പടിക്കലല്ല; തുടക്കത്തിലേ കലമുടച്ച്​​ ബാംഗ്ലൂർ; ഡൽഹിക്ക്​ കൂറ്റൻ വിജയം

ദുബൈ: 197 റൺസി​െൻറ വലിയ വിജയലക്ഷ്യവുമായി ഇറങ്ങിയ ബാംഗ്ലൂർ റോയൽ ചാലഞ്ചേഴ്സിന്​ വമ്പൻ തോൽവി. ലക്ഷ്യബോധമില്ലാതെ ബാറ്റുവീശിയ ബാംഗ്ലൂരിനെ 59 റൺസിനാണ്​ ഡൽഹി കാപ്പിറ്റൽസ്​ തകർത്തത്​. നാലോവറിൽ 24 റൺസ്​ വഴങ്ങി നാലുവിക്കറ്റ്​ വീഴ്​ത്തിയ കാഗിസോ റബാദയാണ്​ ബാംഗ്ലൂരി​െൻറ പതനം വേഗത്തിലാക്കിയത്​.

ഫോമിലുള്ള മലയാളി താരം ദേവ്​ദത്ത്​ പടിക്കലി​െൻറ (4) വിക്കറ്റാണ്​ ബാംഗ്ലൂരിന്​ ആദ്യം നഷ്​ടമായത്​. പിന്നാലെ 13 റൺസെടുത്ത ആരോൺ ഫിഞ്ചും 9 റൺസെടുത്ത എ.ബി ഡിവി​ല്ലിയേഴ്​സും പുറത്തായതോടെ ബാംഗ്ലൂർ പരുങ്ങലിലായി. 39 പന്തിൽ നിന്നും 43 റൺസെടുത്ത നായകൻ വിരാട്​ കോഹ്​ലി മാത്രമാണ്​ അൽപ്പമെങ്കിലും ശോഭിച്ചത്​. മുഈൻ അലി 11ഉം വാഷിങ്​ടൺ സുന്ദർ 17ഉം റൺസെടുത്ത്​ പുറത്തായി.

സ്​പിന്നർമാരെയും പേസർമാരെയും മാറി മാറി പരീക്ഷിച്ച ഡൽഹി നായകൻ ശ്രേയസ്​ അയ്യരുടെ തന്ത്രം ഫലിച്ചു. കൃത്യമായ ഇടവേളകളിൽ വിക്കറ്റുവീഴ്​ത്തി ഡൽഹി ബൗളർമാർ നായക​െൻറ തീരുമാനത്തെ ശരിവെച്ചു. ആൻറിച്​ നോർകിയ, അക്​സർ പ​ട്ടേൽ എന്നിവർ രണ്ട്​ വിക്കറ്റ്​ വീതം വീഴ്​ത്തി.

നേരത്തേ, ബാ​റ്റെടുത്തവരിൽ ഏറെപ്പേരും മിന്നിത്തിളങ്ങിയതോടെയാണ്​ ഡൽഹി കൂറ്റൻ സ്​കോർ കുറിച്ചത്​. ടോസ്​ നേടിയിട്ടും ബാറ്റിങ്​ തിരഞ്ഞെടുത്ത നായകൻ വിരാട്​ കോഹ്​ലിയുടെ തീരുമാനം തെറ്റാണെന്ന്​ തെളിയിച്ചുകൊണ്ടായിരുന്നു ഡൽഹിയുടെ തുടക്കം. നാലുവിക്കറ്റ്​ നഷ്​ടത്തിൽ 196 റൺസെടുത്താണ്​ ഡൽഹി ഇന്നിങ്​ സ്​ അവസാനിപ്പിച്ചത്​.

23 പന്തിൽ 42 റൺസുമായി പ്രഥ്വി ഷായും 28പന്തിൽ 32റൺസുമായി ശിഖർ ധവാനും ഡൽഹിക്ക്​ മികച്ച തുടക്കമിട്ടു. തുടർന്ന്​ വന്ന നായകൻ ശ്രയസ്​ അയ്യർക്ക്​ (11) തിളങ്ങാനായില്ലെങ്കിലും ഋഷഭ്​ പന്തും മാർക്കസ്​ സ്​റ്റോയ്​ണിസും ആഞ്ഞുവീശിയതോടെ ഡൽഹിയുടെ സ്​കോർബോർഡ്​ വേഗത്തിൽ കുതിച്ചു. 26 പന്തിൽ 53 റൺസെടുത്ത പുറത്താകാതെ നിന്ന സ്​റ്റോയ്​ണിസാണ്​ ഡൽഹിയെ കൂറ്റൻ സ്​കോറിലെത്തിച്ചത്​.

ബാംഗ്ലൂരിനായി പന്തെടുത്തവരിൽ വാഷിങ്​ടൺ സുന്ദറൊഴികെയുള്ളവരെല്ലാം തല്ലുവാങ്ങി. നാലോവർ എറിഞ്ഞ വാഷിങ്​ടൺ സുന്ദർ 20റൺസ്​ മാത്രമാണ്​ വഴങ്ങിയത്​. മുഹമ്മദ്​ സിറാജ്​ 34 റൺസ്​ വഴങ്ങി രണ്ട്​ വിക്കറ്റുകൾ വീഴ്​ത്തി.

അഞ്ചുമത്സരങ്ങളിൽ നാലും ജയിച്ച ഡൽഹി ഒന്നാംസ്ഥാനത്തേക്ക്​ കയറി. മൂന്ന്​ മത്സരങ്ങൾ ജയിച്ച ബാംഗ്ലൂർ മൂന്നാമതാണ്​.