കോവിഡോ അതെന്താ?; ഐ.പി.എൽ യു.എ.ഇയിലേക്ക്​ മാറ്റാൻ കാരണം 'മഴ'യാണെന്ന്​ ബി.സി.സി.ഐ

ന്യൂഡൽഹി: സെപ്​തംബറിൽ ഇന്ത്യയിൽ മഴക്കാലമായതിനാലാണ്​ ഐ.പി.എൽ യു.എ.ഇയിലേക്ക്​ മാറ്റുന്നതെന്ന്​ ഇന്ത്യൻ ക്രിക്കറ്റ്​ കൺട്രോൾ ബോർഡ്​. ബി.സി.സി.ഐ ​സെക്രട്ടറി ജെയ്​ഷായുടെ പേരിൽ ശനിയാഴ്​ച പുറത്തിറക്കിയ പ്രസ്​താവനയിലാണ്​ ഇക്കാര്യം പറയുന്നത്​. കോവിഡ്​ എന്നൊരു വാക്ക്​ പോലും പ്രസ്​താവനയിൽ ഉൾപെടുത്താതിരിക്കാനും ​ശ്രദ്ധിച്ചിട്ടുണ്ട്​. ഇന്ത്യയിൽ കോവിഡ്​ രൂക്ഷമായതിനെ തുടർന്ന്​ പല താരങ്ങളും പിൻവാങ്ങി​യതോടെയാണ്​ കഴിഞ്ഞ മാസം ഐ.പി.എൽ പാതിവഴിയിൽ നിർത്തേണ്ടി വന്നത്​.

കോവിഡ്​ രൂക്ഷത കൊണ്ടാണ്​ മാറ്റുന്നതെന്ന്​ ഔദ്യോഗികമായി അറിയിക്കാത്ത്​ രാഷ്​ട്രീയ കാരണങ്ങൾ കൊണ്ടാണെന്നാണ്​ ആരോപണമുയരുന്നുണ്ട്. ആര്​ പിൻമാറിയാലും ടൂർണമെൻറ്​ തുടരുമെന്ന്​ ആദ്യം പറഞ്ഞ ബി.സി.സി.ഐ പിന്നീട്​ തീരുമാനം മാറ്റുകയായിരുന്നു. സെപ്​റ്റംബറിൽ ഇന്ത്യയിൽ നടത്തിയാലും വിദേശ താരങ്ങൾ എത്താൻ സാധ്യത കുറവായതിനാലാണ്​ യു.എ.ഇയിലേക്ക്​ മാറ്റിയത്​ എന്നതാണ്​ യാഥാർഥ്യം. മത്സരം യു.എ.ഇയിലാണെങ്കിൽ കളിക്കാൻ തയാറാണെന്ന്​ പല താരങ്ങളും അറിയിച്ചിരുന്നു. ഇന്ത്യയിലെ ഓക്​സിൻ ലഭ്യതക്കുറവിനെക്കുറിച്ചും രൂക്ഷമായ സ്ഥിതിഗതികളെക്കുറിച്ചും വിദേശതാരങ്ങളക്കം തുറന്നടിച്ചിരുന്നു.

ഐ.പി.എല്ലിലെ ബാക്കി മത്സരങ്ങൾ യു.എ.ഇയിൽ തന്നെ നടത്തുമെന്ന്​ ഇന്ന്​ ബി.​സി.സി.ഐ അറിയിച്ചിരുന്നു.ബി.സി.​സി.ഐയും ഐ.പി.എൽ ഗവേണിങ്​ കൗൺസിലും ചേർന്നാണ്​ ഇത്തരമൊരു തീരുമാനമെടുത്തത്​. സെപ്​റ്റംബർ 19 മുതൽ ഒക്​ടോബർ 10 വരെയായിരിക്കും യു.എ.ഇയിൽ മത്സരങ്ങൾ നടക്കുക. 31 മത്സരങ്ങളാണ്​ ഇനി ഐ.പി.എല്ലിൽ നടക്കാനുള്ളത്​.