ഇക്കുറി ഐ.പി.എൽ കിരീടം അർഹിച്ചിരുന്നത്​ കൊൽക്കത്തയെന്ന്​ ധോണി

ദുബൈ: പൊതുവേ വിജയങ്ങൾക്ക്​ ശേഷം നായകൻമാർ തങ്ങളുടെ ടീമിന്‍റെ പ്രകടനത്തെ പുകഴ്​ത്തിപ്പറയുന്ന പതിവ്​ ക്രിക്കറ്റിൽ കണ്ടുവരാറുണ്ട്​. എന്നാൽ ചെന്നൈ സൂപ്പർകിങ്​സ്​ നായകൻ എം.എസ്​. ധോണി അവിടെയും വ്യത്യസ്​തനായിരുന്നു.

ചെന്നൈ സുപ്പർ കിങ്​സിന്​ നാലാം ഐ.പി.എൽ കിരീടം നേടിക്കൊടുത്ത ശേഷം സംസാരിക്കവേ എം.എസ്​. ധോണി പുകഴ്​ത്തിയത്​ തന്‍റെ എതിരാളികളായ കൊൽക്കത്ത നൈറ്റ്​റൈഡേഴ്​സിനെയാണ്​. ഇക്കുറി തുടക്കത്തിൽ തപ്പിത്തടഞ്ഞ ശേഷം അതിശക്​തമായി തിരിച്ചുവന്ന്​ ഫൈനൽ വരെ എത്തിയ കൊൽക്കത്തക്കായിരുന്നു​ സീസണിൽ കപ്പ്​ ഏറ്റവും കൂടുതൽ അർഹിച്ചിരുന്നതെന്നായിരുന്നു ധോണിയുടെ പ്രതികരണം.

'ഞാൻ സി.എസ്‌.കെയെക്കുറിച്ച് സംസാരിക്കുന്നതിന് മുമ്പ് കെ.കെ.ആറിനെക്കുറിച്ച് സംസാരിക്കേണ്ടത് പ്രധാനമാണ്. ടൂർണമെന്‍റിന്‍റെ ആദ്യപാദത്തിലെ അവരുണ്ടായിരുന്ന സ്ഥാനത്ത്​ നിന്ന്​ തിരിച്ചുവന്ന്​ ഇത്രത്തോളം ചെയ്യു​കയെന്നത്​​ വളരെ ബുദ്ധിമുട്ടാണ്. ഈ വർഷം ഐ.പി.എൽ വിജയിക്കാൻ ഏതെങ്കിലും ടീമിന് അർഹതയുണ്ടെങ്കിൽ, അത് കെ.കെ.ആർ ആണെന്ന് എനിക്ക് തോന്നുന്നു. കോവിഡ് ഇടവേള അവരെ സഹായിച്ചുവെന്ന് ഞാൻ കരുതുന്നു'-മുൻ ഇന്ത്യൻ നായകൻ പ്രതികരിച്ചു.

കഴിഞ്ഞ സീസണിൽ ചരിത്രത്തിൽ ആദ്യമായി ചെന്നൈ പ്ലേഓഫ്​ കാണാതെ പുറത്തായിരുന്നു. അവിടെ നിന്ന്​ ഫീനിക്​സ്​ പക്ഷിയെപ്പോലെ ഉയിർത്തെഴുന്നേറ്റ ടീം ദുബൈ ക്രിക്കറ്റ്​ സ്​റ്റേഡിയത്തിൽ കൊൽക്ക​ത്തയെ 27 റൺസിന്​ തോൽപിച്ചാണ്​ നാലാം ഐ.പി.എൽ കിരീടം ചെന്നൈയിൽ എത്തിക്കുന്നത്​.

ഓരോ മത്സരത്തിലും ടീമിന്​ ഓരോരോ മാച്ച്​വിന്നേഴ്സിനെ ലഭിച്ചെന്നും താരങ്ങൾ തങ്ങളുടെ ഉത്തരവാദിത്വങ്ങൾ ഭംഗിയാക്കി നിറവേറ്റിയത്​ കാര്യങ്ങൾ എളുപ്പമാക്കിയെന്നും ധോണി പറഞ്ഞു.