ലോകകപ്പ്​ ടീമിലെടുത്തത്​ ഓപണറായെന്ന്​ ​കിഷനോട്​ കോഹ്​ലി; സീസണി​ലെ വേഗമേറി ഫിഫ്​റ്റിയുമായി കളംനിറഞ്ഞ്​ താരം

അബൂദബി: ട്വന്‍റി20 ലോകകപ്പിന്‍റെ തൊട്ടുമുമ്പ്​ നടക്കുന്ന ഐ.പി.എല്ലിൽ മുംബൈ ഇന്ത്യൻസ്​ താരങ്ങളായ ഇഷാൻ കിഷന്‍റെയും സൂര്യകുമാർ യാദവിന്‍റെയും ഫോമിനെ ചൊല്ലി ആകുലതപ്പെട്ടവർ നിരവധിയാണ്​. എന്നാൽ ലീഗ്​ റൗണ്ടിന്‍റെ അവസാന മത്സരങ്ങളിൽ കത്തിക്കയറി കിഷനും സൂര്യകുമാറും വിമർശകരുടെ വായടപ്പിച്ചിരിക്കുകയാണ്​. സൺറൈസേഴ്​സ്​ ഹൈദരാബാദിനെതിരായ മത്സരത്തിൽ 16 പന്തിൽ അർധശതകം തികച്ച കിഷൻ സീസണിലെ വേഗമേറിയ ഫിഫ്​റ്റി സ്വന്തം പേരിലാക്കി.

ഇപ്പോൾ ട്വന്‍റി20 ലോകകപ്പിലെ കിഷന്‍റെ റോൾ വ്യക്തമാക്കിയിരിക്കുകയാണ്​ ക്യാപ്​റ്റൻ വിരാട്​ കോഹ്​ലി. ഓപണറുടെ റോളിലേക്കാണ്​ തന്നെ കോഹ്​ലി കണ്ടുവെച്ചിരിക്കുന്നതെന്ന്​ കിഷൻ പറഞ്ഞു.

'ഞാൻ വിരാട് ഭായിയുമായി സംസാരിച്ചു. ജസ്പ്രീത് ഭായിയും എന്നെ സഹായിച്ചു. പാണ്ഡ്യ സഹോദരൻമാരും എന്നെ പിന്തുണക്കാനുണ്ടായിരുന്നു. കാര്യങ്ങൾ ഗ്രഹിച്ചുകൊണ്ടിരിക്കുന്ന സമയമാണിതെന്നും ഇവിടെ വെച്ച്​ പഠിച്ചെടുക്കണമെന്നും തെറ്റുകൾ ലോകകപ്പിൽ ആവർത്തിക്കരുതെന്നും അവർ പറഞ്ഞു. അതായിരുന്നു അവരിൽ നിന്ന്​ ഞാൻ പഠിച്ചത്​. ഓപ്പണറായാണ്​ നിന്നെ തെരഞ്ഞെടുത്തതെന്നും അതിന് തയാറായിരിക്കണമെന്നും വിരാട്​ ഭായ്​ പറഞ്ഞു. വലിയ വേദിയിൽ എല്ലാ സാഹചര്യങ്ങൾക്കും തയാറായിരിക്കണമെന്നായിരുന്നു അദ്ദേഹം പറഞ്ഞത്' -കിഷൻ പറഞ്ഞു​.

അവസാന ലീഗ്​ മത്സരത്തിൽ 43 റൺസിന്​ വിജയിച്ചെങ്കിലും മുംബൈ ഇന്ത്യൻസിന്​ ഐ.പി.എൽ പ്ലേഓഫിൽ ഇടംനേടാൻ സാധിച്ചിരുന്നില്ല.

32 പന്തിൽ 84 റൺസെടുത്ത കിഷന്‍റെയും 40 പന്തിൽ 82റൺസെടുത്ത സൂര്യകുമാറിന്‍റെയും മികവിൽ മുംബൈ ഒമ്പത്​ വിക്കറ്റ്​ നഷ്​ടത്തിൽ 235 റൺസ്​ പടുത്തുയർത്തിയിരുന്നു. ഹൈദരാബാദിന്‍റെ മറുപടി 20 ഓവറിൽ എട്ടിന്​ 193ൽ അവസാനിച്ചു. നെറ്റ്​റൺറേറ്റിന്‍റെ അടിസ്​ഥാനത്തിൽ മുംബൈയെ പിന്തള്ളി കൊൽക്കത്ത നൈറ്റ്​റൈഡേഴ്​സാണ്​ ​പ്ലേഓഫിലെത്തിയത്​.