Begin typing your search above and press return to search.
exit_to_app
exit_to_app
Homechevron_rightSportschevron_rightCricketchevron_rightപാക്​ വിജയത്തിൽ പടക്കം...

പാക്​ വിജയത്തിൽ പടക്കം പൊട്ടിക്കുന്നവർ ഇന്ത്യക്കാരല്ലെന്ന്​ ഗംഭീർ; വ്യക്തികളെ പഴിക്കുന്നത് വെറുപ്പുളവാക്കുന്നുവെന്ന്​

text_fields
bookmark_border
Gautam Gambhir-shami
cancel
camera_alt

ഗൗതം ഗംഭീർ, മുഹമ്മദ്​ ഷമി

ന്യൂഡൽഹി: ട്വന്‍റി20 ലോകകപ്പിൽ പാകിസ്​താൻ ഇന്ത്യയെ 10 വിക്കറിന്​ തോൽപ്പിച്ചതിന്‍റെ അലയൊലികൾ ഇനിയും അവസാനിച്ചിട്ടില്ല. കളിയുമായി ബന്ധപ്പെട്ട കാര്യങ്ങളല്ല മിക്കപ്പോഴും ചർച്ചകൾക്ക്​ തിരികൊളുത്തിയത്​. ഇന്ത്യ തോറ്റതിന്​ പിന്നാലെ വിവിധ ഭാഗങ്ങളിൽ പടക്കം പൊട്ടിച്ചതായി റിപ്പോർട്ടുകൾ പുറത്തുവന്നിരുന്നു. ഇന്ത്യയുടെ തോൽവിയെ തുടർന്ന്​ പേസർ മുഹമ്മദ്​ ഷമി ക്രൂരമായ സൈബർ ആക്രമണത്തിന്​ വിധേയനായി. ഈ രണ്ട്​ വിഷയങ്ങളിലും പ്രതികരണവുമായി രംഗത്തെത്തിയിരിക്കുകയാണ്​ ഇന്ത്യയുടെ മുൻ ഓപണറും ലോക്​സഭാംഗവുമായ ഗൗതം ഗംഭീർ.

പാക്​ വിജയത്തിൽ പടക്കം പൊട്ടിക്കുന്നവരെ ഇന്ത്യക്കാരെന്ന്​ വിളിക്കാൻ സാധിക്കില്ലെന്ന്​ ഗംഭീർ പറഞ്ഞു. 'ലജ്ജാകരം. നിങ്ങൾ ഈ രാജ്യത്ത്​ ജീവിക്കുന്നതിനാലാണ്​ ഇന്ത്യക്കാരൻ എന്ന് വിളിക്കപ്പെടുന്നത്​. പക്ഷേ മറ്റൊരു രാജ്യം ജയിക്കുമ്പോഴോ പാകിസ്​താൻ ജയിക്കുമ്പോഴോ നിങ്ങൾ പടക്കം പൊട്ടിക്കാൻ തുടങ്ങും. ഇത് തികച്ചും അസ്വീകാര്യമാണ്. പടക്കം പൊട്ടിച്ചവർക്ക്​ സ്വയം ഇന്ത്യക്കാരെന്ന് വിളിക്കാനാവില്ല' -ഗംഭീർ ദേശീയ മാധ്യമത്തോട്​ പറഞ്ഞു.

ഒരു ടീം ഇനത്തിൽ ചില വ്യക്തികളെ ലക്ഷ്യം വെക്കുന്നത്​ വെറുപ്പുളവാക്കുന്നതായി ക്യാപ്റ്റൻ വിരാട് കോഹ്‌ലിക്കും ഷമിക്കും നേരെ സോഷ്യൽ മീഡിയ അരങ്ങേറുന്ന അധിക്ഷേപങ്ങളെ കുറിച്ച് ഗംഭീർ അഭിപ്രായപ്പെട്ടു.

'നിങ്ങൾ ഒരു വ്യക്തിയെ ലക്ഷ്യം വെക്കുന്നത്​ തികച്ചും വെറുപ്പുളവാക്കുന്നു. അവൻ ക്യാപ്റ്റൻ ആയാലും അല്ലെങ്കിൽ മറ്റൊരു സമുദായത്തിൽ നിന്നുള്ള ആളായാലും ആത്യന്തികമായി അതൊരു ടീമാണ്, അതൊരു രാഷ്ട്രമാണ്. കോഹ്‌ലിയെയും ഷമിയെയും പോലുള്ള കളിക്കാർ രാജ്യത്തിന് വേണ്ടി നിരവധി അതുല്യമായ ​കാര്യങ്ങൾ ചെയ്തിട്ടുണ്ട്​. നമ്മളെ നിരവധി മത്സരങ്ങൾ വിജയിപ്പിച്ചിട്ടുണ്ട്. അവർ രാജ്യത്തിന്‍റെ അഭിമാനമാണ്​' -ഗംഭീർ പറഞ്ഞു.

ട്വന്‍റി20 ലോകകപ്പിൽ ഇന്ത്യ പാകിസ്​താനോട്​ തോറ്റതിന്‍റെ എല്ലാ പഴിയും കേട്ടത്​ പേസർ മുഹമ്മദ്​ ഷമിക്കായിരുന്നു. തോൽവിയിൽ ടീമിന്​ മൊത്തം ഉത്തരവാദിത്തം ഉണ്ടായിരുന്നിട്ടും ഷമിക്ക് നേരെ​ മാത്രമായിരുന്നു സൈബർ ആക്രമണം. ഷമിയെ രാജ്യദ്രോഹി എന്ന തരത്തിൽ ചിത്രീകരിക്കുന്ന ട്രോളുകൾ ചിലർ സോഷ്യൽ മീഡിയയിൽ പടച്ചുവിട്ടു.

ഇന്ത്യ ഉയർത്തിയ 152 റൺസ്​ വിജയലക്ഷ്യം 13 പന്തുകൾ ശേഷിക്കേ വിക്കറ്റ്​ നഷ്​ടപ്പെടുത്താതെ പാക്​ ഓപണർമാർ അടിച്ചെടുക്കുകയായിരുന്നു. 3.5 ഓവറിൽ 44 റൺസ്​ വഴങ്ങി ഷമി നിറംമങ്ങിയ ദിനമായിരുന്നു ഞായറാഴ്​ച.

ടീം ഒന്നടങ്കം ശരാശരി പ്രകടനം മാത്രമാണ്​ പുറത്തെടുത്തതെങ്കിലും ട്രോളൻമാർ ലക്ഷ്യം വെച്ചത്​ ഷമിയെയായിരുന്നു. എന്നാൽ വിദ്വേഷ പോസ്റ്റുകൾ വന്നതിന്​ പിന്നാലെ നിരവധി ആരാധകരും സചിൻ ടെണ്ടുൽക്കർ, വീരേന്ദർ സേവാഗ്​, ഇർഫാൻ പത്താൻ, ഹർഭജൻ സിങ്​ എന്നിവരടക്കമുള്ള താരങ്ങളും ഷമിക്ക്​ പിന്തുണയുമായെത്തി.

Show Full Article
TAGS:gautam gambhir pakistan-india Cyber Attack Mohammed Shami 
News Summary - Gautam Gambhir attack those bursting crackers on Pakistan win, abusing Shami and kohli
Next Story