'ഈ മാനേജ്​മെൻറി​ന്​ കീഴിൽ ഇനി കളിക്കാനാവില്ല'; 28ാം വയസ്സിൽ പാക്​ താരം മുഹമ്മദ്​ ആമിർ വിരമിച്ചു

ടീം മാനേജ്‌മെൻറുമായുള്ള അഭിപ്രായ വ്യത്യാസത്തെ തുടർന്ന് അന്താരാഷ്​ട്ര ക്രിക്കറ്റിൽനിന്ന് അനിശ്ചിതകാല ഇടവേള എടുക്കുകയാണെന്ന് പാകിസ്​താൻ ഫാസ്​റ്റ്​ ബൗളർ മുഹമ്മദ് ആമിർ. പാകിസ്​താനിലെ സ്വകാര്യ ചാനലിന്​ നൽകിയ വിഡിയോ അഭിമുഖത്തിലാണ്​ താരം വിരമിക്കൽ പ്രഖ്യാപനം നടത്തിയത്​. ലങ്ക പ്രീമിയർ ലീഗി​െൻറ ഭാഗമായി ആമിർ നിലവിൽ ശ്രീലങ്കയിലാണ്​. പാകിസ്​താനിൽ തിരിച്ചെത്തിയാൽ കൂടുതൽ വിവരങ്ങൾ വ്യക്​തമാക്കുമെന്നും താരം പറഞ്ഞു. മാനേജ്മെൻറ്​​ തന്നെ മാനസികമായി പീഡിപ്പി​ച്ചുവെന്നും അവർക്ക്​ കീഴിൽ ഇനി കളിക്കാനാവില്ലെന്നും വിഡിയോയിൽ 28കാരൻ തറപ്പിച്ചു പറയുന്നുണ്ട്​.

അന്താരാഷ്​ട്ര ക്രിക്കറ്റിൽ കളിക്കാൻ ഇനി താൽപ്പര്യമില്ലെന്നും ഭാവിയിൽ ടീമിൽ പരിഗണിക്കേണ്ടതില്ലെന്നും ആമിർ അറിയിച്ചതായി പാകിസ്​താൻ ക്രിക്കറ്റ്​ ബോർഡ്​ പ്രസ്താവനയിൽ പറഞ്ഞു. ഇത്​ അദ്ദേഹത്തി​െൻറ വ്യക്തിപരമായ തീരുമാനമാണെന്നും അത്​ മാനിക്കുന്നുവെന്നും പി.സി.ബി വ്യക്​തമാക്കി. അതേസമയം, കഴിഞ്ഞമാസങ്ങളിൽ നടന്ന ന്യൂസിലൻഡ്​, സിംബാബ്​വെ എന്നിവർക്കെതിരായ പരമ്പരയിലും ആമിറിനെ ഉൾപ്പെടുത്തിയിരുന്നില്ല.

2009ൽ ഇംഗ്ലണ്ടിനെതിരായ ട്വൻറി20 മത്സരത്തിലൂടെയാണ്​ ആമിർ അരങ്ങേറ്റം നടത്തുന്നത്​. എന്നാൽ, 2011ൽ മാച്ച്​ ഫിക്​സിങ്ങിന്​ പിടിയിലായി ജയിലിലടക്കുകയും മത്സരങ്ങളിൽനിന്ന്​ വിലക്കേർപ്പെടുത്തുകയും ചെയ്​തു. 2016ലാണ് വിലക്ക്​ കഴിഞ്ഞ്​ അന്താരാഷ്​​്ട്ര ക്രിക്കറ്റിലേക്ക്​ തിരിച്ചെത്തുന്നത്​.

പിന്നീട്​ മികച്ച ഫോമിൽ പ​ന്തെറിഞ്ഞെങ്കിലും 2019ൽ ടെസ്​റ്റ്​ മത്സരങ്ങളിൽനിന്ന്​ വിരമിക്കുകയുണ്ടായി. വിരമിക്കൽ തീരുമാനം പലരും ​െഞട്ടലോടെയാണ്​ കേട്ടത്​. ഇതിനെതിരെ ഹെഡ് കോച്ച് മിസ്ബഉൾ ഹഖും ബൗളിങ്​ കോച്ച് വഖാർ യൂനിസും ആമിറിനെതിരെ പൊട്ടിത്തെറിച്ചിരുന്നു. പണം മാ​ത്രം മോഹിച്ച്​ ലീഗ് ക്രിക്കറ്റിൽ ​ശ്രദ്ധ കേന്ദ്രീകരിക്കാനാണ്​ ആമിർ ടെസ്​റ്റിൽനിന്ന്​ വിരമിച്ചതെന്നായിരുന്നു വഖാർ​ യൂനിസി​െൻറ ആരോപണം.

147 അന്താരാഷ്​ട്ര മത്സരങ്ങളിൽനിന്നായി 259 വിക്കറ്റുകൾ താരം നേടിയിട്ടുണ്ട്​. 2009ൽ പാകിസ്​താൻ ട്വൻറി20 വേൾഡ്​ കപ്പ്​ നേടു​േമ്പാൾ ആമിർ ടീമിലുണ്ടായിരുന്നു. 2017ലെ ചാമ്പ്യൻസ് ട്രോഫി ടൂർണമെൻറിൽ പാക്​ ബൗളിങ്​ നിരയെ നയിച്ചതും ഈ ഇടങ്കയ്യൻ ബൗളറായിരുന്നു. ഫൈനലിൽ ഇന്ത്യക്കെതിരെ മൂന്ന് വിക്കറ്റുകളാണ്​ നേടിയത്​. കഴിഞ്ഞ വർഷം നടന്ന ലോകകപ്പിൽ 17 വിക്കറ്റും നേടിയിരുന്നു.