ബൗളർമാർ തിളങ്ങി; ത്രില്ലർ പോരിൽ സൺറൈസേഴ്​സിനെ ആറ്​ റൺസിന്​ തകർത്ത്​ ആർ.സി.ബി

ചെന്നൈ: റോയൽ ചല​ഞ്ചേഴ്​സ്​ ബാംഗ്ലൂർ മുന്നോട്ടുവെച്ച 150 റൺസെന്ന വിജയലക്ഷ്യത്തിന്​ ആറ്​ റൺസകലെ വീണ്​​ സൺറൈസേഴ്​സ്​ ​ഹൈദരാബാദ്​. നായകൻ ഡേവിഡ്​ വാർണറും മനീഷ്​ പാണ്ഡെയും മികച്ച തുടക്കം സമ്മാനിച്ചെങ്കിലും അവർ കൂടാരം കയറിയതോടെ ടീം പാടെ തകരുകയായിരുന്നു. സ്​കോർ: ആർ.സി.ബി - 149/8 (20 ഓവർ), എസ്​.ആർ.എച്ച്​ - 143/9(20 ഒാവർ).

ബാംഗ്ലൂർ ബൗളർമാരുടെ കണിശതയോടെയുള്ള പന്തേറാണ്​ എസ്​.ആർ.എച്ചിന്​ വിനയായത്​. ഷഹബാസ്​ അഹമദ്​ രണ്ട്​ ഓവറുകളിൽ ഏഴ്​ റൺസ്​ മാത്രം വഴങ്ങി മൂന്ന്​ വിക്കറ്റുകൾ വീഴ്​ത്തി. മുഹമ്മദ്​ സിറാജും ഹർഷൽ പ​േട്ടലും​ നാലോവറുകളിൽ 25 റൺസ്​ വഴങ്ങി രണ്ട് വീതം​ വിക്കറ്റുകളാണ്​ വീഴ്​ത്തിയത്​.

16ആം ഓവർ വരെ കളി ഹൈദരാബാദിന്‍റെ കൈയ്യിലായിരുന്നു. രണ്ടു വിക്കറ്റിന് 115 റണ്‍സെന്ന ശക്തമായ നിലയിലായിരുന്നു എസ്​.ആർ.എച്ച്​ അപ്പോൾ. എന്നാല്‍ ഷഹബാസിന്‍റെ ഓവറില്‍ ബെയര്‍സ്‌റ്റോ, പാണ്ഡെ, സമദ് എന്നിവര്‍ തുടരെ പുറത്തായതോടെ ടീം പതറാൻ തുടങ്ങുകയായിരുന്നു. തൊട്ടടുത്ത ഓവറിൽ ശങ്കറും കൂടാരം കയറി. 19ആം ഓവറിൽ ഹോൾഡറും 20 ആം ഓവറിൽ റാഷിദ്​, നദീം എന്നിവരും പുറത്തായതോടെ ഹൈദരാബാദിന്‍റെ തോൽവി സമ്പൂർണ്ണമായി.

ഓപണർ വൃദ്ധിമാൻ സാഹ ഒരു റൺസെടുത്ത്​ മടങ്ങിയെങ്കിലും, നായകൻ ഡേവിഡ്​ വാർണറും മനീഷ്​ പാണ്ഡെയും ചേർന്നാണ്​ സൺറൈസേഴ്​സിന്​ മികച്ച തുടക്കം നൽകിയത്​.​ വാർണർ 37 പന്തിൽ 54 റൺസെടുത്തിരുന്നു. ഏഴ്​ ബൗണ്ടറിയും ഒരു സിക്​സുമടങ്ങിയ നായകന്‍റെ ഇന്നിങ്​സ് അവസാനിപ്പിച്ചത്​ കൈൽ ജമീസണായിരുന്നു​. മനീഷ്​ പാണ്ഡെ 39 പന്തിൽ 38 റൺസെടുത്ത്​ ഷഹബാസ്​ അഹമദിന്‍റെ പന്തിൽ ഹർഷൽ പ​േട്ടലിന്​ ക്യാച്ച്​ സമ്മാനിച്ച്​ മടങ്ങി. ശേഷമെത്തിയ ആർക്കും തന്നെ എസ്​.ആർ.എച്ചിന്​ വേണ്ടി കാര്യമായ സംഭാവന നൽകാനായില്ല. വാലറ്റത്ത്​ റാഷിദ്​ ഖാനാണ് (18)​ അൽപ്പമെങ്കിലും ചെറുത്തുനിന്നത്​.

സൺറൈസേഴ്​സ്​ ഹൈദരാബാദിനെതിരെ ടോസ്​ നഷ്​ടമായി ബാറ്റിങ്ങിനിറങ്ങിയ റോയൽ ചലഞ്ചേഴ്​സ്​ ബെംഗളൂരുവിന്​ വേണ്ടി ​ഗ്ലെൻ മാക്​സ്​വെൽ വെടിക്കെട്ട് പ്രകടനമായിരുന്നു നടത്തിയത്​​. 41 ബോളില്‍ അഞ്ചു ബൗണ്ടറികളും മൂന്നു സിക്‌സറുമുള്‍പ്പെടെ 59 റൺസെടുത്ത മാക്​സ്​വെല്ലിന്‍റെ കരുത്തിൽ എട്ട്​ വിക്കറ്റിന്​ 149 റൺസാണ്​ ആർ.സി.ബി അടിച്ചെടുത്തത്​.

ആര്‍സിബി ജഴ്‌സിയില്‍ ആദ്യത്തേതും ഐപിഎല്‍ കരിയറിലെ ഏഴാമത്തെയും ഫിഫ്റ്റി കൂടിയാണ് മാക്‌സ്​വെൽ ഇന്ന്​ നേടിയത്. ആർ.സി.ബിക്ക്​ വേണ്ടി നായകൻ വിരാട്​ കോഹ്​ലി 33 റൺസെടുത്തു. 29 ബോളിൽ നാല്​ ബൗണ്ടറികൾ അടങ്ങുന്നതായിരുന്നു കോഹ്​ലിയുടെ ഇന്നിങ്​സ്​. ടീമിലെ മറ്റാർക്കും കാര്യമായ സംഭാവന നൽകാൻ കഴിഞ്ഞില്ല. മലയാളി താരം ദേവ്​ദത്ത്​ പടിക്കൽ 11 റൺസെടുത്ത്​ പുറത്തായി. കഴിഞ്ഞ കളിയിലെ വെടിക്കെട്ട്​ താരം എബി ഡിവില്ലേഴ്​സ്​ ഒരു റൺസ്​ മാത്രമാണെടുത്തത്​.

മൂന്നു വിക്കറ്റുകളെടുത്ത ജാസണ്‍ ഹോള്‍ഡറാണ് എസ്ആര്‍എച്ച് ബൗളിങ് നിരയിൽ അപകടകാരിയായത്​. റാഷിദ് ഖാന്‍ രണ്ടു വിക്കറ്റുകളെടുത്തു. ഭുവനേശ്വര്‍ കുമാര്‍, ഷഹബാസ് നദീം, ടി നടരാജന്‍ എന്നിവര്‍ ഓരോ വിക്കറ്റുകളും നേടി.