബോക്​സിങ്​ ഡേ ടെസ്റ്റിലെ മികച്ച കളിക്കാരന്​ സമ്മാനിക്കുന്ന മുല്ലാഗ്​ മെഡലിന്​ രഹാനെ അർഹനായി. വിരാട്​ കോഹ്​ലി, രോഹിത്​ ശർമ, ഇശാന്ത്​ ശർമ, മുഹമ്മദ്​ ഷമി എന്നിവരുടെ അസാന്നിധ്യത്തിൽ നേടിയ വിജയം ടീ​മിന്‍റെ ഒത്തിണക്കത്തിന്‍റെ ഫലമാണ്​. മത്സരശേഷം മികച്ച പ്രകടനം കാഴ്ചവെച്ച അരങ്ങേറ്റക്കാരായ ഗില്ലിനെയും ബൗളർ മുഹമ്മദ്​ സിറാജിനെയും രഹാനെ അഭിനന്ദിക്കുന്നുണ്ട്​.