ക്രിക്കറ്റ് താരം കേദാർ ജാദവിന്റെ പിതാവിനെ കാണാതായി; മണിക്കൂറുകളുടെ തെരച്ചിലിൽ കണ്ടെത്തി പൊലീസ്

പുണെ: പ്രഭാത സവാരിക്കിറങ്ങി കാണാതായ ക്രിക്കറ്റ് താരം കേദാർ ജാദവിന്റെ പിതാവ് മഹാദേവ് ജാദവിനെ മണിക്കൂറുകളുടെ തെരച്ചിലിനൊടുവിൽ കണ്ടെത്തി പൊലീസ്. തിങ്കളാഴ്ച രാവിലെയാണ് പുണെയിലെ കോത്ത്റൂഡ് പ്രദേശത്തുനിന്ന് 75കാരനെ കാണാതായത്. ഫോണിലേക്ക് വിളിച്ചെങ്കിലും സ്വിച്ച് ഓഫ് ആയിരുന്നു. ഇതോടെയാണ് കുടുംബം പൊലീസിൽ പരാതി നൽകിയത്. തുടർന്ന് സി.സി.ടി.വി ദൃശ്യങ്ങളും മറ്റും പരിശോധിച്ച പൊലീസ് കാർവെ നഗറിലാണ് അദ്ദേഹം അവസാനം എത്തിയതെന്ന് മനസ്സിലാക്കുകയും വൈകീട്ടോടെ കണ്ടെത്തുകയുമായിരുന്നു. മഹാദേവ് ജാദവിന് മറവി രോഗമുണ്ടെന്ന് പൊലീസ് അറിയിച്ചു.

ഐ.പി.എല്ലിൽ ചെന്നൈ സൂപ്പർ കിങ്സ് താരമായ കേദാർ ജാദവ് ഇപ്പോൾ ചെന്നൈയിലാണുള്ളത്. ഇന്ത്യക്കായി 73 ഏകദിനങ്ങളിലും ഒമ്പത് ട്വന്റി 20കളിലും കളത്തിലിറങ്ങിയിട്ടുണ്ട്. ഏകദിനത്തിൽ 42.09 ശരാശരിയിൽ 1389 റൺസും 27 വിക്കറ്റും സ്വന്തമാക്കിയ താരം ട്വന്റി 20യിൽ 20.33 ശരാശരിയിൽ 122 റൺസും നേടിയിട്ടുണ്ട്.