ഇർഫാൻ പത്താനും കോവിഡ്​​; രോഗം ബാധിക്കുന്ന ഇന്ത്യൻ ലെജൻഡ്​സിലെ നാലാമത്തെ താരം

ബറോഡ: സഹോദരൻ യൂസുഫ്​ പത്താന്​ പിന്നാലെ, മുൻ ഇന്ത്യൻ ക്രിക്കറ്റ്​ താരം ഇർഫാൻ പത്താനും കോവിഡ്​ സ്ഥിരീകരിച്ചു. കൊവിഡ് പോസിറ്റീവായ വിവരം ഇർഫാൻ ട്വിറ്ററിലൂടെയാണ് പുറംലോകത്തെ അറിയിച്ചത്​. തനിക്ക് രോഗലക്ഷണങ്ങളൊന്നും ഇല്ലെന്നും വീട്ടിൽ ക്വാറന്‍റീനിലാണെന്നും താരം കുറിച്ചു. താനുമായി സമ്പര്‍ക്കത്തിലേര്‍പ്പെട്ട എല്ലാവരും ഉടന്‍ കോവിഡ് പരിശോധന നടത്തണമെന്നും ഇർഫാൻ അഭ്യര്‍ത്ഥിച്ചിട്ടുണ്ട്​.

pic.twitter.com/4E7agmuQl1

— Irfan Pathan (@IrfanPathan) March 29, 2021

ഇന്ത്യൻ ലെജൻഡ്​സ്​ കിരീടം നേടിയ റോഡ്​ സേഫ്​റ്റി സീരീസിൽ പ​ങ്കെടുത്ത നാലാമത്തെ താരത്തിനാണ്​ കോവിഡ്​ ബാധിച്ചിരിക്കുന്നത്​. നേരത്തെ, നായകൻ സചിൻ ടെണ്ടുൽക്കർക്കും എസ്​ ബദരീനാഥിനും യൂസുഫ്​ പത്താനും പോസിറ്റീവായതായി അറിയിച്ചിരുന്നു. യുവരാജ് സിങ്, വീരേന്ദര്‍ സെവാഗ്, മുഹമ്മദ് കൈഫ്, മുനാഫ് പട്ടേല്‍, മന്‍പ്രീത് ഗോണി, പ്രഗ്യാന്‍ ഓജ എന്നിവരും സീരീസിൽ ഇന്ത്യക്കായി കളിച്ചിരുന്നു. കാണികളെ അനുവദിച്ച് കൊണ്ടായിരുന്നു ടൂർണമെന്‍റ്​ സംഘടിപ്പിച്ചത്​.