'ഏതെങ്കിലും മൂന്ന്​ പേരെ വീഴ്​ത്തി സ്റ്റാറായവനല്ല, അവർ മൂവരും ഐ.പി.എല്ലിലെ തമ്പുരാക്കൻമാർ'; ഹർപ്രീതിന്​ ​ൈകയ്യടി

അഹ്​മദാബാദ്​: ഏതെങ്കിലും മൂന്ന്​ പേരെ വീഴ്​ത്തി സ്റ്റാറായവനല്ല അവൻ, അവൻ എറിഞ്ഞിട്ട മൂന്ന്​ പേരും ഐ.പി.എല്ലിലെ തമ്പുരാക്കൻമാരായിരുന്നു. ഇന്ത്യൻ പ്രീമിയർ ലീഗിൽ റോയൽ ചലഞ്ചേഴ്​സ്​ ബാംഗ്ലൂരിനെതിരായ മത്സര ശേഷം പഞ്ചാബ്​ കിങ്​സിന്‍റെ ഹർപ്രീത്​ ബ്രാറിനെ വഴ്​ത്തി സോഷ്യൽ മീഡിയയിൽ പ്രത്യക്ഷപ്പെട്ട മീമിലെ ഉള്ളടക്കമായിരുന്നു ഇത്​​. ബ്ലോക്ക്​ബസ്റ്റർ ചിത്രമായ കെ.ജി.എഫിലെ ഡയലോഗിന്​ സമാനമായ വാക്യം കടമെടുത്ത മീമിലെ ഉള്ളടക്കം സത്യമായിരുന്നുവെന്ന്​ മത്സരം കണ്ടവർക്കറിയാം.

വെറും ഏഴു പന്തിന്‍റെ ഇടവേളയിൽ വിരാട്​ കോഹ്​ലി , എബി ഡിവില്ലിയേഴ്​സ് , ഗ്ലെൻ മക്​സ്​വെൽ എന്നീ ലോകോത്തര ബാറ്റ്​സ്​മാൻമാരെ പുറത്താക്കിയ ഹർപ്രീതാണ്​ ആർ.സി.ബി ബാറ്റിങ്​ നിരയുടെ ന​ട്ടെല്ലൊടിച്ചത്​. സീസണിൽ ഒരേ മത്സരത്തിൽ മൂവരെയും ഒന്നിച്ച്​ പുറത്താക്കുന്ന ആദ്യ ബൗളറാണ് ഇട​ൈങ്കയ്യൻ സ്​പിന്നറായ​ ഹർപ്രീത്​.

11ാം ഓവറിന്‍റെ ആദ്യ പന്തിൽ വിരാട്​ കോഹ്​ലിയെ (35) ബൗൾഡാക്കിയാണ്​ താരം കന്നി ഐ.പി.എൽ വിക്കറ്റ്​ ആഘോഷിച്ചത്​. തൊട്ടടുത്ത പന്തിൽ തന്നെ അപകടകാരിയായ മക്​സ്​വെല്ലിന്‍റെ (0) കുറ്റി തെറുപ്പിച്ചു. 13ാം ഓവറിൽ മടങ്ങിയെത്തിയ ഹർപ്രീത്​ ഒറ്റക്ക്​ മത്സരഗതി നിശ്ചയിക്കുന്ന ഡിവില്ലിയേഴ്​സിനെ (3)​ രാഹുലിന്‍റെ കൈകളിലെത്തിച്ച്​ മത്സരം തങ്ങൾക്ക്​ അനുകൂലമാക്കുകയായിരുന്നു.

നാല്​ ഓവറിൽ 19 റൺസ്​ മാത്രം വിട്ടുകൊടുത്ത പഞ്ചാബ്​ താരം മൂന്ന്​ വിക്കറ്റ്​ വീഴ്​ത്തി കളിയിലെ താരവുമായി മാറി. ഏഴമനായി ഇറങ്ങി പുറത്താകാതെ 25 റൺസ്​ നേടി ബാറ്റിങ്ങിലും തിളങ്ങിയിരുന്നു. 17 പന്തിൽ രണ്ട്​ സിക്​സും ഒരു ബൗണ്ടറിയും സഹിതമാണ്​ താരം ടീമിന്​ നിർണായക സംഭാവന നൽകിയത്​. ഐ.പി.എല്ലിലെ തന്‍റെ നാലാമത്തെ മാത്രം മത്സരത്തിലാണ്​ 25 കാരന്‍റെ സ്വപ്​ന തുല്യമായ പ്രകടനം.

ഹർപ്രീതിന്‍റെ പ്രകടനത്തെ പുകഴ്​ത്തി ക്രിക്കറ്റ്​ താരങ്ങളായ യുവരാജ്​ സിങ്ങും ഹർഭജൻ സിങ്ങും ട്വീറ്റ്​ ചെയ്​തിരുന്നു.

നായകൻ കെ.എൽ. രാഹുലിന്‍റെയും (57 പന്തിൽ 91 നോട്ടൗട്ട്​) ക്രിസ്​ ഗെയ്​ലിന്‍റെയും (24 പന്തിൽ 46) മികവിൽ ആദ്യം ബാറ്റുചെയ്​ത പഞ്ചാബ്​ അഞ്ച്​ വിക്കറ്റ്​ നഷ്​ടത്തിൽ 179 റൺ​സെടുത്തു.

മറുപടി ബാറ്റിങ്ങിനിറങ്ങിയ ബാംഗ്ലൂരിന്​ നിശ്ചിത ഓവറിൽ എട്ടു വിക്കറ്റ്​ നഷ്​ടത്തിൽ 145 റൺസ്​ എടുക്കാനാണ്​ സാധിച്ചത്​. 34 റൺസ്​ വിജയത്തോടെ ഏഴ്​ കളികളിൽ നിന്ന്​ ആറുപോയന്‍റുമായി പഞ്ചാബ്​ പോയന്‍റ്​ പട്ടികയിൽ അഞ്ചാമതെത്തി.