ഇതുപോലെ കുറേ ഇസ്​ലാമോഫോബിയക്കാരെ കണ്ടാണ്​ മുഈൻ വളർന്നത്​; അവനാരാണെന്ന്​ ക്രിക്കറ്റ്​ ലോകത്തിനറിയാം -തസ്​ലീമക്കെതിരെ മുഈൻ അലിയുടെ പിതാവ്​

ലണ്ടർ: എഴുത്തുകാരി തസ്​ലീമ നസ്​റീന്‍റെ പരാമർശം വേദനിപ്പിച്ചെന്നും ഞെട്ടിക്കുന്നതാണെന്നും ഇംഗ്ലീഷ്​ ക്രിക്കറ്റ്​ താരം മുഈൻ അലിയുടെ പിതാവ്​ മുനീർ അലി. ക്രിക്കറ്റ്​ താരമായില്ലായിരുന്നെങ്കിൽ മുഈൻ അലി സിറിയയിൽ പോയി ഐ.എസ്​.ഐ.എസിൽ ചേർന്നേനെ എന്നായിരുന്നു തസ്​ലീമ നസ്​റിന്‍റെ ട്വീറ്റ്​.

''മൗലികവാദത്തിനെതിരെ നിലനിൽക്കുന്നുവെന്ന്​ പറയപ്പെടുന്നയാളായ തസ്​ലീമ നസ്​റിൻ കണ്ണാടിയിൽ നോക്കിയാൽ യഥാർഥ മൗലിക വാദിയെ കാണാം. തസ്​ലീമ നസ്​റി​​േന്‍റത്​ ശുദ്ധമായ ഇസ്​ലാംഭീതിയാണ്​. എന്നെങ്കിലും അവളെ നേരിൽ കാണു​േമ്പാൾ പറയാനുള്ളത്​ മുഖത്ത്​ നോക്കി പറയും. അവരുടെ അജൻഡക്കായി എന്തിനാണ്​ എന്‍റെ മകനെ ഉപയോഗപ്പെടുത്തുന്നത്​ എന്നറിയില്ല. മുഈൻ എങ്ങനെയുള്ള വ്യക്തിത്വമാണെന്ന്​ ക്രിക്കറ്റ്​ ലോകത്തിനറിായം''.

''എന്‍റെ പിതാവ്​ പാക്​ അധീന കാശ്​മീരിൽ നിന്നും യു.കെയിലേക്ക്​ കുടിയേറിതാണ്​. എന്‍റെ അമ്മ ഇംഗ്ലീഷുകാരിയാണ്​. തസ്​ലീമയെപ്പോലെ ഒരുപാട്​ പേരെ ജീവിതത്തിൽ ഞാൻ കണ്ടിട്ടുണ്ട്​്​. ചിലർ മുഈനെതിരെ റാലി നടത്തിയിരുന്നു. ഒരിക്കൽ മുഈൻ ബാറ്റുചെയ്യാനിറങ്ങിയപ്പോൾ 'താടി വടിക്കെടാ' എന്ന്​ ഒരാൾ അലറി വിളിച്ചത്​ എനിക്കോർമയുണ്ട്​. ചിലപ്പോൾ പരിശീലകർവരെ അവനോട്​ പറഞ്ഞിട്ടുണ്ട്​. ഇത്​ ഇംഗ്ലണ്ടാണ്​. മറ്റുള്ളവർ താടിയെക്കുറിച്ച്​ എന്ത്​ വിചാരിക്കുമെന്ന്​. ഒരിക്കൽ ഒരു ഇന്ത്യൻ പരിശീലകൻ താടി വടിക്കണമെന്ന്​ പറഞ്ഞപ്പോൾ ഞാൻ വേണമെങ്കിൽ ക്രിക്കറ്റിൽ നിന്നും ഇന്ന്​ തന്നെ വിരമിക്കാം, പക്ഷേ എന്‍റെ വിശ്വാസത്തിൽ നിന്നും വിരമിക്കില്ല എന്നായിരുന്നു മുഈൻ അലിയുടെ മറുപടി. ഇംഗ്ലീഷ്​ ക്രിക്കറ്റ് ഇപ്പോൾ​ നന്നായി മാറി. ഇപ്പോൾ എല്ലാവരും മുഈനെ സ്നേഹിക്കുകയും ബഹുമാനിക്കുകയും ചെയ്യുന്നുണ്ട്​.'' -മുനീർ അലി പറഞ്ഞു. താൻ ഒരു പരമ്പരാഗത മതവിശ്വാസി അല്ലെന്നും മുനീർ കൂട്ടിച്ചേർത്തു.

തസ്​ലീമ നസ്​റിന്‍റെ പരാമർശത്തിനെതിരെ ഇംഗ്ലീഷ്​ ക്രിക്കറ്റ്​ താരങ്ങളായ ജോഫ്ര ആർച്ചർ, സാം ബില്ലിങ്​സ്​, മുൻ താരം റ്യാൻ സെഡ്​ബോട്ടം അടക്കമുള്ളവർ രംഗത്തുവന്നിരുന്നു. ബാറ്റിങ്ങിലും ബൗളിങ്ങിലും തിളങ്ങുന്ന മുഈൻ അലിയെ ഏഴുകോടി രൂപക്ക്​ ചെന്നൈ സൂപ്പർകിങ്​സ്​ ടീം സ്വന്തമാക്കിയിരുന്നു.