ടി20 ലോകകപ്പിൽ നാണക്കേടിന്‍റെ റെക്കോർഡുമായി മിച്ചൽ സ്റ്റാർക്ക്​

ആറ്​ വർഷത്തെ ഇടവേളക്ക്​ ശേഷം ഒരു ഐ.സി.സി കിരീടം നേടിയിരിക്കുകയാണ്​ ആസ്ട്രേലിയ. കന്നി ടി20 ലോകകപ്പെന്ന നേട്ടം ടീം സ്വന്തമാക്കിയപ്പോൾ പ്രധാന പേസറായ മിച്ചൽ സ്റ്റാർക്ക്​ ഇന്നലെ സ്വന്തം പേരിലാക്കിയത്​ ഒരു നാണക്കേടിന്‍റെ റെക്കോർഡാണ്​. ടി20 ലോകകപ്പിലെ ഒരു മത്സരത്തിൽ ഏറ്റവും കൂടുതൽ റൺസ്​ വിട്ടുകൊടുക്കുന്ന ആസ്​ട്രേലിയൻ ബൗളറെന്ന റെക്കോർഡാണ്​ താരത്തിന്‍റെ പേരിലായത്​.

ന്യൂസിലൻഡിനെതിരെ നടന്ന ഫൈനൽ മത്സരത്തിൽ നാലോവറിൽ 60 റൺസായിരുന്നു 31കാരനായ താരം വിട്ടുകൊടുത്തത്​. 4-0-60-0 -ഇങ്ങനെയാണ്​ സ്റ്റാർക്കിന്‍റെ ബൗളിങ്​. നേരത്തെ ഓസീസ്​ ബൗളിങ്​ ഇതിഹാസം ബ്രെറ്റ്​ ലീയുടെ പേരിലായിരുന്നു ഈ റെക്കോർഡ്​. 2009ൽ വെസ്റ്റ്​ ഇൻഡീസിനെതിരായ മത്സരത്തിൽ 56 റൺസായിരുന്നു ലീ വിട്ടുകൊടുത്തത്​.