വിരമിക്കാനൊരുങ്ങി ഹർഭജൻ; ഐ.പി.എല്ലിലെത്തുക പുതിയ വേഷത്തിൽ

ന്യൂഡൽഹി: ഇന്ത്യൻ ക്രിക്കറ്റ്​ കണ്ട എക്കാലത്തെയും മികച്ച സ്​പിന്നർമാരിൽ ഒരാളായ ഹർഭജൻ സിങ്​ ഇതുവരെ കളി മതിയാക്കിയിട്ടില്ലെന്ന കാര്യം പലരും മറന്ന്​​ പോവാറുണ്ട്​. എന്നാൽ താരം ഉടൻ കളി മതിയാക്കി അടുത്ത സീസണിൽ സുപ്രധാന ടീമിന്‍റെ സപോർടിങ്​ സ്റ്റാഫിൽ അംഗമാവുമെന്ന്​ ദേശീയ മാധ്യമങ്ങൾ റിപ്പോർട്ട്​ ചെയ്​തു.

കഴിഞ്ഞ സീസണിൽ കൊൽക്കത്ത നൈറ്റ്​റൈഡേഴ്​സ്​ താരമായിരുന്ന ഹർഭജൻ ആദ്യ പാദത്തിൽ ഒന്ന്​ രണ്ട്​ മത്സരങ്ങൾ കളിച്ചിരുന്നു. എന്നാൽ യു.എ.ഇയിൽ നടന്ന രണ്ടാം പാദത്തിൽ വെറ്ററൻ താരത്തെ കെ.കെ.ആർ പുറത്തിരുത്തി.

അടുത്ത ആഴ്​ച ഹർഭജൻ ക്രിക്കറ്റിൽ നിന്ന്​ വിരമിക്കുമെന്നാണ്​ റിപ്പോർട്ടുകൾ. പരിശീലക സംഘത്തിൽ അംഗമാകാൻ വേണ്ടി ഒന്നുരണ്ട്​ ടീമുകൾ ഹർഭജനെ സമീപിച്ചതായാണ്​ വിവരം.

മുംബൈ ഇന്ത്യൻസ്​ താരമായിരുന്ന സമയത്ത്​ യുവതാരങ്ങളെ വളർത്തിക്കൊണ്ടു വരുന്ന കാര്യത്തിൽ ഹർഭജൻ പ്രത്യേക ശ്രദ്ധ പതിപ്പിച്ചിരുന്നു. കൊൽക്കത്തയുടെ വജ്രായുധമായി നിഗൂഢ സ്​പിന്നർ വരുൺ ചക്രവർത്തിയെ വളർത്തിയെടുക്കുന്നതിൽ ഹർഭജൻ വഹിച്ച പങ്ക്​ വിസ്​മരിക്കാനാകില്ല.

നെറ്റ്​സിൽ പരിശീലനം നടത്തുന്നതിനിടെ താൻ ലീഗിലെ ബിഗ്​ഹിറ്ററായി മാറുമെന്ന്​ ഭാജി പറഞ്ഞതായി കഴിഞ്ഞ ഐ.പി.എല്ലിന്‍റെ കണ്ടെത്തലായ വെങ്കിടേഷ്​ അയ്യർ വെളിപ്പെടുത്തിയിരുന്നു. അയ്യർ ​ഒരു ഐ.പി.എൽ മത്സരം പോലും കളിക്കുന്നതിന്​ മുമ്പായിരുന്നു ഭാജിയുടെ പ്രവചനം.

പതിമൂന്ന് സീസണുകളിലായി ഹർഭജൻ മുംബൈ ഇന്ത്യൻസ്, ചെന്നൈ സൂപ്പർകിങ്‌സ്, കൊൽക്കത്ത നൈറ്റ് റൈഡേഴ്‌സ് ടീമുകളുടെ ജഴ്​സിയണിഞ്ഞിട്ടുണ്ട്​. 163 മത്സരങ്ങളിൽ നിന്നായി 150 വിക്കറ്റുകളും വീഴ്​ത്തി. 18ന്​ അഞ്ച് വിക്കറ്റ് വീഴ്ത്തിയതാണ് ഐ.പി.എല്ലിലെ ഏറ്റവും മികച്ച പ്രകടനം.

ഐ.പി.എല്‍ മെഗാ താരലേലത്തിന് മുന്നോടിയായി ടീമുകള്‍ നിലനിര്‍ത്തുന്ന താരങ്ങളുടെ അന്തിമ പട്ടിക കഴിഞ്ഞ ദിവസം പുറത്തുവന്നിരുന്നു. അഹമ്മദാബാദ്​ ലഖ്​നോ ഫ്രാഞ്ചൈസികൾ കൂടി എത്തിയതോടെ ഈ മാസം നടക്കുന്ന മെഗാ താരലേലം സംഭവബഹുലമാകും.