''വംശീയ അധിക്ഷേപം അംഗീകരിക്കാനാവില്ല, ആസ്​ട്രേലിയൻ കാണികളുടേത്​ തെമ്മാടിത്തരം''

ന്യൂഡൽഹി: ആസ്​ട്രേലിയൻ കാണികളുടെ വംശീയാധിക്ഷേപത്തിനെതിരെ രൂക്ഷമായ പ്രതികരണവുമായി ഇന്ത്യൻ നായകൻ വിരാട്​ കോഹ്​ലി. ഇന്ത്യൻ പേസർമാരായ ജസ്​പ്രീത്​ ബുംറക്കും മുഹമ്മദ്​ സിറാജിനും നേരെ വംശീയ അ​ധിക്ഷേപം നടത്തിയ സാഹചര്യത്തിലാണ്​ കോഹ്​ലിയുടെ പ്രതികരണം.

''വംശീയ അധിക്ഷേപം ഒരുനിലക്കും അംഗീകരിക്കാനാകില്ല. ബൗണ്ടറിലൈനിനരികിൽ പറഞ്ഞതെല്ലാം ദയനീയമായ കാര്യങ്ങളാണ്​. ഇതെല്ലാം തെമ്മാടിത്തരത്തിന്‍റെ കൊടുമുടിയാണ്​. കളിക്കളത്തിൽ ഇങ്ങനെ കാണുന്നതിൽ സങ്കടമുണ്ട്​'' -കോഹ്​ലി ​ട്വീറ്റ്​ ചെയ്​തു.

കുറ്റക്കാർക്കെതിരെ ശക്തമായ നടപടിയണക്കമെന്ന്​ കോഹ്​ലി മറ്റൊരു ട്വീറ്റിലൂടെ ആവശ്യപ്പെട്ടു. സിഡ്​നി​ ടെസ്റ്റിന്‍റെ മൂന്നാം ദിനമായ ശനിയാഴ്​ച ഇന്ത്യൻ പേസർമാരായ മുഹമ്മദ്​ സിറാജിനെയും ജസ്​പ്രീത്​ ബുംറയെയും 'കുരങ്ങനെ'ന്നു വിളിച്ച്​ വേട്ടയാടിയ ഓസീസ്​ കാണികൾക്കെതിരെ ക്രിക്കറ്റ്​ ലോകമൊന്നാകെ തിരിഞ്ഞിട്ടും അവരുടെ ഉള്ളിലെ വംശവെറി വീണ്ടും പുറത്തുചാടുകയായിരുന്നു. ഞായറാഴ്​ച ഓസീസ്​ ഇന്നിങ്​സ്​ ഡിക്ലയർ ചെയ്യുന്നതിന്​ തൊട്ടുമുമ്പായിരുന്നു ഗ്രൗണ്ടിൽ നാടകീയ രംഗങ്ങൾ. 86ാം ഓവർ എറിഞ്ഞ്​ ഡീപ്​ സ്​ക്വയർലെഗിലേക്ക്​ ഫീൽഡിങ്ങിനായി മുഹമ്മദ്​ സിറാജ്​ എത്തിയപ്പോഴാണ്​ ഒരുകൂട്ടം കാണികളുടെ വംശീയത പുറത്തുചാടിയത്​. ​'ബ്രൗൺ ഡോഗ്​, ബിഗ്​ മങ്കി' വിളികൾ ആവർത്തിച്ചതോടെ സിറാജ്​, ക്യാപ്​റ്റൻ അജിൻക്യ രഹാനെയോട്​ പരാതിപ്പെട്ടു.

പിന്നാലെ​ ടീം അംഗങ്ങളെല്ലാം ഓടിയെത്തി. വിഷയത്തിൽ ഇടപെട്ട അമ്പയർമാരും മാച്ച്​ ഒഫിഷ്യലുകളും കാണികളെ സ്​റ്റേഡിയത്തിൽനിന്ന്​ പുറത്താക്കാൻ തീരുമാനിക്കുകയായിരുന്നു. ഗാലറിയിൽ പ്രവേശിച്ച ന്യൂസൗത്ത്​​വെയ്​ൽസ്​ പൊലീസ്​ ആറു പേരെ ഉടൻ കസ്​റ്റഡിയിലെടുത്തു. പൊലീസ്​ കേസിന്​ പുറമെ, ക്രിക്കറ്റ്​ ആസ്​ട്രേലിയ അന്വേഷണം പ്രഖ്യാപിക്കുകയും ചെയ്​തു. കുറ്റക്കാർക്കെതിരെ ശക്തമായ നടപടിയെടുക്കുമെന്ന്​ അധികൃതർ അറിയിച്ചു.

വംശീയാധിക്ഷേപത്തെ അപലപിച്ച്​ രാജ്യാന്തര ക്രിക്കറ്റ്​ കൗൺസിലും രംഗത്തെത്തി. ''ഒരു തരത്തിലുള്ള വിവേചനങ്ങൾക്കും സ്​പോർട്​സിൽ സ്ഥാനമില്ല. ചെറുസംഘം കാണികളുടെ നടപടി ഏറെ ദുഃഖകരമാണ്​. ക്രിക്കറ്റ്​ ആസ്​ട്രേലിയയുടെ അന്വേഷണ റിപ്പോർട്ടി​‍െൻറ അടിസ്ഥാനത്തിൽ കുറ്റക്കാർക്കെതിരെ നടപടി ഉറപ്പാക്കും'' -ഐ.സി.സി ചീഫ്​ എക്​സിക്യൂട്ടിവ്​ മനു സ്വാഹ്​നി അറിയിച്ചു.