ഇന്ത്യ-പാക് മത്സരം കാണാനെത്തിയ മുംബൈ ക്രിക്കറ്റ് അസോ. പ്രസിഡന്റ് യു.എസിൽ ഹൃദയാഘാതത്തെ തുടർന്ന് മരിച്ചു

ന്യൂയോർക്: ഇന്ത്യ-പാകിസ്താൻ ട്വന്റി20 ലോകകപ്പ് മത്സരം കാണാൻ ന്യൂയോർക്കിലെത്തിയ മുംബൈ ക്രിക്കറ്റ് അസോസിയേഷൻ പ്രസിഡന്റ് അമോൽ കാലെ (47) അന്തരിച്ചു. ഹൃദയാഘാതത്തെ തുടർന്നായിരുന്നു അന്ത്യം. ഞായറാഴ്ച നടന്ന ഇന്ത്യ-പാകിസ്താൻ മത്സരം ക്രിക്കറ്റ് അസോസിയേഷന്‍റെ മറ്റു ഭാരവാഹികൾക്കൊപ്പം കണ്ടതിന് മണിക്കൂറുകൾക്കകമായിരുന്നു മരണം.

2022ൽ മുൻ ഇന്ത്യൻ താരം സന്ദീപ് പാട്ടീലിനെ കീഴടക്കിയാണ് മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫട്നാവിസുമായി അടുപ്പമുള്ള അമോൽ കാലെ മുംബൈ ക്രിക്കറ്റ് അസോസിയേഷന്റെ പ്രസിഡന്റായി തെരഞ്ഞെടുക്കപ്പെടുന്നത്.