'രണ്ടാം മത്സരം മുതൽ എല്ലാം കൈവിട്ടു; ക്യാപ്​റ്റന്​ ഒളിച്ചോടാനാകില്ല'-ധോണി

ദുബൈ: ഐ.പി.എൽ ചരിത്രത്തിലെ തങ്ങളുടെ ഏറ്റവും മോശം പ്രകടനമാണ്​ ചെന്നൈ സൂപ്പർകിങ്​സ്​ ഇക്കുറി കാഴ്​ചവെച്ചത്​. 11 മത്സരങ്ങളിൽ എട്ടും തോറ്റ ചെന്നൈ പുറത്താകുമെന്ന്​ ഏതാണ്ട്​ ഉറപ്പായി. ചിരവൈരികളായ മുംബൈ ഇന്ത്യൻസിനെതിരെയുള്ള പത്ത്​ വിക്കറ്റ്​ പരാജയത്തിന്​ പിന്നാലെ ടീമി​െൻറ പ്രകടനത്തെക്കുറിച്ച്​ പ്രതികരണവുമായി നായകൻ എം.എസ്​.ധോണിയെത്തി.

''പുഞ്ചിരിച്ച്​ മടങ്ങുന്നതാണ്​ യുവതാരങ്ങൾക്ക്​ വേണ്ടത്​. ഈ പോസിറ്റിവിറ്റി ഞങ്ങൾക്ക്​ ഡ്രസിങ്​ റൂമിലും സൂക്ഷിച്ച്​ അടുത്ത മൂന്നു മത്സരങ്ങളിലൂടെ അഭിമാനമെങ്കിലും വീണ്ടെടുക്കണം. അടുത്ത വർഷത്തെ മുന്നൊരുക്കത്തിനായി യഥാർഥ ചിത്രം ലഭിക്കേണ്ടതുണ്ട്​. ലേല നടപടികൾ, മത്സരവേദി എന്നിവയറിയുകയും യുവതാരങ്ങൾക്ക്​ അവസരം നൽകി അവരുടെ പ്രതിഭ അറിയുകയും ചെയ്യേണ്ടതുണ്ട്​. അടുത്ത മൂന്നുമത്സരങ്ങൾ അടുത്തവർഷത്തേക്കുള്ള മുന്നൈാരുക്കമായാണ്​ കാണുന്നത്​. ക്യാപ്​റ്റനായ എനിക്ക്​ ഒളിച്ചോടാനാകില്ല, അതുകൊണ്ട്​ എല്ലാമത്സരത്തിലും കളിക്കും​''

''ഈ വർഷം ഞങ്ങളുടേതായിരുന്നില്ല. ഈ ടൂർണമെൻറിൽ ഞങ്ങളുടെ സ്ഥാനം വേദനിപ്പിക്കുന്നതാണ്​. രണ്ടാം മത്സരത്തിൽ തുടങ്ങിയ തെറ്റുകളാണ്​ ഈ സ്ഥിതിയെത്തിച്ചത്​. തോൽവിക്ക്​ 100 കാരണങ്ങളുണ്ടെങ്കിലും ഏറ്റവും പ്രധാനപ്പെട്ടതായി കാണുന്നത്​​ നമ്മുടെ യഥാർഥ കഴിവിനനുസരിച്ച്​ കളിച്ചോ എന്നതാണ്​'' -മത്സരശേഷം ധോണി പ്രതികരിച്ചു.

അതിനിടയിൽ ധോണി ഐ.പി.എല്ലിൽ നിന്നും വിരമിച്ചേക്കുമെന്ന അഭ്യൂഹങ്ങളും പരക്കുന്നുണ്ട്​. മത്സരശേഷം ധോണിയുടെ ​േജഴ്​സി എതിർടീമംഗങ്ങൾ ആവ​ശ്യപ്പെടുന്നതും ധോണിയുടെ തന്ത്രങ്ങൾ പിഴക്കുന്നതുമാണ്​ അഭ്യൂഹം പരക്കാൻ കാരണം. 39കാരനായ താരം ഈ വർഷം അന്താരാഷ്​ട്ര മത്സരങ്ങളോട്​ വിടചൊല്ലിയിരുന്നു.