പഞ്ചാബിനെ തോൽപ്പിച്ചത്​ അമ്പയർ നിഷേധിച്ച ഒരു റൺ

ഐ‌.പി.‌എല്ലിൽ ഡൽഹി ക്യാപ്പിറ്റൽസിനെതിരായ കിങ്​സ്​ ഇലവൻ പഞ്ചാബിൻെറ തോൽവിക്ക്​ പിന്നാലെ വിവാദം പുകയുന്നു. സ്ക്വയർ ലെഗ്​ അമ്പയർ നിതിൻ മേനോൻെറ 'ഷോർട്ട് റൺ' വിളിക്കെതിരെ പഞ്ചാബ് അധികൃതർ മാച്ച്​ റഫറിക്ക്​ അപ്പീൽ നൽകി. മത്സരം സൂപ്പർ ഓവറിലേക്ക് കടക്കുന്നതിന് മുമ്പ്, 19ാം ഓവറിൻെറ മൂന്നാം പന്തിലായിരുന്നു വിവാദ സംഭവം. റബാദ എറിഞ്ഞ പന്തിൽ മായങ്ക്​ അഗർവാൾ രണ്ട്​ റൺസെടുത്തെങ്കിലും ക്രിസ്​ ജോർദാൻ ക്രീസിൽ എത്തിയില്ലെന്ന്​ കാണിച്ച്​ അമ്പയർ ഒരു റൺ മാത്രം നൽകുകയായിരുന്നു. എന്നാൽ, നോൺ-സ്​ട്രൈക്കറുടെ എൻഡിൽനിന്ന്​ ഓടിത്തുടങ്ങിയ ജോർദാൻ ആദ്യ റൺ പൂർത്തിയാക്കുമ്പോൾ ബാറ്റ് ക്രീസിനുള്ളിലുണ്ടെന്ന് ടി.വി റീപ്ലേകളിൽ വ്യക്​തമാണ്​.

അവസാന ഓവറിൽ പഞ്ചാബിന് ജയിക്കാൻ 13 റൺസായിരുന്നു വേണ്ടിയിരുന്നത്​. ആദ്യ മൂന്ന്​ പന്തിൽ അഗർവാൾ 12 റൺസ്​ നേടി. എന്നാൽ, അവസാന മൂന്ന്​ പന്തിൽ രണ്ട്​ വിക്കറ്റ്​ നഷ്​ടമാവുകയും റണ്ണൊന്നും നേടാനാമായില്ല. ഇതോടെ മത്സരം സമനിലയിലായി. തുടർന്ന്​ സൂപ്പർ ഓവറിൽ ജയം ഡൽഹി സ്വന്തമാക്കി. ആ ഒരു റൺ അമ്പയർ നൽകിയിരുന്നെങ്കിൽ ഫലം മറ്റൊന്നാകുമായിരുന്നു എന്നാണ്​ വിലയിരുത്തൽ.

'മാച്ച് റഫറിയോട് അപ്പീൽ നൽകിയിട്ടുണ്ട്. കളിക്കിടയിൽ മാനുഷികമായ പിശകുകൾ സാധാരണമാണ്​. എന്നാൽ, ഐ‌.പി.‌എൽ പോലുള്ള ലോകോത്തര ടൂർണമെൻറിൽ ഇത്തരം പിഴവുകൾക്ക്​ വൻവില നൽകേണ്ടി വരും. ആ ഒരു റൺ ചിലപ്പോൾ ഞങ്ങളുടെ ​േപ്ല ഓഫ്​ സാധ്യതകളെ കൂടി പ്രതികൂലമായി ബാധിക്കും -പഞ്ചാബ്​ സി.ഇ.ഒ സതീഷ് മേനോൻ പി.ടി.ഐയോട് പറഞ്ഞു.

'അപ്പീൽ കൊണ്ട്​ ഫലം ലഭിക്കില്ല എന്നറിയാം. കാരണം അമ്പയറുടെ തീരുമാനം ഉടനടി മാറ്റിയില്ലെങ്കിൽ നിയമപ്രകാരം വിധി അന്തിമമാണ്​. എന്നാൽ, മാനുഷിക പിശകുകൾ വരാത്ത രീതിയിൽ നിയമങ്ങൾ പുനക്രമീകരിക്കും എന്നാണ്​ ഞങ്ങൾ പ്രതീക്ഷിക്കുന്നത്​' -സതീഷ്​ മേനോൻ കൂട്ടിച്ചേർത്തു.

അടുത്തിടെ രാജ്യാന്തര ക്രിക്കറ്റ് കൗൺസിലിൻെറ എലീറ്റ് പാനലിലേക്ക് തിരഞ്ഞെടുക്കപ്പെട്ട മലയാളി അംപയർ നിതിൻ മേനോനാണ് പിഴവു സംഭവിച്ചത്. അമ്പയറുടെ തീരുമാനത്തിനെതിരെ ഒരുപാട്​ മുൻ താരങ്ങൾ​ പ്രതിഷേധവുമായി എത്തി​. സാങ്കേതികവിദ്യകൾ മത്സരത്തെ സഹായിക്കണമെങ്കിൽ നിയമങ്ങളിൽ മാറ്റം വരുത്തണമെന്ന് ആസ്​​ട്രോലിയൻ താരം ടോം മൂഡി പറഞ്ഞു.

മുൻ ഇന്ത്യൻ താരം വീരേന്ദർ സേവാഗും അമ്പയറെ രൂക്ഷമായി വിമർശിച്ചു. മാൻ ഓഫ് ദ് മാച്ച് പുരസ്കാരം സത്യത്തിൽ ആ അമ്പയറിനാണ് നൽകേണ്ടതെന്നാണ്​ അദ്ദേഹം പ്രതികരിച്ചത്​.

'തേർഡ്​ അമ്പയർ ഇടപെട്ട് തീരുമാനം മാറ്റിച്ചിരുന്നെങ്കിൽ, അതിൽ എന്തെങ്കിലും പ്രശ്‌നമുണ്ടാകുമെന്ന് കരുതുന്നില്ല. അദ്ദേഹം ഇടപെട്ട് ശരിയായ തീരുമാനം അമ്പയറെ അറിയിക്കണമായിരുന്നു' -സഞ്​ജയ്​ മഞ്ജരേക്കർ പറഞ്ഞു. ഇത്തരം സന്ദർഭങ്ങളിൽ സാങ്കേതികവിദ്യ അടിസ്​ഥാനമാക്കണമെന്ന്​ ആകാശ്​ ചോപ്ര അഭിപ്രായപ്പെട്ടു.