'ന്യൂസിലാൻഡിൽ ഭീകരാക്രമണമുണ്ടായപ്പോൾ ഒപ്പം നിന്നവരാണ്​ ഞങ്ങൾ'; പരമ്പര റദ്ദാക്കിയതിൽ കടുത്ത പ്രതിഷേധവുമായി അക്തർ

റാവൽപിണ്ടി​: ഏകദിന മത്സരത്തിന്‍റെ ടോസിടാൻ മിനിറ്റുകൾ മാത്രം ശേഷിക്കെ പാകിസ്​താനുമായുള്ള പരമ്പരയിൽ നിന്ന്​ നാടകീയമായി പിന്മാറിയ ന്യൂസിലാൻഡിന്‍റെ നടപടിയിൽ പ്രതിഷേധവുമായി ശു​ൈഎബ്​ അക്തർ​. സുരക്ഷാ പ്രശ്​നങ്ങളെ തുടർന്നാണ്​ പിന്മാറ്റമെന്നാണ്​ ന്യൂസിലാൻഡിന്‍റെ വിശദീകരണം.

അക്തർ ട്വീറ്റ്​ ചെയ്​തതിങ്ങനെ:

ന്യൂസിലാൻഡ്​ ചില കാര്യങ്ങൾ ഓർക്കണം

-ക്രൈസ്റ്റ്​ ചർച്ച്​ ഭീകരാക്രമണത്തിൽ ഒൻപത്​ പാകിസ്​താനികൾ കൊല്ലപ്പെട്ടിരുന്നു-എന്നിട്ടും പാകിസ്​താൻ ന്യൂസിലാൻഡിനൊപ്പം ശക്തമായി നിലകൊണ്ടു

-കോവിഡ്​ സാഹചര്യം രൂക്ഷമായിട്ടും ന്യൂസിലാൻഡിൽ പാകിസ്​താൻ പര്യടനം നടത്തിയിരുന്നു. ന്യൂസിലാൻഡ്​ അധികൃതരുടെ കർശനമായ പെരുമാറ്റം പരിഗണിക്കാതെയായിരുന്നു അത്​.

ന്യൂസിലാൻഡ്​ പാകിസ്​താൻ ക്രിക്കറ്റിനെ കൊന്നുവെന്നും ദക്ഷിണാഫ്രിക്ക, ബംഗ്ലദേശ്​, വെസ്റ്റ്​ഇൻഡീസ്​, ശ്രീലങ്ക, സിംബാബ്​വെ തുടങ്ങിയ രാജ്യങ്ങൾക്ക്​ സുരക്ഷിതമായി മത്സരങ്ങൾ ഞങ്ങളൊരുക്കിയതാണെന്നും അക്തർ മറ്റു ട്വീറ്റുകളിലൂടെ പറഞ്ഞു.

പരമ്പരക്കായി ടീം പാകിസ്​താനിൽ തുടരില്ലെന്ന്​ ന്യൂസിലാൻഡ്​ ക്രിക്കറ്റ്​ പ്രസ്​താവനയിൽ അറിയിച്ചിരുന്നു. പാകിസ്​താനിൽ മൂന്ന്​ ഏകദിന മത്സരങ്ങളും അഞ്ച്​ ട്വന്‍റി 20 മത്സരങ്ങളും കളിക്കാനാണ്​ ന്യൂസിലാൻഡ്​ എത്തിയത്​.

ന്യൂസിലാൻഡ്​ സർക്കാറിൽ നിന്ന്​ സുരക്ഷാ മുന്നറിയിപ്പ്​ ലഭിച്ചതിനെ തുടർന്നാണ്​ മത്സരത്തിൽ നിന്ന്​ പിന്മാറുന്നതെന്നും ക്രിക്കറ്റ്​ ബോർഡ്​ അറിയിച്ചു. ടീമിന്‍റെ മടങ്ങിപോക്കിനുള്ള സംവിധാനങ്ങൾ ഒരുക്കിയെന്ന്​ ക്രിക്കറ്റ്​ ബോർഡ്​ വ്യക്​തമാക്കിയിട്ടുണ്ട്​. അതേസമയം, ടൂർണമെന്‍റുമായി മുന്നോട്ട്​ പോവാനുള്ള സന്നദ്ധത പാകിസ്​താൻ വ്യക്​തമാക്കി. സന്ദർശക ടീമുകൾക്ക്​ പഴുതുകളില്ലാത്ത സുരക്ഷ ഉറപ്പാക്കുമെന്നും പാകിസ്​താൻ അറിയിച്ചു.

ന്യൂസിലാൻഡ്​ ടീമി​ന്​ എല്ലാവിധ സുരക്ഷയും ഒരുക്കിയിട്ടുണ്ടെന്ന വിവരം പാക്​ പ്രധാനമന്ത്രി ഇംറാൻ ഖാൻ ന്യൂസിലാൻഡ്​ പ്രധാനമന്ത്രി ജസീന്ത ആർഡേനെ അറിയിച്ചുവെന്നും റിപ്പോർട്ടുകളുണ്ട്​. പരമ്പരയിൽ നിന്നും പിന്മാറരുതെന്ന്​ ന്യൂസിലാൻഡ്​ പ്രധാനമന്ത്രിയോട്​ അദ്ദേഹം അഭ്യർഥിച്ചു. ന്യൂസിലാൻഡ്​ ക്രിക്കറ്റ്​ ടീമിനൊപ്പമുള്ള സുരക്ഷാ സംഘം ഒരുക്കങ്ങളിൽ സംതൃപ്​തി പ്രകടിപ്പിച്ചുവെന്ന വിവരവും പാകിസ്​താൻ ചൂണ്ടിക്കാട്ടിയിട്ടുണ്ട്​. അവസാന നിമിഷം ടൂർണമെന്‍റിൽ നിന്നും പിന്മാറുന്നത്​ ക്രിക്കറ്റ്​ ആരാധകർക്ക്​ കടുത്ത നിരാശ നൽകുന്ന തീരുമാനമാണെന്നും പാകിസ്​താൻ ക്രിക്കറ്റ്​ ബോർഡിന്‍റെ പ്രസ്​താവനയിൽ പറയുന്നു.