'ഉറപ്പുള്ള ക്യാപ്​റ്റനായി' സഞ്​ജു; രാജസ്ഥാൻ വിജയ വഴിയിൽ

മുംബൈ: ​നായകനൊത്ത പക്വത ബാറ്റിങ്ങിലും തീരുമാനങ്ങളിലും സഞ്​ജു സാംസൺ പ്രകടിപ്പിച്ചതോടെ രാജസ്ഥാൻ റോയൽസ്​ വീണ്ടും വിജയ വഴിയിൽ. 134 റൺസിന്‍റെ കുഞ്ഞൻ വിജയലക്ഷ്യം പിന്തുടർന്ന രാജസ്ഥാൻ നാലുവിക്കറ്റ്​ നഷ്​ടത്തിൽ 18.5 ഓവറിൽ ലക്ഷ്യത്തിലെത്തി. 41 പന്തിൽ 42 റൺസുമായി പുറത്താകാതെനിന്ന സഞ്​ജു ടീമിന്‍റെ വിജയ റൺസ്​ കുറിച്ചാണ്​ മടങ്ങിയത്​. യശ്വസി ജെയ്​സ്വാൾ (22), ശിവം ദുബെ (22), ഡേവിഡ്​ മില്ലർ (24 നോ​ട്ടൗട്ട്​) എന്നിവരും തങ്ങളുടെ സംഭാവനകളർപ്പിച്ചു. അഞ്ചുകളികളിൽ നിന്നും രാജസ്ഥാന്‍റെ രണ്ടാം ജയവും കൊൽക്കത്തയുടെ നാലാം തോൽവിയുമാണിത്​.

പക്വതയോടെ ക്രീസിലുറച്ച സഞ്​ജു ഒട്ടും തിടുക്കം കാണിക്കാതെയാണ്​ ബാറ്റ്​ ചെയ്​തത്​. രണ്ട്​ ബൗണ്ടറികളും ഒരു സിക്​സറും മാത്രമാണ്​ സഞ്​ജു കുറിച്ചത്​. ടോസ്​ നേടി ഫീൽഡിങ്​ തെരഞ്ഞെടുത്ത സഞ്​ജുവിന്‍റെ തീരുമാനം ശരിവെക്കുന്ന പ്രകടനമായിരുന്നു രാജസ്ഥാൻ ബൗളർമാർ പുറത്തെടുത്തത്​.

എന്നും പഴികേൾപ്പിച്ചിരുന്ന ബൗളിങ്​ നിര തങ്ങളുടെ ജോലി ഉജ്ജ്വലമാക്കിയപ്പോൾ കൊൽക്കത്തക്ക് 9 വിക്കറ്റ്​​ നഷ്​ടത്തിൽ കുറിക്കാനായത്​ 134 റൺസ്​ മാത്രം. കൃത്യമായ ഇടവേളകളിൽ ബൗളിങ്​ ചേഞ്ച്​ നടത്തിയ സഞ്​ജുവിന്‍റെ തീരുമാനം ശരിവെച്ച്​ പന്തെടുത്തവരെല്ലാം തങ്ങളുടെ ജോലി വൃത്തിയായി ചെയ്​തു. കൂടെ ചോരാത്ത കൈകളുമായി ഫീൽഡർമാരും അണിനിരന്നതോടെ കൊൽക്കത്ത ബാറ്റസ്​മാൻക്ക്​ ഒന്നും ചെയ്യാനുണ്ടായിരുന്നില്ല. ക്രിസ്​​ മോറിസ്​ നാലുവിക്കറ്റുകൾ വീഴ്​ത്തിയപ്പോൾ ജയ്​ദേവ്​ ഉനദ്​കട്​, ചേതൻ സിക്കരിയ, മുസ്​തഫിസുർ റഹ്​മാൻ എന്നിവർ ഓരോവിക്കറ്റുകൾ വീഴ്ത്തി​.

കൊൽകത്തക്കായി ശുഭ്​മാൻ ഗില്ലും നിതിഷ്​ റാണയും കരുതലോടെയാണ്​ തുടങ്ങിയത്​. 22 റൺസെടുക്കാൻ റാണ 25 പന്തും ഗിൽ 11 റൺസെടുക്കാൻ 19 പന്തുകളുമാണ്​ നേരിട്ടത്​. പിന്നാലെയെത്തിയവരിൽ ആർക്കും സാഹചര്യത്തിനനുസരിച്ചുള്ള പ്രകടനം പുറത്തെടുക്കാനായില്ല. സുനിൽ നരൈൻ (6), ഇയാൻ മോർഗൻ (0), ദിനേശ്​ കാർത്തിക്​ (25), ആന്ദ്രേ റസൽ (9), പാറ്റ്​ കുമ്മിൻസ്​ (10) എന്നിങ്ങനെയാണ്​ ബാറ്റ്​മാൻമാരുടെ സ്​കോറുകൾ. ഒരു പന്ത്​ പോലും നേരിടാതെയാണ്​ മോർഗൻ റൺഔട്ടായി മടങ്ങിയത്​.