തുടർച്ചയായി മൂന്നാം മാസവും ഐ.സി.സിയുടെ മികച്ച താരം ഇന്ത്യയിൽ നിന്ന്​

ദുബൈ: ഇന്ത്യൻ പേസർ ഭുവനേശ്വർ കുമാറിനെ പോയ മാസത്തെ ഏറ്റവും മികച്ച കളിക്കാരനായി രാജ്യാന്തര ക്രിക്കറ്റ്​ കൗൺസിൽ തെരഞ്ഞെടുത്തു. ഒരു വർഷത്തിലേറെ കാലം പരിക്ക്​ മൂലം പുറത്തിരുന്ന ഭുവി ഇംഗ്ലണ്ടിനെതിരായ പരിമിത ഓവർ പരമ്പരയിലെ മിന്നുന്ന പ്രകടനത്തിന്‍റെ മികവിലാണ്​ മാർച്ച്​ മാസത്തെ ഏറ്റവും മികച്ച ക്രിക്കറ്ററായത്​.

ഈ വർഷം ജനുവരിയിൽ തുടങ്ങിയ 'പ്ലെയർ ഓഫ്​ ദ മന്ത്'​ തുടർച്ചയായി മൂന്നാം തവണയാണ്​ ഇന്ത്യൻ താരങ്ങൾ സ്വന്തമാക്കുന്നത്​​. ജനുവരിയിൽ ഋഷഭ്​ പന്തും ഫെബ്രുവരിയിൽ ആർ. അശ്വിനുമായിരുന്നു താരങ്ങൾ.

മൂന്ന്​ ഏകദിനങ്ങളടങ്ങിയ പരമ്പരയിൽ 4.65 എക്കോണമിയിൽ ആറ്​ വിക്കറ്റുകളാണ്​ 31കാരനായ ഭുവനേശ്വർ സ്വന്തമാക്കിയത്​. ആവേശകരമായിരുന്ന ട്വന്‍റി20 പരമ്പരയിൽ 6.38 എക്കോണമിയിൽ നാലുവിക്കറ്റ്​ വീഴ്​ത്തിയ താരം ഇന്ത്യൻ വിജയത്തിൽ നിർണായക പങ്കുവഹിച്ചു.

പവർപ്ലേ, ഡെത്ത്​ ഓവറുകളിൽ റൺസ്​ വിട്ടുകൊടുക്കുന്നതിൽ പിശുക്ക്​ കാണിച്ചും വിക്കറ്റ്​ വേണ്ടഘട്ടങ്ങളിൽ ബ്രേക്ക്​ത്രൂ നൽകിയുമാണ്​ ശക്​തരായ ഇംഗ്ലണ്ടിനെ തറപറ്റിക്കാൻ ഭുവി ഇന്ത്യയെ സഹായിച്ചത്​.

ദക്ഷിണാഫ്രിക്കയു​ടെ ലിസല്ലെ ലീയാണ്​ ഏറ്റവും മികച്ച വനിത താരം. ഇന്ത്യക്കെതിരായ ഏകദിന പരമ്പരയിൽ ലീ ഒരു സെഞ്ച്വറിയും മൂന്ന്​ അർധസെഞ്ച്വറിയും നേടിയിരുന്നു​. ഇന്ത്യയുടെ രാജേശ്വരി ഗെയ്​ക്​വാദും പൂനം റാവത്തും പുരസ്​കാരത്തിന്​ നാമനിർദേശം ചെയ്യപ്പെട്ടിരുന്നു.

ഭുവനേശ്വറിനെ കൂടാതെ അഫ്​ഗാനിസ്​താൻ ലെഗ്​ സ്​പിന്നർ റാശിദ്​ ഖാനും സിംബാബ്​വെയുടെ സീൻ വില്യംസുമായിരുന്നു പുരുഷ വിഭാഗത്തിൽ നാമനിർദേശം ചെയ്യപ്പെട്ടിരുന്നത്​.

കലണ്ടർ മാസം കളിക്കളത്തിലെ പ്രകടനത്തിന്‍റെ മികവിൽ മൂന്ന്​ കളിക്കാരെയാണ്​ ഷോർട്​ലിസ്റ്റ്​ ചെയ്യുന്നത്​. ഇതിൽ നിന്നും മികച്ച കളിക്കാരനെ ഐ.സി.സി വോട്ടിങ്​ അക്കാദമിയും ലോകത്തെമ്പാടുമുള്ള ആരാധകരും ​ചേർന്നാണ്​ തെരഞ്ഞെടുക്കുന്നത്​.