തീതുപ്പി റബാദയും നോകിയയും; ബംഗ്ലദേശിനെ തകർത്തെറിഞ്ഞ്​ ദക്ഷിണാഫ്രിക്ക

അബൂദബി: പേസർമാരായ കഗിസോ റബാദയും ആന്‍റിച്​ നോകിയയും തീതുപ്പിയപ്പോൾ ദക്ഷിണാഫ്രികക്ക്​ എല്ലാം എളുപ്പമായിരുന്നു. ബംഗ്ലദേശിനെ വെറും 86 റൺസിന്​ പുറത്താക്കിയ ദക്ഷിണാഫ്രിക്കൻ സംഘം 13.3 ഓവറിൽ നാലുവിക്കറ്റ്​ നഷ്​ടത്തിൽ വിജയം കണ്ടു. ട്വന്‍റി 20 ലോകകപ്പിലെ തുടർച്ചയായ മൂന്നാം ജയത്തോടെ ദക്ഷിണാഫ്രിക്ക സെമി സാധ്യതകൾ സജീവമാക്കി. ശനിയാഴ്​ച ഇംഗ്ലണ്ടുമായി നടക്കുന്ന മത്സരം വിജയിച്ചാൽ ദക്ഷിണാഫ്രിക്കക്ക്​ സെമി ഏറെക്കുറെ ഉറപ്പിക്കാം. അല്ലാത്ത പക്ഷം ആസ്​ട്രേലിയയുടെ പ്രകടനം അടിസ്ഥാനമാക്കിയായിരിക്കും സെമി സാധ്യതകൾ. നാലുമത്സരങ്ങളും പരാജയപ്പെട്ട ബംഗ്ലദേശിന്​ സാധ്യതകളൊന്നും ബാക്കിയില്ല.

ടോസ്​ നഷ്​ടപ്പെട്ട്​ ബാറ്റിങ്ങിനിറങ്ങിയ ബംഗ്ലദേശിന്‍റെ മുൻനിരയെ റബാദയും വാലറ്റത്തെ നോകിയും ക​ശക്കി എറിയുകയായിരുന്നു.23 റൺസ്​ വഴങ്ങി റബാദ മൂന്നുവിക്കറ്റെടുത്ത നോകിക എട്ടുറൺസ്​ വഴങ്ങി മൂന്നുവിക്കറ്റെടുത്തു.24 റൺസെടുക്കു​​േമ്പാ​ഴേക്കും നയിം, സൗമ്യ സർകാർ, മുഷ്​ഫിഖുർ റഹീം എന്നിവരെ റബാദ കൂടാരം കയറ്റി. തുടർന്നെത്തിയവർക്കും ചെറുത്തുനിൽക്കാനായില്ല. 25 പന്തിൽ 27 റൺസെടുത്ത മെഹ്​ദി ഹസനാണ്​ ബംഗ്ല കടുവയുടെ ടോപ്​സ്​കോറർ.

മറുപടി ബാറ്റിങ്ങിനിറങ്ങിയ ദക്ഷിണാഫ്രിക്ക പതറിയെങ്കിലും അനായാസം വിജയലക്ഷ്യം നേടിയെടുക്കുകയായിരുന്നു. ക്വിന്‍റൺ ഡികോക്ക്​ (16), റീസ ഹെൻട്രിക്​സ്​ (4), ഏയ്​ഡൻ മാർക്രം (0) എന്നിവർ​ വേഗം പുറത്തായി. തുടർന്ന്​ 28 പന്തിൽ 31 റൺസെടുത്ത ടെമ്പ ബവുമയും 27 പന്തിൽ 22 റൺസെടുത്ത വാൻഡർഡസനും ദക്ഷിണാഫ്രിക്കയെ അനായാസം വിജയത്തിലെത്തിക്കുകയായിരുന്നു.