'ഞങ്ങൾക്ക്​ ഫുട്​ബാളിൽ മാത്രമല്ലടാ, ക്രിക്കറ്റിലുമുണ്ട്​ പിടി; ദേവ്​ദത്തി​െൻറ പ്രകടനം ആഘോഷമാക്കി മലപ്പുറം

ദുബൈ: മലപ്പുറമെന്നാൽ കേൾക്കുന്നവർ​ക്കെല്ലാം കാൽപന്തി​െൻറ നാടാണ്​. മഴക്കാലത്തും പാതിരാവിലുമെല്ലാം സെവൻസ്​ ഫുട്​ബാൾ കാണാൻ തടിച്ചുകൂടുന്നവരുടെ നാട്​. യൂറോപ്പിലെയും ലാറ്റിന അമേരിക്കയിലെയും തൊട്ട്​ ആഫ്രിക്കൻ രാജ്യങ്ങളിലെ ഫുട്​ബാൾ താരങ്ങൾക്കും ടീമുകൾക്കും വരെ ഫാൻ ക്ലബ്ബുകളുള്ള ഇടം.

എടപ്പാൾ സ്വദേശി ദേവ്​ദത്ത്​ പടിക്കൽ സാക്ഷാൽ വിരാട്​ കോഹ്​ലിയെയും എ.ബി.ഡിവില്ലേഴസിനെയും സാക്ഷിനിർത്തി സൺറൈസേഴ്​സ്​ ഹൈദരാബാദിനെതിരെ ബംഗളൂരു റോയൽ ചാലഞ്ചേഴ്​സിനായി മിന്നിത്തിളങ്ങിയപ്പോൾ മലപ്പുറത്തുകാരും അത്​ ആഘോഷമാക്കി. 'ഞങ്ങൾക്ക്​ ക്രിക്കറ്റിലുമുണ്ടെടാ പിടി'എന്ന തലക്കെ​ട്ടോടെ ട്രോളുകളും പാറിനടന്നു. മലപ്പുറത്തുകാരുടെ സ്വന്തം ട്രോൾ ഗ്രൂപ്പായ 'ട്രോൾ മലപ്പുറത്തിലും' പോസ്​റ്റുകളുടെ ഒഴുക്കായിരുന്നു.

ചെ​െന്നെ സൂപ്പർ കിങ്​സി​െൻറ താരമായ മുഹമ്മദ്​ ആസിഫും മലപ്പുറം എടവണ്ണ സ്വദേശിയാണ്​. ഇരുവരുടെയും ചിത്രങ്ങൾ വെച്ചാണ്​ ട്രോളുകൾ പാറിനടന്നത്​.

നിലമ്പൂർ സ്വദേശി ബാബുനുവി​െൻറയും എടപ്പാൾ സ്വദേശി അമ്പിളിയുടെയും മകനായ ദേവ്​ദത്ത്​ ഹൈദരാബാദിലും പിന്നീട്​ കർണാടകയിലുമാണ്​ വളർന്നത്​. കർണാടകയിൽ കളിച്ചുവളർന്ന ദേവ്​ദത്ത്​ വിജയ്​ ഹസാരെ ട്രോഫി, സയ്യിദ്​ മുഷ്​താഖ്​ അലി ട്വൻറി 20 എന്നിവയിൽ മികച്ച പ്രകടനം നടത്തിയതോടെയാണ്​ ഐ.പി.എല്ലിലേക്ക്​ വിളിയെത്തിയത്​. കഴിഞ്ഞ സീസണിൽ 20 ലക്ഷം രൂപക്ക്​ ബംഗളൂരു സ്വന്തമാക്കിയെങ്കിലും അരങ്ങേറ്റത്തിനായി ഈ വർഷം വരെ കാത്തിരിക്കേണ്ടി വന്നു. കിട്ടിയ അവസരം ദേവ്​ദത്ത്​ ശരിക്കും മുത​ലെടുത്തു.

ആസ്​ട്രേലിയൻ ട്വൻറി 20 ക്യാപ്​റ്റൻ ആരോൺ ഫിഞ്ചിനെ സാക്ഷി നിർത്തി തിരികൊളുത്തിയ വെടിക്കെട്ടിൽ ദേവ്​ദത്തി​െൻറ ബാറ്റിൽ നിന്നും എട്ട്​ ബൗണ്ടറികൾ പിറന്നിരുന്നു.42 പന്തിൽ 56 റൺസുമായി അരങ്ങേറ്റം തന്നെ അർധ​സെഞ്ച്വറിയാക്കി മാറ്റിയാണ്​ 20കാരൻ കളം വിട്ടത്​. മത്സരശേഷം നായകൻ വിരാട്​ കോഹ്​ലിയും ദേവ്​ദത്തിനെ പുകഴ്​ത്തി. യുവരാജ്​ സിങ്ങി​െൻറ ബാറ്റിങ്​ ശൈലിയോടാണ്​ ദേവ്​ദത്തിനെ നിരവധിപേർ ഉപമിക്കുന്നത്​.