'എന്‍റെ മാർഗദീപം, എന്നുമെന്‍റെ സ്​നേഹം' - ഇന്ത്യന്‍ വനിത ക്രിക്കറ്റ് താരം പ്രിയ പുനിയയുടെ മാതാവ് കോവിഡ് ബാധിച്ച് മരിച്ചു

ന്യൂഡല്‍ഹി: ഇന്ത്യന്‍ വനിത ക്രിക്കറ്റ് താരം പ്രിയ പുനിയയുടെ മാതാവ് കോവിഡ് ബാധിച്ച് മരിച്ചു. ചൊവ്വാഴ്ചയായിരുന്നു അന്ത്യം. സോഷ്യല്‍ മീഡിയയിൽ പോസ്റ്റ്​ ചെയ്​ത വികാരനിർഭരമായ കുറിപ്പിലൂടെയാണ്​ പ്രിയ മാതാവിന്‍റെ മരണ വിവരം പങ്കുവെച്ചത്​.

'കരുത്തുള്ളവളായിരിക്കണം എന്ന്​ എപ്പോളും നിങ്ങൾ പറയുമായിരുന്നതിന്‍റെ കാരണം എന്തായിരുന്നു എന്ന്​ ഇന്ന്​ ഞാൻ തിരിച്ചറിയുന്നു. നിങ്ങളുടെ നഷ്​ടം സഹിക്കാനും മാത്രം കരുത്തുള്ളവളായി ഞാനൊരിക്കൽ മാറേണ്ടി വരുമെന്ന്​ നിങ്ങൾക്കറിയാമായിരുന്നു. നിങ്ങളെ വല്ലാതെ മിസ്സ്​ ചെയ്യുന്നു, അമ്മ.... എത്ര അകലെയാണെങ്കിലും നിങ്ങൾ എന്നും എനിക്കൊപ്പമുണ്ടാകും എന്നറിയാം. എന്‍റെ മാർഗദീപമേ, എന്‍റെ അ​മ്മേ, എന്നും നിങ്ങളെ ഞാൻ സ്​നേഹിക്കുന്നു. ജീവിതത്തിലെ ചില യാഥാർഥ്യങ്ങൾ ഉൾക്കൊള്ളാൻ വളരെ ബുദ്ധിമുട്ടാണ്​. നിങ്ങളുടെ ഓർമ്മകൾ ഒരിക്കലും മറക്കുകയില്ല. ശാന്തമായി ഉറങ്ങുക, അമ്മേ...'- പ്രിയ ഇൻസ്റ്റഗ്രാമിൽ കുറിച്ചു.

കോവിഡ്​ നിയമങ്ങൾ പാലിക്കുകയും മുൻകരുതലുകൾ എടുക്കുകയും വേണമെന്നും പ്രിയ ഓർമിപ്പിച്ചു. 'ഈ വൈറസ്​ ഏറെ അപകടകാരിയാണ്​. മാസ്​ക്​ ധരിക്കൂ, സാമൂഹിക അകലം പാലിക്കൂ, സുരക്ഷിതരായിരിക്കൂ, ശക്​തരായിരിക്കൂ' - പ്രിയ പുനിയ കുറിച്ചു. ഇന്ത്യന്‍ വനിത ക്രിക്കറ്റ് ടീമിൽ 2019 ​ഫെബ്രുവരിയിൽ അരങ്ങേറ്റം കുറിച്ച ഇതുവരെ ഏഴ്​ ഏകദിനങ്ങളും മൂന്ന്​ ട്വന്‍റി20യും കളിച്ചിട്ടുണ്ട്​. ഇംഗ്ലണ്ട് പര്യടനത്തിനായി തെരഞ്ഞെടുക്കപ്പെട്ടിട്ടുണ്ട്​.