ലങ്കൻ ക്യാമ്പിൽ കോവിഡ്​; ഇന്ത്യ-ശ്രീലങ്ക ആദ്യ ഏകദിനം ജൂലൈ 18ലേക്ക്​ മാറ്റി​

കൊളംബോ: ഇന്ത്യ-ശ്രീലങ്ക ഏകദിന പരമ്പരയുടെ ഉദ്​ഘാടന മത്സരം ജൂലൈ 18ന്​ നടക്കും. ശ്രീലങ്കൻ സ്റ്റാഫ്​ അംഗങ്ങളിൽ രണ്ടുപേർക്ക്​ കോവിഡ്​ സ്​ഥിരീകരിച്ചതിനെ തുടർന്നാണ്​​ പരമ്പര നീട്ടിയത്​​. മൂന്ന്​ മത്സരങ്ങളടങ്ങിയ പരമ്പര ജൂലൈ 13 മുതൽ 18 വരെ നടക്കുമെന്ന്​ ബി.സി.സിഐ സെക്രട്ടറി ജയ്​ ഷാ പറഞ്ഞു.

ജൂലൈ 13മുതൽ 17 വരെയായിരുന്നു പരമ്പര നടത്താൻ നിശ്ചയിച്ചിരുന്നത്​. ലങ്കൻ ബാറ്റിങ്​ കോച്ച്​ ഗ്രാൻഡ്​ ഫ്ലവറിനും ഡേറ്റ അനലിസ്റ്റ്​ ജി.ടി നിരോഷനുമാണ്​ കോവിഡ്​ ബാധിച്ചത്​.

മൂന്ന് വീതം​ ട്വന്‍റി20, ഏകദിന മത്സരങ്ങളാണ്​ ഇന്ത്യ ലങ്കയിൽ കളിക്കാനിരിക്കുന്നത്​. ജൂലൈ 13നായിരുന്നു ആദ്യ ഏകദിനം​. തിങ്കളാഴ്ച ശ്രീലങ്കൻ ടീം ആർ.ടി.പി.സി.ആർ ടെസ്റ്റിന്​ വിധേയമാകും. ഫ്ലവറിനും നിരോഷനും കോവിഡ്​ ഡെൽറ്റ വകഭേദമാണ്​ സ്​ഥിരീകരിച്ചത്​.

ലങ്ക കഴിഞ്ഞ ദിവസമാണ്​ പരമ്പരക്കുള്ള ടീമിനെ പ്രഖ്യാപിച്ചത്​. ദസുൺ ഷനാകയാണ്​ നായകൻ. വിരാട്​ കോഹ്​ലിയുടെയും രോഹിത്​ ശർമയുടെയും അഭാവത്തിൽ ശിഖർ ധവാനാണ്​ ടീമിനെ നയിക്കുന്നത്​. മുൻ ഇന്ത്യൻ നായകൻ രാഹുൽ ദ്രാവിഡാണ്​ കോച്ച്​.