ഇന്ത്യൻ ടീമിൽ ഇടം കിട്ടിയതോടെ അവർ രണ്ടുപേരും കളി മറന്നു -സുനിൽ ഗാവസ്​കർ

ദുബൈ: ഐ.പി.എല്ലിൽ മോശം പ്രകടനം നടത്തുന്ന മുംബൈ ഇന്ത്യൻസിന്‍റെ സൂര്യകുമാർ യാദവിനെയും ഇഷാൻ കിഷനെയും വിമർശിച്ച്​ ക്രിക്കറ്റ്​ ഇതിഹാസം സുനിൽ ഗാവസ്​കർ. ഇരുവരും ഇന്ത്യൻ ടീമിൽ ഇടം കിട്ടിയതോ​െട കളി മറന്നെന്ന്​ സുനിൽ ഗാവസ്​കർ കുറ്റപ്പെടുത്തി.

''ഇഷാൻ കിഷനും സൂര്യകുമാർ യാദവും ഇന്ത്യൻ ടീമിൽ ഇടം കിട്ടിയതോടെ റിലാക്​സ്​ ചെയ്യുകയാണെന്ന്​ തോന്നുന്നു. അങ്ങനെയാണെന്ന്​ പറയുകയല്ല, പക്ഷേ അവരുടെ ചില ഷോട്ടുകൾ കണ്ടാൽ അങ്ങനെ തോന്നും. അവർ രണ്ടുപേരും അത്തരം വലിയ ഷോട്ടുകൾ കളിക്കുന്നത്​ ഇന്ത്യൻ ടീമിൽ സ്ഥാനം കിട്ടിയതുകൊണ്ടാണ്​.

ക്രീസിൽ നിങ്ങളുടേതായ കുറച്ചു സമയം കിട്ടിയാൽ ഷോട്ടുകളുടെ തെരഞ്ഞെടുപ്പ്​ ശരിയാവും. രണ്ടുപേരും ഇക്കുറി അതിന്​ ശ്രമിക്കുന്നില്ല. രണ്ടുപേരുടെയും ഷോട്ട്​ സെലക്ഷൻ ശരിയാകാത്തത്​ കൊണ്ടാണ്​ ഇക്കുറി നിസാരമായി വിക്കറ്റ്​ കളയുന്നത്​'' -ഗാവസ്​കർ സ്റ്റാർ സ്​പോർട്​സ്​ ഷോയിൽ ആരോപിച്ചു.

മുംബൈ ചാമ്പ്യൻമാരായ കഴിഞ്ഞ സീസണിൽ 14 മത്സരങ്ങളിൽ നിന്നും 516 റൺസ്​ അടിച്ചുകൂട്ടിയ ഇഷാൻ കിഷൻ ഈ സീസണിൽ ഇതുവരെ ചേർത്തത്​ വെറും 107 റൺസാണ്​. കഴിഞ്ഞ ഏതാനും സീസണുകളിൽ മികച്ച പ്രകടനം കാഴ്ച വെച്ച സൂര്യകുമാർ യാദവിന്​ ഇതുവരെ 18.50 ശരാശരിയിൽ 222 റൺസ്​ എടുക്കാനേ സാധിച്ചുള്ളൂ. ഇരുവരും ട്വന്‍റി 20 ലോകകപ്പിനുള്ള ഇന്ത്യൻ ടീമിൽ ഉൾപ്പെട്ടിട്ടുണ്ട്​.