രാഹുലും ഷമിയും തിളങ്ങി; ദക്ഷിണാഫ്രിക്കയെ 113 റൺസിന്​ തകർത്ത്​ ഇന്ത്യ

സെഞ്ചൂറിയൻ: ബ്രിസ്​ബെയ്​നിലെ ഗാബയിൽ ആസ്​ട്രേലിയൻ കോട്ട തകർത്താണ്​ 2021ന്​ ഇന്ത്യ തുടക്കമിട്ടതെങ്കിൽ വർഷം അവസാനിപ്പിക്കുന്നത്​ ദക്ഷിണാഫ്രിക്കയിലെ സെഞ്ചൂറിയനിൽ ആദ്യ ജയം നേടിക്കൊണ്ട്​. സൂപ്പർ സ്​പോർട്​ പാർക്കിൽ പേസർമാരുടെ കരുത്തിൽ നിറഞ്ഞാടിയ ഇന്ത്യ 113 റൺസി‍െൻറ മികച്ച വിജയവുമായി ദക്ഷിണാഫ്രിക്കൻ മണ്ണിൽ ആദ്യ പരമ്പര ജയമെന്ന മോഹിപ്പിക്കുന്ന നേട്ടത്തിലേക്ക്​ ആദ്യ ചുവടുവെച്ചു. സെഞ്ചൂറിയനിൽ ഇന്ത്യയുടെ കന്നി ടെസ്റ്റ്​ വിജയമാണിത്​.

രാജ്യം കണ്ട ഏറ്റവും മികച്ച പേസ്​ നിരകളിലൊന്നെന്ന്​ വിശേഷിപ്പിക്കാവുന്ന ജസ്​പ്രീത്​ ബുംറ-മുഹമ്മദ്​ ഷമി-മുഹമ്മദ്​ സിറാജ്​ ത്രയത്തിന്‍റെ കരുത്തിൽ ആദ്യ ടെസ്റ്റിലെ രണ്ടു ഇന്നിങ്​സിലും ആതിഥേയരെ 200ന്​ താഴെയൊതുക്കിയാണ്​ വിരാട്​ കോഹ്​ലിയും സംഘവും വിജയമധുരം നുണഞ്ഞത്​.

ആദ്യ ഇന്നിങ്​സിൽ ​പത്തു വിക്കറ്റും പങ്കിട്ട പേസർമാർ രണ്ടാം വട്ടം എട്ടു വിക്കറ്റും വീഴ്ത്തി. സ്​കോർ: ഇന്ത്യ 327, 174. ദക്ഷിണാഫ്രിക്ക 197, 191. ആദ്യ ഇന്നിങ്​സിൽ സെഞ്ച്വറിയുമായി ഇന്ത്യൻ ജയത്തിന്​ അടിത്തറയിട്ട ലോകേഷ്​ രാഹുലാണ്​ കളിയിലെ കേമൻ.

നാലിന്​ 94 എന്ന നിലയിൽ നാലാം ദിനം കളി നിർത്തിയ ദക്ഷിണാഫ്രിക്കക്ക്​ അവസാന ദിനം ജയിക്കാൻ ആറ്​ വിക്കറ്റ്​ കൈയിലി​രിക്കെ 211 റൺസ്​ കൂടി വേണമായിരുന്നു. എന്നാൽ, 97 റൺസിനിടെ ആതിഥേയ പ്രതീക്ഷകൾ തകർത്ത്​​ സന്ദർശകർ വിജയതീരമണഞ്ഞു.

മൂന്നു വിക്കറ്റ്​ വീതം പിഴുത ബുംറയും ഷമിയും രണ്ടു വിക്കറ്റ്​ വീതം നേടിയ സിറാജും രവിചന്ദ്രൻ അശ്വിനുമാണ്​ കളി ഇന്ത്യയുടെ വരുതിയിലാക്കിയത്​. മഴ മൂലം ഒരുദിവസം മുഴുവൻ നഷ്ടമായിട്ടും ജയം നേടാൻ ബൗളർമാരുടെ തകർപ്പൻ പ്രകടനം ഇന്ത്യക്ക്​ തുണയായി.

തലേദിവസം ക്രീസിലുണ്ടായിരുന്ന നായകൻ ഡീൻ എൽഗറിലായിരുന്നു ദക്ഷിണാഫ്രിക്കയുടെ പ്രതീക്ഷ. തെംബ ബവുമക്കൊപ്പം ചേർന്ന്​ എൽഗാർ കുറച്ചുനേരം പിടി​ച്ചുനിന്നെങ്കിലും 130ലെത്തിയപ്പോൾ വീണു. 77 റൺസെടുത്ത ഇടംകൈയ്യനെ ബുംറയാണ്​ വിക്കറ്റിനുമുന്നിൽ കുടുക്കിയത്​. ബവുമയും (35 നോട്ടൗട്ട്​) ക്വിന്‍റൺ ഡികോകും (21) ടീമി‍െൻറ ആയുസ്സ്​​ കുറച്ചുകൂടി നീട്ടിയെങ്കിലും കാര്യമുണ്ടായില്ല.

161ൽ ഡികോക്​ വീണതോടെ ദക്ഷിണാഫ്രിക്ക അതിവേഗം കൂപ്പു​കുത്തി. മൂന്നു ടെസ്റ്റ്​ പരമ്പരയിലെ രണ്ടാം മത്സരം തിങ്കളാഴ്ച ജൊഹാനസ്​ബർഗിൽ തുടങ്ങും.