ബംഗ്ല ബാറ്റ്​സ്​മാൻ ക്രീസിൽ​ ചുവടുവെച്ചത്​​ രസിച്ചില്ല; കൊമ്പുകോർത്ത്​ സിംബാബ്​വെ ബൗളർ

ഹരാരെ: ക്രിക്കറ്റ്​ മത്സരത്തിനിടെ കളിക്കാർ പരസ്​പരം കൊമ്പുകോർക്കുന്നത്​ നിത്യ സംഭവമാണ്​. ​പന്ത്​ അതിർത്തി കടത്തിയ ശേഷവും വിക്കറ്റെടുത്ത ശേഷവും ക്യാച്​ എടുത്ത ശേഷവും കളിക്കാർ നൃത്തച്ചുവടുകൾ വെക്കുന്നതും നാം കാണാറുണ്ട്​. എന്നാൽ സിംബാബ്​വെ-ബംഗ്ലാദേശ്​ ടെസ്റ്റ്​ മത്സരത്തിനിടെ ഇവ രണ്ടും ഒരുമിച്ച്​ സംഭവിച്ചു.

രണ്ടാംദിവസം സിംബാബ്​വെ പേസർ ബ്ലെസിങ്​ മുസർബാനിയുടെ പന്ത്​ ബംഗ്ലാദേശിന്‍റെ പത്താം നമ്പർ ബാറ്റ്​സ്​മാനായ തസ്​കീൻ അഹ്മദ് വിജയകരമായി​ പ്രതിരോധിച്ചു. ഷോർട്ട്​ പിച്ച്​ പന്ത്​ പ്രതിരോധിച്ചതിന്​ പിന്നാല തസ്​കിൻ ക്രീസിൽ നിന്ന്​​ ചുവടുവെച്ചു.

ഇത് അത്ര ഇഷ്​ടപ്പെടാതിരുന്ന മുസർബാനി തസ്​കിന്‍റെ അടുത്തെത്തി കൊമ്പുകോർക്കുകയായിരുന്നു. ഇരുവരും വാഗ്വാദത്തിൽ ഏർപെട്ട ശേഷം മുസർബാനി തസ്​കിന്‍റെ ഹെൽമെറ്റിൽ മുഖം ഉരസി. ഐ.സി.സി പെരുമാറ്റച്ചട്ട ലംഘനത്തിന്​ ഇരുവർക്കും പിഴ ലഭിച്ചു. മാച്ച്​ഫീയുടെ 15 ശതമാനമാണ്​ പിഴയായി ഒടുക്കേണ്ടത്​.

ആറിന്​ 132 റൺസ്​ എന്ന നിലയിൽ പതറിയിരുന്ന ബംഗ്ലദേശിനെ നായകൻ മഹ്​മുദുല്ല ലിട്ടൺ ദാസിന്‍റെയും (95) തസ്​കിൻ അഹമദിന്‍റെയും (75) പിന്തുണയോടെ കരകയറ്റിയിരുന്നു. വാലറ്റത്ത്​ പാറപോലെ ഉറച്ച്​ നിന്ന തസ്​കിന്‍റെ പ്രതിരോധമായിരിക്കാം സിംബാബ്​വെ ബൗളറെ പ്രകോപിപ്പിച്ചത്​.

ഒമ്പതാം വിക്കറ്റിൽ മഹ്​മുദുല്ലയും തസ്​കിനും ചേർന്ന്​ 191 റൺസിന്‍റെ കൂട്ടുകെട്ടാണ്​ ഉണ്ടാക്കിയത്​. ആദ്യ ഇന്നിങ്​സിൽ 468 റൺസെടുത്ത ബംഗ്ലദേശ്​ ആതിഥേയരെ 276ന്​ പുറത്താക്കി.