ട്വന്‍റി20 ലോകകപ്പ്​: സൂപ്പർ 12 മത്സരക്രമം, പോയിന്‍റ്​ സ​മ്പ്രദായം എന്നിവയറിയാം

ദുബൈ: ആസ്​ട്രേലിയ-ദക്ഷിണാഫ്രിക്ക മത്സരത്തോടെ ട്വന്‍റി20ലോകകപ്പിന്‍റെ സൂപ്പർ 12 ഘട്ടത്തിന്​ തിരിതെളിഞ്ഞിരിക്കുകയാണ്​. കരുത്തരായ അയർലൻഡിനെ അട്ടിമറിച്ച്​ കുഞ്ഞൻമാരായ നമീബിയ കഴിഞ്ഞ ദിവസം സൂപ്പർ 12ലേക്ക്​ മുന്നേറിയിരുന്നു.

പ്രാഥമിക റൗണ്ടിലെ ഗ്രൂപ്പ്​ 'എ'യിലെ രണ്ടാം സ്​ഥാനക്കാരായ നമീബിയ ഇന്ത്യ, പാകിസ്​താൻ, ന്യൂസിലൻഡ്​, അഫ്​ഗാനിസ്​താൻ ഗ്രൂപ്പ്​ 'ബി' ​ജേതാക്കളായ സ്​കോട്​ലൻഡ്​ എന്നിവർക്കൊപ്പം ഗ്രൂപ്പ്​ രണ്ടിലാണ്​ സൂപ്പർ 12ൽ കളിക്കേണ്ടത്​. ഗ്രൂപ്പ്​ 'എ' ജേതാക്കളായ ശ്രീലങ്കയും ഗ്രൂപ്​ 'ബി' രണ്ടാം സ്​ഥാനക്കാരായ ബംഗ്ലാദേശും ഗ്രൂപ്പ്​ ഒന്നിൽ ഇംഗ്ലണ്ട്​, ആസ്​ട്രേലിയ, ദക്ഷിണാഫ്രിക്ക, വെസ്റ്റിൻഡീസ്​ എന്നീ കരുത്തൻമാരോടാണ്​ മാറ്റുരക്കേണ്ടത്​.

ഇരു ഗ്രൂപ്പുകളിൽ നിന്നും ആദ്യ രണ്ട്​ സ്​ഥാനങ്ങളിലെത്തുന്ന ടീമുകൾ സെമിഫൈനലിലെത്തും.

ഗ്രൂപ്പ്​ 1

ഇംഗ്ലണ്ട്​, ആസ്​ട്രേലിയ, ദക്ഷിണാഫ്രിക്ക, വെസ്റ്റിൻഡീസ്, ശ്രീലങ്ക, ബംഗ്ലാദേശ്​

ഗ്രൂപ്പ്​ 2

ഇന്ത്യ, പാകിസ്​താൻ, ന്യൂസിലൻഡ്​, അഫ്​ഗാനിസ്​താൻ, നമീബിയ, സ്​കോട്​ലൻഡ്​

സുപ്രധാന തീയതികൾ:

ഒക്​ടോബർ 23 -ഗ്രൂപ്പ്​ 1 മത്സരങ്ങൾക്ക്​ തുടക്കം

ഒക്​ടോബർ 23ന്​ അബൂദബിയിൽ വെച്ചാണ്​ ഗ്രൂപ്പ്​ ഒന്ന്​ പോരാട്ടങ്ങളുടെ തുടക്കം. ആസ്​ട്രേലിയയും ദക്ഷിണാഫ്രിക്കയും തമ്മിലാണ്​ ഉദ്​ഘാടന മത്സരം. ദുബൈയിൽ ഇംഗ്ലണ്ടും വെസ്റ്റിൻഡീസും തമ്മിൽ രണ്ടാം മത്സരത്തിൽ കൊമ്പുകോർക്കും.

ആദ്യ റൗണ്ടിൽ നിന്ന്​ യോഗ്യത നേടിയെത്തിയ ശ്രീലങ്കയും ബംഗ്ലാദേശും ഒക്​ടോബർ 24ന്​ ഷാർജയിൽ ​ഏറ്റുമുട്ടും.

ഒക്​ടോബർ 24 -ഗ്രൂപ്പ്​ 1 മത്സരങ്ങൾക്ക്​ തുടക്കം

ഇന്ത്യ-പാകിസ്​താൻ ബ്ലോക്ക്​ബസ്റ്റർ മത്സരത്തോടെയാണ്​ ഗ്രൂപ്പ്​ രണ്ട്​ മത്സരങ്ങൾക്ക്​ തുടക്കമാകുക. പ്രാദേശിക സമയം ആറുമണിക്ക്​ ദുബൈയിൽ വെച്ചാണ്​ മത്സരം. ഒക്​ടോബർ 26ന്​ പാകിസ്​താൻ ന്യൂസിലൻഡിനെ നേരിടും. സ്​കോട്​ലൻഡിനെതിരെ ഒക്​ടോബർ 25നാണ്​ അഫ്​ഗാനിസ്​താന്‍റെ ആദ്യ മത്സരം.

ഗ്രൂപ്പ്​ 1 മത്സരങ്ങളുടെ അവസാനം​- നവംബർ 6

അബൂദബിയിൽ നടക്കുന്ന ആസ്​ട്രേലിയ-വിൻഡീസ്,​ ഷാർജയിൽ നടക്കുന്ന ഇംഗ്ലണ്ട്​- ദക്ഷിണാഫ്രിക്ക മത്സരങ്ങളോടെ ഗ്രൂപ്പ്​ ഒന്ന്​ പോരാട്ടങ്ങൾക്ക്​ അവസാനമാകും.

ഗ്രൂപ്പ്​ 2 മത്സരങ്ങളുടെ അവസാനം​- നവംബർ 8

നവംബർ എട്ടിന്​ നടക്കേണ്ട ഇന്ത്യ-നമീബിയ മത്സരമാണ്​ ഗ്രൂപ്പ്​ രണ്ടിലെ അവസാന കളി.

സെമിഫൈനലുകൾ- നവംബർ 10, 11

നവംബർ 10ന്​ അബൂദബിയിൽ വെച്ചാണ്​ ആദ്യ സെമി. നവംബർ 11ന്​ നടക്കുന്ന രണ്ടാമത്തെ സെമിഫൈനലിന്​ ദുബൈയാണ്​ ആതിഥേയത്വം വഹിക്കുന്നത്​. രണ്ട്​ സെമികൾക്കും റിസർവ്​ ദിനങ്ങളുണ്ട്​.

ഫൈനൽ

നവംബർ 14ന്​ ദുബൈ അന്താരാഷ്​ട്ര സ്​റ്റേഡിയത്തിലാണ്​ ട്വന്‍റി20 മാമാങ്കത്തിന്‍റെ കലാശപ്പോരാട്ടം.

പോയിന്‍റ്​ സ​​മ്പ്രദായം

ആദ്യ റൗണ്ടിൽ പിന്തുടർന്ന്​ അതേ രീതിയിലായിരിക്കും സൂപ്പർ 12​ലും പിന്തുടരുക. ജയിച്ചാൽ രണ്ട്​ പോയിന്‍റ്​ ലഭിക്കും. മത്സരം സമനിലയിലാകുകയോ ഫലമില്ലാതെയോ ഉപേക്ഷിക്കുകയോ ചെയ്​താൽ ​ഓരോ പോയിന്‍റ്​ വീതം ലഭിക്കും.