ഔട്ട്​ അനുവദിക്കാത്തതിൽ കലി; വിക്കറ്റിൽ ചവിട്ടിയും സ്റ്റമ്പ്​ ഊരി നിലത്തടിച്ചും ഷാക്കിബ്​

ധാക്ക: ഔട്ട്​ അനുവദിക്കാത്ത അമ്പയറിനോടുള്ള ദേഷ്യത്തിൽ വിക്കറ്റിൽ ചവിട്ടിയും സ്​റ്റമ്പുകൾ ഊരി നിലത്തടിച്ചും ബാംഗ്ലാദേശ്​ ക്രിക്കറ്റ് താരത്തിന്‍റെ 'പ്രകടനം'. 2021 ധാക്ക പ്രീമിയർ ലീഗിൽ മുഹമ്മദൻ സ്പോർടിങ് ക്ലബിന്​ വേണ്ടി കളിക്കുന്ന ബംഗ്ലാദേശ്​ താരം ഷാക്കിബ്​ അൽ ഹസൻ ആണ്​ മോശം പെരുമാറ്റത്തിന്‍റെ പേരിൽ വിവാദത്തിലായത്​.

മുഹമ്മദനും അബഹാനി ലിമിറ്റഡും തമ്മിൽ കഴിഞ്ഞ ദിവസം നടന്ന മത്സരത്തിനിടെയായിരുന്നു സംഭവം. ആദ്യം ബാറ്റുചെയ്​ത മുഹമ്മദൻ 20 ഓവറിൽ 145 റൺസെടുത്തു. മറുപടി ബാറ്റിങിനിറങ്ങിയ അബഹാനിക്കെതരെ ഷാക്കിബ്​ ബൗളിങിന്​ എത്തിയപ്പോളായിരുന്നു വിവാദ സംഭവം.

ബാംഗ്ലാദേശ്​ ടീമിൽ ഷാക്കിബിന്‍റെ സഹതാരമായ മുഷ്ഫിഖർ റഹീമായിരുന്നു ക്രീസിൽ. ഒരു പന്തിൽ ഷാക്കിബ് മുഷ്ഫിഖറിനെതിരെ എൽ.ബി.ഡബ്ല്യു ആവശ്യപ്പെട്ട് അപ്പീൽ ചെയ്തു. എന്നാൽ, അമ്പയർ ഔട്ട് അനുവദിച്ചില്ല. വിക്കറ്റിൽ ചവിട്ടിയാണ് ഷാക്കിബ് ഇതിന്‍റെ ദേഷ്യം തീർത്തത്​. അമ്പയറോടു തര്‍ക്കിച്ചുനിന്ന ഷാക്കിബിനെ സഹതാരങ്ങൾ ഓടിയെത്തിയാണ്​ അനുനയിപ്പിച് അൽ ഹസനെ സമാധാനിപ്പിച്ചത്. മത്സരത്തിനിടെ അമ്പയറിനോട്​ തർക്കിച്ച്​ ഷാക്കിബ്​ സ്റ്റമ്പുകൾ വലിച്ചൂരി നിലത്തടിക്കുകയും ചെയ്​തു. രണ്ട്​ സംഭവങ്ങളുടെയും വിഡിയോ വൈറലാണ്​. അതേസമയം, ഷാക്കിബിനെതിരെ ബംഗ്ലദേശ് ക്രിക്കറ്റ് ബോര്‍ഡ് നടപടിയൊന്നും പ്രഖ്യാപിച്ചിട്ടില്ല.

ധാക്ക പ്രീമിയർ ലീഗ് സീസണിൽ ഷാക്കിബിന്‍റെ പ്രകടനം അത്ര മെച്ചമല്ല. ആദ്യ ആറു മത്സരങ്ങളിൽ 73 റൺസ് മാത്രമാണു താരത്തിനു നേടാനായത്. പ്രശ്​നങ്ങളുണ്ടാക്കിയ മത്സരത്തിൽ 27 പന്തിൽനിന്ന് 37 റൺസാണെടുത്തത്​. കഴിഞ്ഞമാസം ശ്രീലങ്കയ്ക്കെതിരെ നടന്ന ഏകദിന പരമ്പരയിലും ഷാക്കിബിന്‍റെ പ്രകടനം മോശമായിരുന്നു.