ബൗളർമാരും ബെയർസ്​റ്റോയും തകർത്തു; ആദ്യജയത്തിലേക്ക്​ ഉദിച്ചുയർന്ന്​ സൺറൈസേഴ്​സ്​

ചെന്നൈ: ആദ്യം ബൗളർമാരുടെ കൂട്ടായ തിളക്കം. പിന്നാലെ, ജോണി ബെയർസ്​റ്റോയുടെ അപരാജിത പ്രഹരം. പഞ്ചാബ്​ കിങ്​സിന്‍റെ വമ്പിനെ ഒമ്പതു വിക്കറ്റിന്​ തകർക്കാൻ ബൗളിങ്ങും ബാറ്റിങ്ങും ഒരുപോലെ കൂട്ടുനിന്നപ്പോൾ ഐ.പി.എൽ 14ാം സീസണിൽ സൺറൈസഴ്​സ്​ ഹൈദരാബാദിന്​ ആദ്യജയം. ടോസ്​ നേടി ബാറ്റിങ്​ തെരഞ്ഞെടുത്ത പഞ്ചാബിനെ 19.4 ഓവറിൽ 120 റൺസിന്​ ഒാൾഒൗട്ടാക്കിയ ​സൺറൈസഴ്​സ് 18.4 ഓവറിൽ ഒരു വിക്കറ്റ്​ മാത്രം നഷ്​ടത്തിൽ ലക്ഷ്യം കാണുകയായിരുന്നു.

56 പന്തിൽ മൂന്നു വീതം ഫോറും സിക്​സുമടക്കം പുറത്താകാതെ 63 റൺ​സെടുത്ത ബെയർസ്​റ്റോയാണ്​ ഹൈദാരാബാദ്​ ഇന്നിങ്​സിനെ ലക്ഷ്യത്തിലേക്ക്​ നയിച്ചത്​. 37പന്തിൽ മൂന്നു ​േഫാറും ഒരു സിക്​സും ഉൾപെടെ 37റൺസെടുത്ത ഡേവിഡ്​ വാർണറും തിളങ്ങി. ഒന്നാം വിക്കറ്റിൽ ബെയർസ്​റ്റോ-വാർണർ സഖ്യം ജാഗ്രതയോടെ 73 റൺസ്​ ചേർത്തപ്പോൾ സൺറൈസേഴ്​സിന്​ കാര്യങ്ങൾ എളുപ്പമായി. 19 പന്തിൽ പുറത്താകാതെ 16 റൺസെടുത്ത കെയ്​ൻ വില്യംസണായിരുന്നു വിജയലക്ഷ്യം നേടു​േമ്പാൾ ബെയർസ്​റ്റോക്കൊപ്പം ക്രീസിൽ.

നേരത്തേ, നാലോവറിൽ 23 റൺസ്​ വഴങ്ങി മൂന്നു വിക്കറ്റെടുത്ത ഖലീൽ അഹ്​മദും രണ്ടു വിക്കറ്റ്​ വീഴ്​ത്തിയ അഭിഷേക്​ ശർമയുമാണ്​ പഞ്ചാബ്​ ഇന്നിങ്​സിന്‍റെ നടുവൊടിച്ചത്​. ഓരോവിക്കറ്റ്​ വീഴ്​ത്തിയ ഭുവ​േനശ്വർ കുമാർ, സിദ്ധാർഥ്​ കൗൾ, റാഷിദ്​ ഖാൻ എന്നിവർ മികച്ച പിന്തുണ നൽകി.

ഷാറൂഖ്​ ഖാൻ (17 പന്തിൽ 22), മായങ്ക്​ അഗർവാൾ (25പന്തിൽ 22), ക്രിസ്​ ഗെയ്​ൽ (17 പന്തിൽ 15), മോയിസസ്​ ഹെന്‍റിക്വസ്​ (17പന്തിൽ 14), ദീപക്​ ഹൂഡ (11പന്തിൽ 13) എന്നിവർ മാത്രമാണ്​ പഞ്ചാബ നിരയിൽ രണ്ടക്കം കടന്നത്​. ക്യാപ്​റ്റൻ കെ.എൽ. രാഹുൽ (നാല്​), നിക്കോളാസ്​ പൂരാൻ (പൂജ്യം), ഫാബിയൻ അലെൻ (ആറ്​), മുരുഗൻ അശ്വിൻ (ഒമ്പത്​), മുഹമ്മദ്​ ഷമി (മൂന്ന്​) എന്നിവർ എളുപ്പം പുറത്തായി.