ഇന്ത്യൻ ആധിപത്യം; വനിതകളുടെ പിങ്ക്​ബാൾ ടെസ്റ്റ്​ സമനിലയിൽ

ഗോൾഡ്​കോസ്റ്റ്​: ഇന്ത്യയും ആസ്​ട്രേലിയയും തമ്മിൽ നടന്ന ഏക പകൽ-രാത്രി ടെസ്റ്റ്​ മത്സരം സമനിലയിൽ കലാശിച്ചു. ആദ്യ രണ്ടുദിനം മഴ കാരണം നിരവധി ഓവറുകൾ നഷ്​ടമായതാണ്​ മത്സരത്തിന്​ ഫലമില്ലാതാക്കിയത്​. രണ്ട്​ ഇന്നിങ്​സികളിൽ യഥാക്രമം 127, 31 റൺസുകൾ സ്​കോർ ചെയ്​ത ഇന്ത്യൻ ഓപണർ സ്​മൃതി മന്ദാനയാണ്​ കളിയിലെ താരം.

ആദ്യം ബാറ്റുചെയ്​ത ഇന്ത്യൻ വനിതകൾ മന്ദാനയുടെ തകർപ്പൻ സെഞ്ച്വറിയുടെ മികവിൽ എട്ടിന്​ 377 റൺസ്​ സ്​കോർ ചെയ്​ത്​ ഇന്നിങ്​സ്​ ഡിക്ലയർ ചെയ്​തു. നാലാം ദിനം മൂന്നിന്​ 143 റൺസെന്ന നിലയിൽ ബാറ്റിങ്​ തുടങ്ങിയ ആസ്ട്രേലിയ ഒമ്പതിന്​ 241 റൺസെന്ന നിലയിലായി. അമ്പരപ്പിക്കുന്ന തീരുമാനത്തിലൂടെ ഇന്നിങ്​സ്​ ഡിക്ലയർ ചെയ്​ത ഓസീസ്​ നായിക മെഗ്​ ലാന്നിങ്​ ഇന്ത്യക്കാരെ ബാറ്റിങ്ങിന്​ ക്ഷണിച്ചു.

രണ്ടാം ഇന്നിങ്​സിൽ 37 ഓവറിൽ മൂന്ന്​ വിക്കറ്റ്​ നഷ്​ടത്തിൽ 135 റൺസ്​ സ്കോർ ചെയ്​ത്​ ഇന്ത്യ ചായക്ക്​ ശേഷം ആതിഥേയർക്ക്​ വീണ്ടും ബാറ്റ്​ ചെയ്യാൻ അവസരം നൽകി. 91 പന്തിൽ 52 റൺസുമായി ശഫാലി വർമയും 41 റൺസുമായി പുറത്താകാതെ നിന്ന പൂനം റാവത്തുമാണ്​ തിളങ്ങിയത്​.

32 ഓവറിൽ 272 റൺസായിരുന്നു വിജയലക്ഷ്യം. 15 ഓവറിൽ ഓസീസ്​ സ്​കോർ 36ന്​ രണ്ട്​ എന്ന നിലയിൽ എത്തിനിൽക്കേ നായികമാരായ മിതാലി രാജും മെഗ്​ ലാന്നിങ്ങും സമനിലക്ക്​ സമ്മതിച്ച്​ ഹസ്​തദാനം ചെയ്​തു.

ഇരു ടീമുകൾക്കും രണ്ട്​ പോയിന്‍റ്​ വീതം ലഭിച്ചു. മഴ കാരണം ആദ്യ രണ്ടുദിവസങ്ങളിലായി 80ലേറെ ഓവറുകൾ നഷ്​ടപ്പെട്ടിരുന്നു. സീനിയർ താരങ്ങളായ മിതാലിയുടെയും ജുലൻ ഗോസ്വാമിയുടെയും അവസാന ടെസ്​റ്റ്​ മത്സരമാകും ഇത്​.