'ഗാംഗുലിയും ദ്രാവിഡും ലോകകപ്പ്​ നേടിയിട്ടില്ല, അവർ മോശം താരങ്ങളാണോ..? കോഹ്​ലിക്ക്​ പിന്തുണയുമായി രവി ശാസ്​ത്രി

മുൻ ഇന്ത്യൻ നായകൻ വിരാട്​ കോഹ്​ലിക്ക്​ പിന്തുണയുമായി രവി ശാസ്​ത്രി രംഗത്ത്​. ഒരു കളിക്കാരനെയോ അയാളുടെ ക്യാപ്റ്റന്‍സിയെയോ ട്രോഫികള്‍ നേടുന്നതി​െൻറ അടിസ്ഥാനത്തിലല്ല വിലയിരുത്തേണ്ടതെന്ന്​ അദ്ദേഹം പറഞ്ഞു. ​അങ്ങനെ നോക്കുകയാണെങ്കിൽ ഗാംഗുലിക്കും ദ്രാവിഡിനും എത്ര ഐ.സി.സി ട്രോഫികളുണ്ടെന്നും കോഹ്​ലിയുടെ നായകത്വത്തിലുള്ള​ ഇന്ത്യൻ ടീമി​െൻറ പരിശീലകനായി ഏറെക്കാലമുണ്ടായിരുന്ന ശാസ്​ത്രി ചോദിച്ചു.

ഇന്ത്യൻ നായകൻ എന്ന നിലയിൽ എല്ലാ ഫോർമാറ്റിലുമായി നിരവധി റെക്കോർഡുകൾ ഉണ്ടായിരുന്നെങ്കിലും ഒരു ഐ.സി.സി കിരീടം പോലും നേടാൻ കഴിഞ്ഞില്ലെന്ന്​​ കാട്ടിയായിരുന്നു വിരാട്​ കോഹ്ലിക്കെതിരെ പലരും വിമർശനമുന്നയിച്ചിരുന്നത്​.

'പല താരങ്ങളും ഇതുവരെ ലോകകപ്പ് നേടിയിട്ടില്ല. സൗരവ് ഗാംഗുലിയും രാഹുല്‍ ദ്രാവിഡും അനില്‍ കുംബ്ലെയും വി.വി.എസ് ലക്ഷ്മണും ലോകകപ്പ് നേടിയിട്ടില്ല. രോഹിത് ശര്‍മക്ക്​ പോലും ഇതുവരെ കപ്പ് നേടാന്‍ സാധിച്ചിട്ടില്ല. അത്​ നേടാത്തത്​ കൊണ്ട്​ ഒരു താരവും മോശക്കാരനാവില്ലെന്നും രവി ശാസ്​ത്രി തുറന്നടിച്ചു. ലോകകപ്പ് നേടിയ നായകന്‍മാര്‍ കപില്‍ ദേവും എം.എസ് ധോണിയും മാത്രമാണെന്നും രവിശാസ്ത്രി പി.ടി.​െഎയോട്​ പറഞ്ഞു.

സചിൻ ടെണ്ടുൽക്കറിന്​ അദ്ദേഹത്തി​െൻറ കരിയറിലെ ആദ്യ ലോകകപ്പ്​ നേടാൻ ആറ്​ ലോകകപ്പുകൾ കാത്തിരിക്കേണ്ടി വന്നിരുന്നു എന്നും അദ്ദേഹം ഒാർമപ്പെടുത്തി. ലോകകപ്പ് നേട്ടമല്ല കാര്യമാക്കേണ്ടത്​, നിങ്ങള്‍ എങ്ങനെ കളിക്കുന്നു, സത്യസന്ധതയോടെയാണോ കളിക്കുന്നത് എന്നതിനെ അടിസ്ഥാനമാക്കിയാണ് നിങ്ങൾ വിലയിരുത്തപ്പെടുന്നത്, അങ്ങനെയായിരിക്കണം ഓരോ കളിക്കാരെയും വിലയിരുത്തേണ്ടതെന്നും അദ്ദേഹം വ്യക്​തമാക്കി.