ആ ഇന്ത്യൻ ബാറ്റ്​സ്​മാനെ നേരിടാൻ പ്രയാസമാണെന്ന്​ അക്​തർ​; അത്​ സചിനല്ല, പിന്നെ?

പാക്​ ഫാസ്​റ്റ്​ ബൗളർ ശുഐബ്​ അക്​തറി​െൻറ മിന്നൽ പിണർ കണക്കെയുള്ള പന്തുകളെ നേരിട്ട ഇന്ത്യൻ താരങ്ങൾ നിരവധിയാണ്​. എന്നാൽ തനിക്ക്​ ഏറെ തലവേദന സൃഷ്​ടിച്ച ഒരു ഇന്ത്യൻ ബാറ്റ്​സ്​മാനെ കു​റിച്ച്​ പറയുകയാണ്​ അക്​തർ.

സചിൻ തെണ്ടുൽക്കർ, സൗരവ്​ ഗാംഗുലി, വി.വി.എസ്​ ലക്ഷ്മൺ, എം.എസ്​ ധോണി, ​വീരേന്ദർ സേവാഗ്​ തുടങ്ങി പലരും റാവൽപിണ്ടി എക്​സ്​പ്രസി​െൻറ പന്തിന്​ നേരെ ബാറ്റ്​ പിടിച്ചിട്ടുണ്ട്​. ഇതിൽ പലരു​ം അക്​തറിനെ അനായാസം നേരിട്ടവരാണ്​. എന്നാൽ ഇതിൽ നിന്ന്​ വ്യത്യസ്​തമായ ഒരു പേരാണ് ​അക്​തറിന്​ പറയാനുള്ളത്​.

ത​െൻറ പന്തുകളെ അനായാസം കളിക്കുന്ന, തനിക്ക്​ നേരിടാൻ ബുദ്ധിമുട്ട്​ തോന്നിയ ആ ഇന്ത്യൻ ബാറ്റ്​സ്​മാൻ രാഹുൽ ദ്രാവിഡ്​ ആണെന്നാണ്​ അക്​തർ​ പറയുന്നത്​. ഇന്ത്യൻ നിരയിലെ 'വൻമതിൽ' ആയ രാഹുൽ ദ്രാവിഡിനെ പുറത്താക്കാനുള്ള തന്ത്രങ്ങൾ താനും ശാഹിദ്​ അഫ്രീദിയും ആലോചിച്ചിരുന്നുവെന്നും അക്​തർ പറയുന്നു.

''ദ്രാവിഡിനെ പോലെ കളിക്കുന്ന ബാറ്റ്​സ്​മാനെ പുറത്താക്കാൻ ലെങ്​ത്​ ബോൾ എറിയുകയാണ്​ ചെയ്യാറ്​. ബാറ്റിനും പാഡിനും ഇടയി​ലേക്ക്​ എറിഞ്ഞ്​ പന്ത്​ പാഡിൽ തട്ടിക്കാൻ ശ്രമിക്കുകയാണ്​ ചെയ്യുക.'' അക്​തർ ത​െൻറ യൂ ട്യൂബ്​ ചാനലിൽ ആകാശ്​ ചോപ്രയുമായി നടത്തിയ ചാറ്റ്​ ഷോയിൽ പറഞ്ഞു.

അത്തരത്തിൽ ദ്രാവിഡിനെ പുറത്താക്കാൻ ശ്രമിച്ച സംഭവം അദ്ദേഹം ഓർ​ത്തെടുത്തു. 1999ലെ പെപ്​സി കപ്പ്​ ഫൈനലിലാണ്​ അതെന്ന​ സംശയം അദ്ദേഹം വിഡിയോ വിവരണത്തിൽ പറയുന്നു. ഇന്ത്യ-പാക്​ ഫൈനൽ മത്സരത്തിൽ ഇന്ത്യക്ക്​ ജയിക്കാൻ 292 റൺസ്​ വേണമെന്നിരിക്കെ അജയ്​ ജഡേജയുടെ നേതൃത്വത്തിലുള്ള ഇന്ത്യൻ ടീമി​െൻറ ആദ്യ വിക്കറ്റുകൾ പെ​ട്ടെന്നു തന്നെ നഷ്​ടമായിരുന്നു.

''ബംഗളൂരുവിൽ നടന്ന ആ മത്സരത്തിൽ സചിൻ തെണ്ടുൽക്കർ കളിക്കുന്നില്ലായിരു​ന്നു. സദഗോപൻ രമേശിനെ ഞാൻ വളരെ വേഗം പുറത്താക്കി. ഞങ്ങൾ മൂന്ന്​, നാല്​ വിക്കറ്റുകൾ നേടി നിൽക്കുകയാണ്​. രാഹു​ൽ ദ്രാവിഡ്​ കൂടുതൽ സമയം അപഹരിക്കുമെന്നും ഏതെങ്കിലും പന്ത്​ എറിഞ്ഞ്​ ദ്രാവിഡി​െൻറ വിക്കറ്റെടുത്തില്ലെങ്കിൽ അയാൾ കുറേ നേരം കളിക്കുമെന്നും അഫ്രീദി പറഞ്ഞു.'' -അക്​തർ ഓർത്തെടുത്തു.

''ഞാൻ അദ്ദേഹത്തി​െൻറ പാഡിന്​ എറിഞ്ഞുകൊള്ളിച്ച ശേഷം ഔട്ടിനായി അപ്പീൽ ചെയ്​തു. എന്നാൽ അമ്പയറുടെ തീരുമാനം ഞങ്ങൾക്ക്​ അനുകൂലമല്ലായിരുന്നു​. എന്നാൽ അവസാനം മത്സരം ഞങ്ങൾ വിജയിച്ചു. ദ്രാവിഡ്​ വളരെ ബു​ദ്ധിമു​ട്ടേറിയ, നിശ്ചയദാർഢ്യമുള്ള ബാറ്റ്​സ്​മാനാണ്​. അദ്ദേഹം എനിക്കെതിരെ അനായാസേന കളിക്ക​ും.'' -അക്​തർ പറഞ്ഞു.