അവന്‍റെ ബാറ്റിങ്​ പൊള്ളാഡിനെ അനുസ്​മരിപ്പിക്കുന്നത്; യുവതാരത്തെ പുകഴ്​ത്തി കുംബ്ലെ

മുംബൈ: ഇന്ത്യൻ പ്രീമിയർ ലീഗിന്‍റെ (ഐ.പി.എൽ) ആവേശത്തിലേക്ക്​ കടക്കുകയാണ്​ ഇന്ത്യൻ കായിക ലോകം. പേരും രൂപവും മാറി കിരീടം ലക്ഷ്യമിട്ടാണ്​ ഇക്കുറി പഞ്ചാബ്​ കിങ്​സിന്‍റെ വരവ്​. ഒരുപിടി യുവതാരങ്ങളെ ടീമിലെത്തിച്ച പഞ്ചാബ്​ ഇതിഹാസ താരം അനിൽ കുംബ്ലെയെ പരിശീലകനാക്കി നിയമിച്ചിരുന്നു.

ഇതിനിടെ തമിഴ്​നാടിന്‍റെ യുവതാരമായ ഷാറൂഖ്​ ഖാനെ വെസ്റ്റിൻഡീസ്​ വെടിക്കെട്ട്​ ബാറ്റ്​സ്​മാൻ കീറൺ പൊള്ളാഡിനോട്​ ഉപമിച്ചിരിക്കുകയാണ്​ കുംബ്ലെ.

പരിമിത ഓവർ ക്രിക്കറ്റിലെ ഏറ്റവും അപകടകാരിയായ ബാറ്റ്​സ്​മാൻമാരിൽ ഒരാളായ പൊളളാഡ്​ നിലവിലെ ജേതാക്കളായ മുംബൈ ഇന്ത്യൻസിന്‍റെ സുപ്രധാന കളിക്കാരനാണ്​. വെടിക്കെട്ട്​ ബാറ്റിങ്ങും പാർട്​ടൈം ബൗളിങ്ങുമായി മത്സരം ഒറ്റക്ക്​ തിരിക്കാൻ കെൽപുള്ള താരമാണ്​ പൊള്ളാഡ്​. പൊള്ളാർഡിന്‍റെ അതേ കളിശൈലിയാണ്​ ഷാറൂഖിനെന്നാണ്​ കുംബ്ലെ പറയുന്നത്​.

'അവൻ (ഷാറൂഖ്​) എന്നെ പൊള്ളാഡിനെ കുറിച്ച്​ ഓർമിപ്പിക്കുന്നു. മുംബൈ ഇന്ത്യൻസിനോടൊപ്പമുണ്ടായിരുന്ന വേളയിൽ നെറ്റ്​സിൽ പൊളളാഡ്​ ആക്രമണകാരിയായിരുന്നു. നെറ്റ്​സിൽ ഇടക്ക്​ പന്തെറിയാറുണ്ടായിരുന്ന ഞാൻ സ്​ട്രൈയിറ്റായി പന്തിനെ പ്രഹരിക്കരുതെന്നായിരുന്നു അവന്​ നൽകിയ ഉപദേശം' -പഞ്ചാബ്​ കിങ്​സ്​ ട്വിറ്ററിൽ പങ്കു​െവച്ച വിഡിയോയിൽ കുംബ്ലെ പറഞ്ഞു.

പ്രായം തളർത്തി തുടങ്ങിയതിനാൽ തന്നെ പഞ്ചാബ്​ നെറ്റ്​സിൽ ഷാറൂഖിനെതിരെ പന്തെറിയുന്നില്ലെന്ന്​ കുംബ്ലെ പറഞ്ഞു.

20 ലക്ഷം രൂപ അടിസ്​ഥാന വിലയിട്ടിരുന്ന ഷാറൂഖിനെ ഫെബ്രുവരിയിൽ നടന്ന മിനി ലേലത്തിൽ 5.25 കോടി രൂപ നൽകിയാണ്​ പഞ്ചാബ്​ സ്വന്തമാക്കിയത്​. ഡൽഹി കാപിറ്റൽസും റോയൽ ചലഞ്ചേഴ്​സ്​ ബാംഗ്ലൂരും ഷാറൂഖിനായി രംഗത്തുണ്ടായിരുന്നു.

സയിദ്​ മുഷ്​താഖ്​ അലി ട്രോഫിയിൽ മിന്നും പ്രകടനം കാഴ്ചവെച്ച ഷാറൂഖ്​ ടീമിന്​ കപ്പ്​ സമ്മാനിക്കുന്നതിൽ നിർണായക പങ്ക്​വഹിച്ചിരുന്നു. ഏപ്രിൽ 12ന്​ മുംബൈ വാങ്കഡെ സ്​റ്റേഡിയത്തിൽ രാജസ്​ഥാൻ റോയൽസിനെതിരെയാണ്​ പഞ്ചാബിന്‍റെ ആദ്യ മത്സരം.