'യൂനിവേഴ്​സൽ ബോസ്' ക്രിസ്​ ഗെയ്​ൽ:​ ട്വന്‍റി20യിൽ 14,000 റൺസ്​ തികക്കുന്ന ആദ്യ ക്രിക്കറ്റ്​ താരം

ഗ്രോസ്​ ഐലൻറ്​ (സെന്‍റ്​ ലൂസിയ): ട്വന്‍റി20 ക്രിക്കറ്റിലെ ഇതിഹാസമെന്ന്​ നിസ്സംശയം പറയാൻ സാധിക്കുന്ന പേരാണ്​ കരീബിയൻ താരം ക്രിസ്​ ഗെയ്​ലി​േന്‍റത്​​. 41ാം വയസ്സിലും കൂറ്റനടികളുമായി ക്രിക്കറ്റിന്‍റെ കുഞ്ഞൻ പതിപ്പിൽ നിറഞ്ഞു നിലക്കുന്ന ഗെയ്​ൽ കഴിഞ്ഞ ദിവസം തന്‍റെ കിരീടത്തിൽ മറ്റൊരു തൂവൽ കൂടി തുന്നിച്ചേർത്തു. ട്വന്‍റി20 ക്രിക്കറ്റിൽ മാത്രം 14,000 റൺസ്​ സ്​കോർ ചെയ്യുന്ന ആദ്യ താരമായിരിക്കുകയാണ്​ ഗെയ്​ൽ. വെസ്റ്റിൻഡീസ്​-ആസ്​ട്രേലിയ മൂന്നാം ട്വന്‍റി20ക്കിടെയായിരുന്നു ഗെയ്​ൽ നാഴികക്കല്ല്​ പിന്നിട്ടത്​.

ആദ്യ രണ്ട്​ മത്സരങ്ങളിലും യഥാക്രമം 4,13 റൺസുകൾ മാത്രമാണ്​ സ്​കോർ ചെയ്യാനായത്​ എന്നതിനാൽ തന്നെ വെറ്ററൻ താര​ത്തിനെ ടീമിൽ ഉൾപെടുത്തുന്നതിനെതിരെ വിമർശനങ്ങൾ ഉയർന്നിരുന്നു. എന്നാൽ വിമർശനങ്ങൾക്കുള്ള മറുപടി മൂന്നാം മത്സരത്തിൽ ബാറ്റുകൊണ്ടാണ്​ ഗെയ്​ൽ കരുതി വെച്ചിരുന്നത്​. ഓസീസ്​ സ്​പിന്നർ ആദം സാംപയെ സിക്​സർ പറത്തിയാണ്​ ഗെയ്​ൽ തന്‍റെ 14,000 ട്വന്‍റി20 റൺസിലെത്തിയത്​. മത്സരത്തിൽ ഗെയ്​ൽ 67 റൺസെടുത്തു. ഗെയ്​ലിന്‍റെ മികവിൽ 141റണസ്​ വിജയലക്ഷ്യം തേടിയിറങ്ങിയ വിൻഡീസ്​ 31 പന്തുകൾ ശേഷിക്കേ ലക്ഷ്യം കണ്ടു.

10,836 റൺസുമായി (545 മത്സരങ്ങൾ) ട്വന്‍റി20 ഫോർമാറ്റിൽ ഗെയ്​ലിന്​ പിന്നിലുള്ള റൺവേട്ടക്കാരൻ വിൻഡീസിന്‍റെ തന്നെ കീറൻ പൊള്ളാർഡാണ്​. പാകിസ്​താന്‍റെ ശുഐബ്​ മാലിക്​ (425 മത്സരങ്ങളിൽ നിന്ന്​ 10741 റൺസ്​), ആസ്​ട്രേലിയയുടെ ഡേവിഡ്​ വാർണർ (304 മത്സരങ്ങളിൽ നിന്ന്​ 10017 റൺസ്​), ഇന്ത്യൻ നായകൻ വിരാട്​ കോഹ്​ലി (304 മത്സരങ്ങളിൽ നിന്ന്​ 9922 റൺസ്) എന്നിവരാണ്​ ടോപ്​ ഫെവിലുള്ളത്​.

430 മത്സരങ്ങളിൽ നിന്ന്​ 13,071 റൺസുമായാണ്​ ഗെയ്​ൽ മത്സരത്തിനിറങ്ങിയത്​. 37.55 റൺസാണ്​ ഗെയ്​ലിന്‍റെ ബാറ്റിങ്​ ശരാശരി. 22 സെഞ്ച്വറികൾ നേടിയ ഗെയ്​ൽ 86 അർധസെഞ്ച്വറികൾ സ്വന്തമാക്കി. ട്വന്‍റി20 ക്രിക്കറ്റിൽ മാത്രം 1000ത്തിലധികം സിക്​സറുകളും ഫോറുകളും ഗെയ്​ൽ പറത്തിയിട്ടുണ്ട്​.

റോയൽ ചലഞ്ചേഴ്​സ്​ ബാംഗ്ലൂരിന്‍റെ താരമായിരുന്ന 2013 ഐ.പി.എൽ സീസണിൽ പൂണെ വാരിയേഴ്​സിനെതിരെ നേടിയ 175 റൺസാണ്​ ഉയർന്ന സ്​കോർ. അന്താരാഷ്​ട്ര ട്വന്‍റി20യിൽ വിൻഡീസിന്‍റെ ഏറ്റവും മികച്ച റൺവേട്ടക്കാരനും ഗെയ്​ലാണ്​.