'മതേതരത്വത്തോടുള്ള പ്രതിബദ്ധതകൊണ്ട്​ ബി.ജെ.പിയുടെ പ്രലോഭനങ്ങളിൽ വീണില്ല'; ക്രിക്കറ്റ്​ താരം മനോജ്​ തിവാരിയെ അഭിനന്ദിച്ച്​ തരൂർ

ന്യൂഡൽഹി: തൃണമൂൽ കോൺഗ്രസിൽ ചേർന്ന ഇന്ത്യൻ ക്രിക്കറ്റ്​ താരം മനോജ്​ തിവാരിയെ അഭിനന്ദിച്ച്​ കോൺഗ്രസ്​ നേതാവ്​ ശശി തരൂർ. മനോജ് തിവാരിയുടെ അഭിമുഖത്തിന്‍റെ ക്ലിപ്​ പങ്കുവെച്ചാണ്​ തരൂരിന്‍റെ അഭിപ്രായ പ്രകടനം.

''മനോജ്​ തിവാരിയുടേത്​ മികച്ച അഭിമുഖമാണ്​. മതേതരത്വത്തോടുള്ള പ്രതിബദ്ധതകൊണ്ട്​ ബി.ജെ.പിയുടെ പ്രലോഭനങ്ങളിൽ വീണില്ലെന്ന്​ അദ്ദേഹം വിശദീകരിക്കുന്നു. ഇന്ത്യയിലെ അധിക ക്രിക്കറ്റ്​ കളിക്കാരും മതത്തിന്‍റെ പേരിൽ വിവേചനങ്ങൾക്ക്​ തുനിയാത്തവരാണ്​. ക്രിക്കറ്റ്​​ ഐക്യം വർധിപ്പിക്കു​േമ്പാൾ ബി.ജെ.പി മതഭ്രാന്തും വിഭജനവും ഉണ്ടാക്കുന്നു.''-ശശി തരൂർ ട്വീറ്റ്​ ചെയ്​തു. അഭിനന്ദനത്തിന്​ ശശിതരൂരിന്​ മനോജ്​ തിവാരി നന്ദിയർപ്പിച്ചു.

മനോജ്​ തിവാരി തൃണമൂൽ കോൺഗ്രസിൽ ഇന്നലെയാണ്​ ചേർന്നത്​. ഇന്ത്യക്കായി 12 ഏകദിനങ്ങളിലും മൂന്ന്​ ട്വന്‍റി 20 കളിലും കളത്തിലിറങ്ങിയ തിവാരി​ ഐ.പി.എല്ലിലൂടെ ക്രിക്കറ്റ്​ പ്രേമികൾക്ക്​ സുപരിചിതനാണ്​. 35കാരനായ താരം ബംഗാളിലെ ഹൗറ സ്വദേശിയാണ്​. വെസ്റ്റ്​ ഇൻഡീസിനെതിരെ നേടിയ 104​ റൺസാണ്​ ഇന്ത്യൻ ജഴ്​സിയിൽ തിവാരിയുടെ ഉയർന്ന സ്​കോർ.

2012ൽ ഐ.പി.എൽ ചാമ്പ്യൻമാരായ കൊൽക്കത്ത നൈറ്റ്​ റൈഡേഴ്​സിൽ നിർണായക സാന്നിധ്യമായിരുന്നു തിവാരി. ഡൽഹി ഡെയർഡെവിൾസ്​, റൈസിങ്​ പുനെ ജയന്‍റ്​സ്​, കിങ്​സ്​ ഇലവൻ പഞ്ചാബ്​ ടീമുകളുടെയും ജഴ്​സി അണിഞ്ഞിട്ടുണ്ട്​. 2015ൽ സിംബാബ്​വെക്കെതിരെയാണ്​ അവസാനം ഇന്ത്യക്കായി കളത്തിലിറങ്ങിയത്​.