ഹെഡ്​ങ്​ലിയിൽ തലകുനിച്ച്​ ഇന്ത്യ; 78 റൺസിന്​ പുറത്ത്​

ലീഡ്​സ്​: ലോഡ്​സ്​ ടെസ്റ്റിലെ ഐതിഹാസിക വിജയത്തിന്​ ശേഷം ഹെഡിങ്​ലിയിലെത്തിയ ഇന്ത്യ തകർന്നടിഞ്ഞു. മൂന്നാം ക്രിക്കറ്റ്​ ടെസ്റ്റിന്‍റെ ഒന്നാം ഇന്നിങ്​സിൽ ഇന്ത്യ 40.4 ഓവറിൽ 78 റൺസിന്​ പുറത്തായി. മൂന്ന്​ വിക്കറ്റ്​ വീതം പിഴുത ജെയിംസ്​ ആൻഡേഴ്​സണും ക്രെയ്​ഗ്​ ഓവർട്ടണും രണ്ട്​ വിക്കറ്റ്​ വീതമെടുത്ത ഒലി റോബിൻസണും സാം കറനുമാണ്​ ഇന്ത്യയെ കടപുഴക്കിയത്​.

രോഹിത്​ ശർമയും (19) അജിൻക്യ രഹാനെയും (18) മാത്രമാണ്​ രണ്ടക്കം കടന്നത്​. ടോസ്​ നേടി ബാറ്റിങ്​ തെരഞ്ഞെടുത്ത ശേഷമുള്ള ഇന്ത്യയുടെ ഏറ്റവും ചെറിയ ടോട്ടലാണിത്​. ലോഡ്​സ്​ ടെസ്റ്റ്​ ഇലവനിൽ മാറ്റങ്ങളില്ലാതെയാണ്​ ഇന്ത്യ ഹെഡിങ്​ലി ടെസ്റ്റിനിറങ്ങിയത്​.

ലോകേഷ്​ രാഹുൽ (0), ചേതേശ്വർ പുജാര (1), നായകൻ വിരാട്​ കോഹ്​ലി (7) എന്നിവരെ 21 റൺസിനിടെ മടക്കി​ ജെയിംസ്​ ആൻഡേഴ്​സൺ ഇന്ത്യൻ മുന്നേറ്റത്തിന്‍റെ മുനയൊടിച്ചു​. നാലാം വിക്കറ്റിൽ രോഹിതും രഹാനെയും ചേർന്ന്​ നേടിയ 35 റൺസ്​ കൂടി ഇല്ലായിരുന്നെങ്കിൽ ഇന്ത്യയുടെ നില ഇതിലും പരിതാപകരമായേനെ.

ഋഷഭ്​ പന്ത്​ (2), രവീന്ദ്ര ജദേജ (4), മുഹമ്മദ്​ ഷമി (0), ജസ്​പ്രീത്​ ബുംറ (0) എന്നിവർ എളുപ്പം മടങ്ങി. പത്താം വിക്കറ്റിൽ ഇശാന്തും സിറാജും ചേർന്ന്​ നേടിയ 11 റൺസാണ്​ സ്​കോർ 78ൽ എത്തിച്ചത്​.