20 ലക്ഷം രൂപയും ഐ.പി.എല്ലിലെ വ്യക്തിഗത പുരസ്​കാരങ്ങളും 'മിഷൻ ഓക്​സിജൻ' നൽകി ശിഖർ ധവാൻ

ന്യൂഡൽഹി: 20 ലക്ഷം രൂപയും വ്യക്തിഗത പ്രകടനത്തിന്​ ഈ ഐ.പി.എൽ സീസണിൽ ലഭിക്കുന്ന മുഴുവൻ തുകയും കോവിഡ്​ പ്രതിരോധ പ്രവർത്തനങ്ങൾക്ക്​ സംഭാവന ചെയ്യുന്നതായി ഇന്ത്യൻ ക്രിക്കറ്റ്​ താരം ശിഖർ ധവാൻ. കോവിഡ്​ ബാധിതരെ സഹായിക്കുന്ന 'മിഷൻ ഓക്​സിജനാ​'ണ്​ ധവാൻ സംഭാവന ചെയ്യുന്നത്​​.

ഓക്​സിജൻ കോൺസൺ​ട്രേറ്ററുകൾ ഇറക്കുമതി ചെയ്യാനും അവ ആശുപത്രികൾക്ക്​ വിതരണം ചെയ്യാനുമായി യുവാക്കളായ 250 സംരംഭകർ ചേർന്ന്​ ആരംഭിച്ചതാണ്​ 'മിഷൻ ഓക്​സിജൻ'.

'വളരെ ദുഷ്​കരമായ സാഹചര്യത്തിലൂടെയാണ്​ നാം കടന്നുപോകുന്നത്​. പരസ്​പരം സഹായിക്കാൻ സാധ്യമായതെല്ലാം ചെയ്യേണ്ട സമയമാണിത്​. വർഷങ്ങളായി നിങ്ങളിൽ നിന്നും ലഭിക്കുന്ന സ്​നേഹത്തിനും പിന്തുണക്കും കടപ്പെട്ടവനാണ്​ ഞാൻ. ഇപ്പോൾ എന്‍റെ ജനതക്ക്​ ഞാനത്​ തിരികെ നൽകേണ്ട സമയമാണ്​' -ധവാൻ ട്വിറ്ററിൽ എഴുതി.

'20 ലക്ഷം രൂപയും വ്യക്തിഗത പ്രകടന മികവിന്​ ലഭിക്കുന്ന മുഴുവൻ പുരസ്​കാര തുകയും ഓക്​സിജൻ ലഭ്യത ഉറപ്പാക്കാനുള്ള മിഷൻ ഓക്​സിജന്​ നൽകും' -ധവാൻ പറഞ്ഞു.

വ്യാഴാഴ​്​ച ഇന്ത്യൻ ക്രിക്കറ്റ്​ ഇതിഹാസം സചിൻ ടെണ്ടുൽക്കർ 'മിഷൻ ഓക്​സിജൻ' ഒരു കോടി രൂപ സംഭാവന ചെയ്​തിരുന്നു.

ധവാന്‍റെ ഐ.പി.എൽ ടീമായ ഡൽഹി കാപിറ്റൽസും കോവിഡ്​ പ്രതിരോധ ​പ്രവർത്തനങ്ങളിൽ പങ്കാളിയായി. ടീമിന്‍റെ സഹ ഉടമകളായ ജെ.എസ്​.ഡബ്ല്യു ഗ്രൂപ്പു​ം ജി.എം.ആർ ഗ്രൂപ്പും ഡൽഹി കേന്ദ്രീകരിച്ച്​ പ്രവർത്തിക്കുന്ന സന്നദ്ധ സംഘടനയായ ഉദയ്​ ഫൗണ്ടേഷന്​ ഒന്നര കോടി രൂപ സംഭാവന നൽകിയിരുന്നു.