അസ്​ഹറിന്‍റെ തകർപ്പൻ ഇന്നിങ്​സിനിടയിൽ ആസിഫിന്‍റെ മാരക ബൗളിങ്​ മുക്കിക്കളയല്ലേ...

സയ്യിദ്​ മുഷ്​താഖ്​ അലി ട്രോഫിയിൽ കരുത്തരായ മുംബൈയെ സ്വന്തം തട്ടകമായ വാംഖഡെയിൽ കേരളം തകർത്തപ്പോൾ താരമായത്​ മുഹമ്മദ്​ അസ്​ഹറുദ്ദീനാണ്​. 54 പന്തിൽ 137 റൺസെടുത്ത അസഹറുദ്ദീനൊപ്പം വാഴ്​ത്തപ്പെടേണ്ട മറ്റൊരു പേര്​ കൂടിയുണ്ട്​. മലപ്പുറം എടവണ്ണക്കാരൻ കെ.എം. ആസിഫാണത്​.

ബൗളർമാരുടെ ശവപ്പറമ്പായി മാറിയ വാംഖഡെയിൽ ഇരുടീമുകളിലുമായി പന്തെറിഞ്ഞ 11പേരിൽ ഏറ്റവും കുറഞ്ഞ ഇക്കണോമിയിൽ ബൗൾ ചെയ്​തത്​ കെ.എം ആസിഫാണ്​. നാലോവറിൽ വെറും 25 റൺസ്​ മാത്രം വഴങ്ങിയ ആസിഫ്​ മുന്നുവിക്കറ്റുകളും വീഴ്​ത്തി. അതിൽ തന്നെ രണ്ടെണ്ണം ക്ലീൻ ബൗൾഡുമായിരുന്നു.

ശ്രീശാന്തും നിതീഷും ബേസിൽ തമ്പിയുമടക്കമുള്ള ബൗളർമാർ വയറുനിറയെ തല്ലുവാങ്ങിയപ്പോഴും വരിഞ്ഞുമുറുക്കിയ ആസിഫാണ്​ മുംബൈ സ്​കോർ 200 കടത്താതിരുന്നത്​. 34 റൺസിന്​ മുന്ന്​ വിക്കറ്റെടുത്ത ജലജ്​ സക്​സേനയും കേരളത്തിനായി തിളങ്ങി.

27 കാരനായ ആസിഫ്​ ഐ.പി.എല്ലിൽ ചെന്നൈ സൂപ്പർകിങ്​സ്​ ടീമംഗമാണ്​. 2018ൽ 40 ലക്ഷം രൂപക്കാണ്​ ചെന്നൈ ആസിഫിനെ സ്വന്തമാക്കിയത്​. 2018 സീസണിൽ രണ്ട്​ മത്സരം കളിച്ചതൊഴിച്ചാൽ ആസിഫിന്​ ഐ.പി.എല്ലിൽ അധികം മേൽവിലാസമുണ്ടാക്കാനായിട്ടില്ല. കേരളത്തിനായി മികച്ച പ്രകടനം നടത്തി സെലക്​ടർമാരുടെ കണ്ണിൽ ഇടംനേടാനാകും ആസിഫിന്‍റെ ​ശ്രമം.