'അസലായി അസലങ്ക'; ബംഗ്ലദേശിനെ തകർത്ത്​ ശ്രീലങ്ക

ദുബൈ: ഷാർജ ക്രിക്കറ്റ്​ സ്​റ്റേഡിയത്തിൽ തടിച്ചുകൂടിയ ബംഗ്ലാ ആരാധകരെ നിരാശയിലാക്കി ശ്രീലങ്കൻ തേരോട്ടം. ബംഗ്ലദേശ്​ ഉയർത്തിയ 171 റൺസ് വിജയ ലക്ഷ്യം അഞ്ചുവിക്കറ്റ്​​ നഷ്​ടത്തിൽ ശ്രീലങ്ക അനായാസം മറികടക്കുകയായിരുന്നു. അർധ സെഞ്ച്വറിയുമായി മുന്നിൽ നിന്നും നയിച്ച ചരിത്​ അസലങ്കക്കൊപ്പം (49 പന്തിൽ 80 നോട്ടൗട്ട്​) ഭനുക രജപക്​സെയും (31 പന്തിൽ 53) ചേർന്നതോടെ ലങ്കക്കാർ വിജയ ദ്വീപിലണയുകയായിരുന്നു.

വലിയ വിജയലക്ഷ്യം തേടിയിറങ്ങിയ ലങ്കക്ക്​ ആദ്യ ഓവറിൽ തന്നെ കുശാൽ പെരേരയെ നഷ്​ടപ്പെട്ട​ു. തുടർന്ന്​ ലങ്കക്കായി നിസാൻകയും (24) ചരിത്​ അസലങ്കയും ഒത്തുചേരുകയായിരുന്നു. രണ്ടാംവിക്കറ്റിൽ ഇരുവരും ചേർന്ന്​ 69 റൺസ്​ കൂട്ടിച്ചേർത്തു. തുടർന്ന്​ അവിഷ്​ക ഫെർണാണ്ടോ (0), വനിന്ദു ഹസരങ്ക (6) എന്നിവർ വേഗത്തിൽ പുറത്തായതോടെ സമ്മർദത്തിലായ ലങ്കയെ രാജപക്​സെ എടുത്തുയർത്തുകയായിരുന്നു. 79 റൺസിൽ ഒരുമിച്ച അസലങ്ക-രാജപക്​സെ കൂട്ടുകെട്ട്​ വിജയം ഉറപ്പാക്കി. അസലങ്കയെ 63 റൺസിൽ വെച്ചും രജപക്​സെയെ 14 റൺസിൽ വെച്ചും ലിറ്റൺ ദാസ്​ കൈവിട്ടത്​ ബംഗ്ലദേശിന്​ വിനയായി.

ടോസ്​ നഷ്​ടപ്പെട്ട്​ ബാറ്റിങ്ങിനിറങ്ങിയ ബംഗ്ലദേശിനായി ഓംണർ മുഹമ്മദ്​ നയീമും (52 പന്തിൽ 62) മുഷ്​ഫിഖുർ റഹീമുമാണ്​ (37 പന്തിൽ 57 നോട്ടൗട്ട്​) തിളങ്ങിയത്​. ലിറ്റൻദാസ്​ (16), ഷാക്കിബുൽ ഹസൻ (10), അഫീഫ്​ ഹുസൈൻ (7), മഹ്​മുദുല്ലാഹ്​ (10 നോട്ടൗട്ട്​) എന്നിങ്ങനെയാണ്​ മറ്റുള്ളവരുടെ സ്​കോറുകൾ.