ഏകദിന, ട്വൻറി20 ലോകകപ്പുകളിൽ മാറ്റുരക്കുന്ന ടീമുകളുടെ എണ്ണം ഉയർത്തി ഐ.സി.സി; ചാമ്പ്യൻസ് ട്രോഫി വീണ്ടും വരുന്നു
text_fields
ദുബൈ: പുരുഷൻമാരുടെ ഏകദിന, ട്വൻറി20 ലോകകപ്പുകളിൽ മാറ്റുരക്കുന്ന ടീമുകളുടെ എണ്ണം വീണ്ടും പരിഷ്കരിച്ച് രാജ്യാന്തര ക്രിക്കറ്റ് കൗൺസിൽ. 2027ലെയും 2031ലെയും ഏകദിന ലോകകപ്പിന് 14 ടീമുകളുണ്ടാവുമെന്ന് ഐ.സി.സി ചൊവ്വാഴ്ച അറിയിച്ചു. ട്വൻറി20 ലോകകപ്പിലെ ടീമുകളുടെ എണ്ണം 20 ആക്കി ഉയർത്തും. 2024 മുതൽ 2031 വരെയുള്ള ഗ്ലോബൽ ഷെഡ്യൂളിലാണ് പ്രഖ്യാപനം.
മിനി ലോകകപ്പായ ചാമ്പ്യൻസ് ട്രോഫി വീണ്ടും വരുന്നു എന്നുള്ളതാണ് മറ്റൊരു പ്രധാന പ്രഖ്യാപനം. ഏകദിനത്തിലെ ആദ്യ എട്ട് സ്ഥാനക്കാരെ പങ്കെടുപ്പിച്ച് 2025ലും 2029ലും ടൂർണമെൻറ് അരങ്ങേറും. 2017ൽ അവസാനം നടന്ന ചാമ്പ്യൻസ് ട്രോഫിയിൽ പാകിസ്താനായിരുന്നു വിജയി.
2019ൽ ഇംഗ്ലണ്ട് ജേതാക്കളായ ഏകദിന ലോകകപ്പിൽ 10 ടീമുകളാണ് കളിച്ചിരുന്നത്. അതിന് മുമ്പ് നടന്ന ലോകകപ്പിൽ 14 ടീമുകളുണ്ടായിരുന്നു.
'14 ടീമുകളും 54 മത്സരങ്ങളുമടങ്ങിയ ടൂർണമെൻറായിരിക്കും 2027ലെയും 2031ലെയും ഏകദിന ലോകകപ്പ്. 2024, 2026,2028, 2030 വർഷങ്ങളിൽ നടക്കേണ്ട ട്വൻറി20 ലോകകപ്പിലെ ടീമുകളുടെ എണ്ണം 20 ആക്കി ഉയർത്തും. 55 മത്സരങ്ങളാകും ടൂർണമെൻറിൽ ഉണ്ടാകുക' -ഐ.സി.സി വാർത്താകുറിപ്പിൽ അറിയിച്ചു.
എന്നാൽ ലോകടെസ്റ്റ് ചാമ്പ്യൻഷിപ്പിെൻറ മത്സരക്രമം ഇപ്പോഴത്തെ രീതിയിൽ തന്നെ നിലനിർത്താൻ ഐ.സി.സി തീരുമാനിച്ചു. 2003ൽ ദക്ഷിണാഫ്രിക്കയിൽ നടന്ന ഏകദിന ലോകകപ്പിെൻറ ഫോർമാറ്റിലാകും വരുന്ന ലോകകപ്പുകൾ കളിക്കുക. 14 ടീമുകളെ ഏഴു ടീമുകൾ വീതമുള്ള രണ്ട് ഗ്രൂപ്പുകളാക്കി തിരിക്കും. ഇതിൽ മികച്ച മൂന്ന് ടീമുകൾ വീതം സൂപ്പർ സിക്സിലെത്തും. തുടർന്ന് സെമിയും ഫൈനലും.
ട്വൻറി20 ലോകകപ്പിൽ അഞ്ച് ടീമുകൾ വീതമുള്ള നാല് ഗ്രൂപ്പുകളുണ്ടാകും. ഇതിൽ മികച്ച നാല് ടീമുകൾ സൂപ്പർ എട്ടിൽ എത്തും. ശേഷം നോക്കൗട്ട് റൗണ്ടായ സെമിയും ഫൈനലും. നാലു ടീമുകൾ വീതമുള്ള രണ്ട് ഗ്രൂപ്പുകളായിട്ടാണ് ചാമ്പ്യൻസ് ട്രോഫി ഒരുക്കുക. ഇതിലെ മികച്ച നാല് ടീമുകൾ സെമിഫൈനൽസ് കളിക്കുന്ന രീതിയിലാണ് മത്സരക്രമം.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.
