സമനില 'വിജയം'; സിഡ്​നിയിൽ ആവേശം തീർത്ത്​ ഇന്ത്യൻ ചെറുത്തുനിൽപ്​

സിഡ്​നി: പരിക്കുപറഞ്ഞ്​ മൈതാനം വിടാമായിരുന്നിട്ടും ഹനുമ വിഹാരി- അശ്വിൻ കൂട്ടുകെട്ട്​ ഇന്ത്യക്ക്​ സിഡ്​നി മൈതാനത്ത്​ നൽകിയത്​ ആവേശ സമനില. ജയമുറപ്പിച്ച്​ റൺമല മുന്നി​ൽവെച്ചും ഗാലറികളിൽ കളികണ്ടുനിന്നവർക്ക്​ തെറി വിളിക്കാൻ അവസരം ആവർത്തിച്ചും ആസ്​ട്രേലിയ പതിനെട്ടടവും പയറ്റിയിട്ടും വലിയ സ്​കോറിലേക്ക്​ അനായാസം ബാറ്റുവീശിയ സന്ദർശകർ കുറിച്ചത്​ തുല്യതകളില്ലാത്ത സമനില 'വിജയം'. സ്​കോർ ആസ്​ട്രേലിയ 338, 312/6, ഇന്ത്യ 244, 334/5.

സ്​കോർ 100 കടക്കും മുമ്പ്​ രണ്ടു വിലപ്പെട്ട വിക്കറ്റ്​ കളഞ്ഞ ഇന്ത്യൻ പടയെ അനായാസം വീഴ്​ത്താമെന്ന്​ കണക്കുകൂട്ടിയായിരുന്നു അഞ്ചാം ദിനം കംഗാരുക്കൾ ഇറങ്ങിയത്​. പരി​ക്കുമായി വലഞ്ഞ വിഹാരിയും കൂട്ടുകാരും ഏതു നിമിഷവും മടങ്ങുമെന്ന പ്രതീക്ഷ വന്നത്​ ബൗളർമാരെ ഇരട്ടി ആവേശത്തിലാക്കി. പക്ഷേ, മൈതാനം സാക്ഷിയായത്​ മറ്റൊന്നിനായിരുന്നു.

407 റൺസ്​ എന്ന വലിയ ലക്ഷ്യത്തിലേക്ക്​ മനഃസാന്നിധ്യത്തോടെ ബാറ്റുവീശിയ ഇന്ത്യൻ പട ശരിക്കും ഓസീസ്​ താരങ്ങളെ മാത്രമല്ല, നാലു നാൾ പരിഹാസവുമായി ഗാലറികൾ നിറഞ്ഞ നാട്ടുകാരെ കൂടി സ്​തബ്​ധരാക്കി. ആദ്യ ദിവസം രണ്ടു വിക്കറ്റ്​ പോയവർക്ക്​ തിങ്കളാഴ്​ച നഷ്​ടമായത്​ മൂന്നു വിക്കറ്റ്​ മാത്രം. മൂന്നു സെഷനിലുമായി പൊരുതി നിന്നത്​ 131 ഓവർ. 161 പന്ത്​ നേരിട്ട്​ 23 റൺസുമായി വിഹാരിയും 128 പന്തിൽ 39 റൺസുമായി അശ്വിനും നങ്കൂരമിട്ടപ്പോൾ ഒരു ഓവർ ബാക്കിനി​ൽക്കെ കളിനിർത്താൻ കൈകൊടുത്ത്​ പവലി​യനിലേക്ക്​ മടങ്ങുക മാത്രമായിരുന്നു സ്​മിത്തിനും കൂട്ടർക്കും മുന്നിലെ പോംവഴി.

പരീക്ഷണങ്ങളുടെ ടെസ്​റ്റിൽ സെഞ്ച്വറിക്ക്​ മൂന്ന്​ റൺസ്​ മാത്രം അകലെ മടങ്ങിയ ഋഷഭ്​ പന്തായിരുന്നു ശരിക്കും താരം. 118 റൺസ്​ മാത്രം നേരിട്ടായിരുന്നു പന്ത്​ വലിയ സ്​കോർ നേടിയത്​. ചേതേശ്വർ പൂജാരയും അർധശതകം കണ്ടു. 205 പന്തുകളിലായിരുന്നു പൂജാരയുടെ 77 റൺസ്​.

കളി തോൽക്കുമെന്ന്​ മാധ്യമങ്ങളും കമെ​േൻറൻറർമാരും ഒരുവേള ഉറപ്പിച്ച കളിയിൽ അവസാനം ഇന്ത്യ ജയിക്കുമോയെന്നുവരെ സംശയിപ്പിച്ചായിരുന്നു ഇന്ത്യൻ ബാറ്റിങ്​. ബാറ്റിങ്​ തുടങ്ങിയ പന്ത്​- പൂജാര സഖ്യം അസാമാന്യം കൈവഴക്കത്തോടെ ഓസീസ്​ ബൗളിങ്ങിനെതിരെ പട പൊരുതിയപ്പോൾ എന്തും സംഭവിക്കാമെന്നായി. 22 പന്തി​െൻറ ഇടവേളയിൽ ഇരുവരും പുറത്തായെങ്കിലും പരിക്ക്​ വകവെക്കാതെ പിൻഗാമികൾ പ്രതിരോധം ആയുധമാക്കി ക്രീസിൽ നിലയുറപ്പിച്ചു.

ആദ്യ ഇന്നിങ്​സിൽ സെഞ്ച്വറി നേടുകയും രണ്ടാമത്​ തൊട്ടരികെ എത്തുകയും ചെയ്​ത സ്​റ്റീവ്​ സ്​മിത്ത്​ കളിയിലെ താരമായെങ്കിലും പന്തി​െൻറ ഗാർഡ്​ നീക്കുന്ന ദൃശ്യങ്ങൾ പുറത്തെത്തിയതേ​ാടെ കളിയിലെ വില്ലനായി.