ഇന്ത്യയെ രക്ഷിക്കാൻ മഴയുമെത്തിയില്ല; ലോക ടെസ്​റ്റ്​ കിരീടം ന്യൂസിലാൻഡിന്​

സതാംപ്​ടൺ: മഴയും വെളിച്ചക്കുറവും ഇരുൾ വീഴ്​ത്തിയ ലോക ടെസ്​റ്റ്​ ചാമ്പ്യൻഷിപ്പ്​ ഫൈനലി​െൻറ റിസർവ്​ ദിനം ന്യൂസിലാൻഡിന്​ ചരിത്രമെഴുതാനുള്ളതായിരുന്നു. ഇന്ത്യയെ എട്ടു വിക്കറ്റിന്​ ​തകർത്തെറിഞ്ഞാണ്​ കിവികൾ പ്രഥമ ലോക ടെസ്​റ്റ്​ ചാമ്പ്യൻഷിപ്പ്​ കിരീടത്തിൽ മുത്തമിട്ടത്​. ബാറ്റിങ്ങിൽ അ​േമ്പ പരാജയമായ ഇന്ത്യയെ രക്ഷിക്കാൻ വിസ്​മയ പ്രകടനവുമായി ബൗളർമാരോ തിമിർത്ത്​ പെയ്യാൻ മഴയോ എത്തിയില്ല. 2015, 2019 ​ഏകദിന ലോകകപ്പുകളിൽ ഫൈനലിൽ കിരീടം കൈവിട്ട ന്യൂസിലാൻഡിന്​​ ഇത്​ അഭിമാന വിജയമാണ്​.

വിജയിക്കാൻ 139 റൺസും യഥേഷ്​ടം ഓവറുകളും ബാക്കിയുണ്ടായിരുന്ന ന്യൂസിലാൻഡിനായി നായകൻ കെയ്​ൻ വില്യംസണും (52 ) വെറ്ററൻ താരം റോസ്​ ടെയ്​ലറും (47 ) ഒത്തുചേർന്നതോടെ ഇന്ത്യൻ ബൗളിങ്​ നിരക്ക്​ ഒന്നും ചെയ്യാനുണ്ടായിരുന്നില്ല. ടോം ലാതമിനേയും (9), ഡെവൻ കോൺവോയെയും (19) ആർ.അശ്വിൻ മടക്കിയിരുന്നു. നാലുവിക്കറ്റെടുത്ത ടിം സൗത്തിയും മൂന്ന്​ വിക്കറ്റെടുത്ത ട്രെൻറ്​ ബോൾട്ടും രണ്ട്​ വിക്കറ്റ്​ വീഴ്​ത്തിയ കൈൽ ജാമിസണും ചേർന്ന്​ ഇന്ത്യൻ ബാറ്റിങ്ങിനെ ​അതിവേഗത്തിൽ കശാപ്പ്​ ചെയ്യുകയായിരുന്നു. രണ്ടാം ഇന്നിങ്​സിൽ 170 റൺസായിരുന്നു ഇന്ത്യൻ സമ്പാദ്യം.

രണ്ട്​ വിക്കറ്റിന്​ 64 റൺസെന്ന നിലയിൽ ബുധനാഴ്​ച ബാറ്റിങ്​ ആരംഭിച്ച ഇന്ത്യക്ക്​ ബാറ്റിങ്ങിലെ നെടുംതൂണുകളായ വിരാട്​ കോഹ്​ലിയെയും ചേതേശ്വർ പുജാരയെയും വേഗം നഷ്​ടമായി. 13 റൺസെടുത്തുനിൽക്കേ കോഹ്​ലിയെ വിക്കറ്റ്​ കീപ്പർ വാൽട്ടിങ്ങിന്‍റെ കൈകളിലെത്തിച്ച്​ കൈൽ ജാമിസണാണ്​ ആദ്യ പ്രഹരം നൽകിയത്​. ആദ്യ ഇന്നിങ്​സിലും കോഹ്​ലിയെ പുറത്താക്കിയത്​ ജാമിസണായിരുന്നു. ടീം സ്​കോർ ബോർഡിൽ ഒരു റൺസ്​ കൂടി ​കൂട്ടിച്ചേർക്കു​േമ്പാഴേക്കും പുജാരയെയും ജാമിസൺ പവലിയനിലേക്ക്​ മടക്കി.ടീം സ്​കോർ 109ൽ നിൽക്കേ 13 റൺസുമായി അജിൻക്യ രഹാനെയും മടങ്ങിയതോടെ ഇന്ത്യപരുങ്ങലിലായി.41 റൺസെടുത്ത റിഷഭ്​ പന്ത്​ മാത്രമാണ്​ പൊരുതി നോക്കിയത്​. രവീന്ദ്ര ജദേജ (16), ആർ.അശ്വിൻ (7), മുഹമ്മദ്​ ഷമി (13), ജസ്​പ്രീത്​ ബുംറ (0) എന്നിങ്ങനെയാണ്​ ഇന്ത്യൻ ബാറ്റ്​സ്​മാൻമാരുടെ സ്​കോറുകൾ. ആദ്യ ഇന്നിങ്​സിൽ 217 റൺസിന്​ പുറത്തായ ഇന്ത്യക്കെതി​രെ ന്യൂസിലാൻഡ്​ 249 റൺസാണ്​ കുറിച്ചിരുന്നത്​.